Ester 2 - Kaxinawá Bíblia (BR)

Hawẽ aĩ kayabi ana betsa binũ, iwanã, shanẽ ibuhairatũ Ester katunikiaki, na hãtxarã

¹ Txipu hatiãra sinataima maĩtã haska waima inũ haska hakiri kene txakabu wakĩ itxakawabiaima Assuerõ Vastikiri ana shinãyã

² hawẽ merabewanikabu shanẽ ibu beshmasbũ Assuerokiri yuikĩ: —Hawẽ aĩ kayabi bena nukũ shanẽ ibuhaira bishũkĩ txipash hawẽrua hawa txutanameriama nũ haska benashũbauna peki.

³ Txipash hawẽruabu katushũ na maewã Susã anu ha aĩbuaibũ hiwe ewapa hawẽrua nukũ shanẽ ibuhaira haya anu hau hatu iwenũbũ província tibi hanu yunumis anua huni pepabu Assuerõ hau hatu katunũwẽ. Hanushũ habũ txipash hawẽruabu katushunimashũ ma hatu iweabũ aĩbuaibu mekenika Hegai hubu binibutũ hau hatu mekekubaĩshanũ nũ yunutiruki. Hawẽ hawẽrua wati dauwẽ Hegaĩ hatu pewakubaĩkĩ

⁴ txipash hawẽrua betsabu binua betxipaihairakĩ Vastĩ shãtukũ hawẽ aĩ kayabi wakĩ Assuerõ katutiruki— itã Assuero anu bushũ habias hãtxa yuiabu Assuerõ hatũ shinã betxipaikĩ: —Mã ea haska washũtirubuki— hatu wa

⁵ maewã Susã anu huni betsa Judeu nawa hawẽ kena Mardoqueu hiwea hawẽ epã kena Jair inũ, hawẽ hutxĩ kena Simei inũ, hawẽ hutxĩ epã kena Quis na dasibi Israelĩ huni bake Benjamimnẽ shenipabu inibukiaki.

⁶ Jerusalém anua Judá shanẽ ibu Jeconias inũ hawenabu Babilônia anu shanẽ ibuhaira Nabucodonosorĩ hatu iweaitiã Mardoqueũ shenipabu hatube berianibukiaki.

⁷ Mardoqueũ hawẽ pui nãtakeatũ aĩbu bake hawẽ ibubu ma mawanibu Mardoqueũ hawẽ bake keska wakĩ yume waima txipash hawẽruahaira hawẽ Judeu hãtxawẽ kenarã, Hadassabiakẽ Pérsia nawã hãtxawẽ kenakĩ: “Esterki”, akubainibukiaki.

⁸ Maewã Susã anushũ shanẽ ibuhairatũ hãtxa banabimakĩ keyuabu txipash hawẽruabu katukĩ Esteri hatube katushũ shanẽ ibuhairatũ hiwe betsa betsapa mishki kenebaunibu anu txipashbu hatu iyushũ aĩbuaibũ hiwe anu hau hatu merabewakubaĩshanũ aĩbuaibu mekenika Hegai inãkĩ txipashbu mekemabu

⁹ Ester pepa hawẽrua besti ikũkaĩkĩ Hegai betxipaimakubainaiwẽ taeshũ hawẽ hawẽruawati dau sharabuwẽ hawaira daũkĩ taewakĩ hanushũ piti pepasri pimakubaĩkĩ ha dikabi hau Ester merabewakubainũbũ 7 dayaru aĩbu pepabu shanẽ ibuhairatũ hiwe anua katushũ hatu yunushũ aĩbuaibũ hiwe dĩtu pepa anu Ester inũ hawẽ 7 dayarubu hatu maewashũ Hegaĩ hatu hiwemakubainaya

¹⁰ hau shabakabi hãtxai: “Ẽ Judeu nawaki”, ikĩ hau yuiyamashanũ Mardoqueũ Ester yunushinawẽ taea hawenabu inũ hawẽ ibubukiri Ester hãtxakĩ hawa yui taskamakẽ

¹¹ hanua haska Ester pewakubaĩkanimẽkaĩ, nĩkanũ ika shaba tibi aĩbuaibũ hiwe hemaĩtĩ anu Mardoqueũ hatu daĩbaĩkĩ uĩtãtanaya

¹² 12 ushe hawẽ hawẽrua wati dau txipash hawẽrua tibi hatu daũkubaĩkĩ ha dukũ 6 ushe hatũ yura tibi sheni hawẽ kena mirrawẽ hatu dapushkubaĩkĩ keyushũ ana 6 ushe hatũ yura tibi sheni ininipa inũ sheni teipa haska aĩbu hawẽ imiswẽ ana hatu dapushkubaĩkĩ ma keyukẽ txipash hawẽrua bestibu tibi shanẽ ibuhaira Assuero bebũ butã butãkĩ

