Ester 1 - Kaxinawá Bíblia (BR)

Besi ewapa watã shanẽ ibuhaira Assuerõ hatu pimakubainikiaki, na hãtxarã

^1-2 Ha baritiã maewã mishki kenebaunibu kushipahaira hawẽ kena Susã anu hiweshũ ha mai pakea tibi bari huaikiri Índia anu paketani bari kaikiri inũ sulkiri Etiópia anu depia ha dasibi 127 província atxi keyua dasibi shanẽ ibuhaira Assuerõ hatu yunukubaini haska wakĩ hatu dasibi mekekubainikiri matu yuikĩ unãmanũ ea nĩkakãwẽ.

^3-4 Ma 3 ano Assuero shanẽ ibukũkaĩkĩ hawẽ mabu mirima hawẽrua inũ, hawẽ hiwe betsa betsapa itxapa anu hawẽ mae hemaĩtĩ anu mibã hua hawẽruaya inũ, haska dasibibu yunukubainai hawẽ kushipa ewakainai hatu uĩmakatsis ikĩ habe dayamisbu inũ, shanẽ ibubu beshmasbu inũ, Pérsia nawa inũ Média nawa detenamenikabu shanẽ ibubu inũ, província tibi anua yununikabu inũ, yununikabu beshmasbu hau benũbũ hatu txanima Susã anu bei itxai keyushinabũ hatu duawakĩ hatu besimakĩ 180 shaba shanẽ ibuhaira Assuerõ hatu pimakubaĩkĩ

⁵ hatu keyumatã txipu hawẽ hiwe betsa betsapa hawẽrua hemaĩtĩ anu mibã huaya hawẽrua anu ana besi betsa wakĩ hawẽ mae Susã anu hiweabu dasibi yununika shanẽ ibubu inũ shanẽ ibuma hatu txanima bei itxabu 7 shaba hatu pimakatsi pewanikiaki, eska wakinã.

⁶ Shanẽ ibũ hiwe hemaĩtĩ betsa betsapa anu dau wakĩ hawẽrua wakĩ mãkã hushupa txibu tibi anu mane hushupa prata meitxikitiya haki neshatã dispi nãke tashi mirĩ haki dispi meitxikiti haki kawẽbaĩshũ tari pepa hushupa inũ nãketapa pũtebainabu mãkã hushupa inũ meshupa datsa pewanibu inũ pau hawẽ nashpa yẽkẽhaira hemaĩtĩ tibi anu kekubaĩkĩ keyutã hanu huĩrukuĩ ouro maneki dakai bashti ika huĩrukũti inũ prata maneki dakai bashti ika huĩrukũtiri hemaĩtĩ tibi anu tsaũbaũshinabu

⁷ bei itxabu hawẽ hatu amati ouro kẽtxa wanibu betsa tibiki uva vinho nushuti shanẽ ibu yaushiama hamẽ iki txakai hatu inãbaũkĩ hatu amakinã,

⁸ hakia hawẽ hiwe anua piti inũ nushuti habũ inãbaũmisbu hawẽ tsumabu yuikĩ: “Habũ akaibu inũ akabuma nĩkamas hatu inãyamakãwẽ”, akĩ haska Assuerõ hatu yunushina hatu amakubainaibũ

⁹ hawẽ benẽ hatu haska waitiã shanẽ ibuhaira Assuerõ hiwe betsa anushũ hawẽ aĩ kayabi Vastĩ ha hatũ bene beshiãbũ aĩbuaiburi tari hatube besikĩ pikubainaya

^10-11 besikũkaini 7 shabatiã vinho akubaini shanẽ ibuhaira Assuero paeã benimahairakĩ hawẽ aĩ kayabi Vasti txanima hawẽrua shanẽ ibu beshmasbu inũ huni dasibibu hawẽ aĩ hawẽruahaira hukĩ hau hatu uĩmanũ hawẽ aĩ kayabi Vasti shanẽ ibũ maiti sawemabirãkĩ hau hanu tsauabu anu iweshunũbũ Meumã inũ, Bizta inũ, Harbona inũ, Bigtá inũ, Abagta inũ, Zetar inũ, Carcas, 7 huni hubu binibu shanẽ ibu dayashũmisbu Assuerõ hatu yunua

¹² Vasti anu bushũ haska hawẽ benẽ yunushu yuiabu hakia shanẽ ibũ yunuti hãtxa ikatsi ikama hatu danãkĩ hawẽ aĩ kayabi Vastĩ hatu hawa nĩkamakẽ txĩtũbirã Vastĩ hãtxa yuiabu nĩkatã shanẽ ibuhaira Assuero sinatahairai mĩ haki kematiruma dakashũ