¹³ aĩbuaibũ hiwe anua shanẽ ibuhaira anu kakĩ hawarawẽ txipash tibi daukaĩkatsi ikĩ hawara hatu yuka hawa hatu nemama ikaibũ

¹⁴ shanẽ ibuhairatũ hiwe anu ka meshu merã Assuerobe txutanametã penama butukaini aĩbuaibũ hiwe ewapa teke betsa anu txipash tibi iyutãtãkĩ Assuerõ aĩbuaibu hawẽ aĩ kayabima mekenika Saasgaz hubu binibũ hau hatu mekekubaĩshanũ hanu nitxiãbu txipu shanẽ ibuhaira anu ana butirubuma hakia txipash betsawẽ Assuero benimakĩ hawẽ kenawẽ ana hatu kena txipashbu ana butirubu ipaunibukiaki.

¹⁵ Mardoqueũ epa betsa Abiailĩ aĩbu bake Ester hau hari Assuero anu katanũ hawẽ merabewanikabũ Ester pewakubainaibũ Esterĩ dasibibu hatu pe shinãmakubainaiwẽ taeshũ aĩbuaibu bebũkiri haska iki kai hatũ mekenika Hegaĩ yunua besti Ester habe iki kaya

¹⁶ Assuero shanẽ ibui 7 ano kai 10 ushe hawẽ kena Tebete keyuriamatiã shanẽ ibuhaira Assuero anu hau hawẽ yura uĩmai kanũ habũ Ester iyuabu

¹⁷ Ester hawẽrua Assuerõ uĩkĩ txutashu haska aĩbuaibu hatiri betxipaibiakubaĩkĩ hatu binumakĩ Ester betxipaihairaya txipash hawẽruabũ Assuero benimawakubainimabu hatu binukĩ Esterĩ Assuero benimahairawa shanẽ ibũ ouro maiti sawemashũ Vastĩ shãtukũ Ester katukĩ hawẽ aĩ kayabi wanikiaki.

¹⁸ Txipu haratura ushe anu hau Ester kẽwãkubaĩshanũbũ habũ merabewai dayashũmisbu inũ habe yununikabu shanẽ ibubu beshmasbu Assuerõ hatu txanima beabu hatu besimakĩ Assuerõ hatu pimakubaĩkĩ ushe tibi província shanẽ ibubu tibibũ Susã anu ha pei pakamisbu ana itxapa hatu pakamama hatu eskarabes washũyua pakayukubainaibũ hanushũ shanẽ ibu pepakĩ hawa yaushiama tsuabura hawara hamẽ inãkuĩkatsis ikĩ inãkuĩti itxapa Assuerõ hatu pashkashũbaunikiaki.

Shanẽ ibuhaira Assuero detenũ ika yubakaibu Mardoqueũ hune tapĩmanikiaki, na hãtxarã

¹⁹ Aĩbuaibũ hiwe hawẽrua betsa anu txipash hawẽruabu iyutãtanaibutiã shanẽ ibuhairatũ hiwe mishki kenebaunibu hikiti shui beputi anu Mardoqueu tsaukẽ

²⁰ Ester katuriama Mardoqueube hiweshũ hawẽ hãtxa nĩkakubaini Mardoqueũ yusĩkubainima txibaĩ hawenabukiri inũ hawẽ ibubukiri Esterĩ hawa yuiriamakẽ

²¹ shanẽ ibuhairatũ hiwe hikiti betsa betsapa mekekubaĩmisbu detenamenika yununika dabe Bigtã inũ Teres Assueroki sinatahairakĩ detenũ ika yubakaibu shanẽ ibuhairatũ hiwe hemaĩtĩ hikiti shui dapi Mardoqueu tsaushũ hatũ yubakati hãtxa hune nĩkakĩ

²² tapĩtã haska wakĩ detekatsis ikaibukiri Mardoqueũ Ester yuia hawẽ bene Assuero anu kashũ habũ detenũ ika yubakaibu Mardoqueũ nĩkashu Esterĩ banabima

²³ nĩkatã hawẽ shanẽ ibu beshmasbũ: “Haska txanimamẽkaĩ?” ikaĩ hau nĩka pewanũbũ Assuerõ hatu yunua bushũ kushipawẽ yuka ibaũkĩ: “Txanimaki”, iwanã, tapĩshũ Assuero yuiabu detenamenika yununika dabe Bigtã inũ Teres habia dabe tenesh shũ hau dũtanũbũ hatu yunua hawẽ hãtxa nĩkakĩ hawa kaneama ashuãbu shanẽ ibuhairatũ uiãyã haska shanẽ ibũ akubaĩmis una anu hau hawenabũ hatukiri tapĩkubaĩshanũbũ ha huni dabe inũ haska Mardoqueũ merabewashinakiri hawẽ keneshunikatũ hatu keneshunikiaki.