¹³ haska hatũ beyawẽ taea hatũ hãtxa ha txibãti yunuti hãtxa inũ, nemati hãtxa ha unanepabu habu pepabũ unãhairaibube haska hawẽ ainĩ kaneshukẽ habũ yunuti unãhairaibube hãtxanũ, iwanã, hatu itxawa

¹⁴ unanepa betsabube ha shanẽ ibuhaira hatube hãtxanamemisbu Assuerõ hanu hatube tsaushũ yunumis anu shanẽ ibuhaira merabewai yununika beshmasbũ Assuerõ hawa watiru yuimisbu hatu itxawa haburã, huni unanepabu Pérsia nawabu inũ Média nawabu 7 shanẽ ibu kayabibu Carsena inũ, Setar inũ, Admata inũ, Társis inũ, Meres inũ, Marsena inũ, Memucã bea maniabũ

¹⁵ shanẽ ibuhaira Assuerõ hatu yukakĩ: —Ẽ hãtxa ea yuishunikabu ẽ yunuti hãtxa bushũ ẽ aĩ kayabi Vasti yuibiabu ea hawa nĩkama ea danãshuwẽ taeshũ nukũ yunuti hãtxa inũ nukũ nemati hãtxa txibãkĩ tsuã haskara mã ea shinãshũtirumẽ?— hatu wa

¹⁶ unanepabu betsabube nishũ Memucãnẽ shanẽ ibuhaira Assuero kemakĩ yuikĩ: —Mĩ aĩ Vastĩ mia besti danãkĩ berabĩwãmaki. Mia inũ, yununikabu inũ, hanu província tibi mĩ yunumis anu hiweaburi mĩ aĩ kayabitũ hatube berabĩwãkĩ mia dakewashuki.

¹⁷ Haska mĩ ainẽ ashu aĩbu dasibibũ nĩkakĩ unãshũ yuikĩ: “Hawẽ aĩ kayabi Vasti hau hunũ Assuerõ hatu yunua bushũ yuibiabu hawẽ benẽ hãtxa danaĩ hawa kama ishiãkiaki”, ikubainaibuwẽ taeshũ aĩbu dasibibũ hakiri nĩkakubaĩshãkanikiki.

¹⁸ Ha dikabi Pérsia nawabu inũ Média nawabu shanẽ ibubũ hatũ aĩbuaibũ haska Vasti ishu tapĩkĩ unãtã hatũ benẽ hãtxa nĩkama txakabuwakĩ hatu akabu betxipaiama hatũ bene tibi sinatakubaĩshãkanikiki.

¹⁹ Haskawẽ taeshũ yuikĩ: “Mĩ aĩ kayabi Vasti urẽkĩ mĩ nitxiã ana mia bebũ hupaketirumaki. Haska watã hawẽ shãtukũ aĩbu betsa ha binua katutã mĩ aĩ kayabi mĩ watiruki”, akĩ haska mĩ betxipaiai miã shinãkĩ mĩ ana yunu bena watiruki. Mĩ haska yunuaya hau maewakĩ betsa taskawayamashanũbũ Pérsia nawabu inũ Média nawabũ nemati hãtxa nukũ una anu hau kenenũbũ mĩ hatu yunutiruki.

²⁰ Hanu mĩ yunubainai anu mĩ shanẽ ibũ hãtxa hau unanũbũ hatu banabimakĩ keyuwe. Haskawẽ taeshũ aĩbu mabuyabu inũ aĩbu mabu hayabuma tibitũ hatũ benẽ hãtxawẽ datekĩ nĩkakubaĩshãkanikiki— aka

²¹ Assuero inũ unanepabu habe hãtxanamemisbũ Memucãnẽ hãtxa nĩkatã: “Peki”, ikaibũ haska hãtxa yuishu keska ha txibãbaĩti hau anũbũ shanẽ ibuhaira Assuerõ hatu yunua

²² hanu Assuerõ yunubaunai anushũ haska pe shinãkĩ yuikĩ tsuabura hatũ hiwe anu hiweabu huni tibitũ haska betxipaiaibu hau yunukubaĩshanũbũ hatu yunukĩ shukuabu tibitũ hãtxa, haska hatũ hãtxa kenemisbuwẽ Assuerõ yunuti hãtxa hatu kenemashũtã província tibi anu hawẽ shanẽ ibu beshmasbu hatu buma akeakenibukiaki.