Esdras 3 - Kaxinawá Bíblia (BR)

Jerusalém anushũ Senhor Deus kẽwãkĩ ana taewabainibukiaki, na hãtxarã

¹ Judá enabũ mai pakea anu ma hikiabu hatũ mae tibi hatũ hiwe anu maniabu ano tanakubainaibũ ushe 7 taeaya Jerusalém anu yura dasibibu itxabu

² haska Deusũ tsuma Moisĩ yununi Senhor Deus kẽwãkĩ hakishũ inabu nami kuakĩ keyushũkubaĩti hawenabu Jozadaquẽ huni bake Jesua inũ, hawẽ betsabu hawenabu Deusbe hãtxashunikabu inũ, Sealtielĩ huni bake Zorobabel hawenabubetã dasibi habũ Israelĩ enabu mekenika Deus kẽwãti txi tapu wakĩ taewakĩ

³ nawa betsabu hatunabuma hiwebaunabuki datekĩ Salomãonẽ hatu yunua anibu keska wakĩ txi tapu wakĩ pehaira washĩshũ penama tibi inũ bari kaya tibi ha txi tapu anushũ inabu nami hirabi menu keyushũkĩ Senhor Deus kẽwãkubainaibũ

⁴ haska Moisĩ yunukĩ keneni keska wakĩ ni mebi meshtetã utati hiwe watã hari ushakĩ Senhor Deus kẽwaĩ 7 shaba besiaibũ haska Moisĩ yusini txibãkĩ shaba tibi hati inabu itxawashũ Senhor Deus kẽwãkĩ hawenabu Deusbe hãtxashunikabũ hirabi menukĩ keyukubaĩkĩ

⁵ ha dikabi shaba tibi inũ, ushe bena nia tibi inũ, besiti meribi tibi Senhor Deus kẽwãtitiã hatũ inabu hirabi menukĩ keyukubainaibũ hanushũ betsabũ hatũ shinã pewanũ ishũ Senhor Deus kẽwãkĩ inãkuĩkĩ hatũ txashuwã tesẽshũ dashpeshũ hawẽ puku sheni bia hawẽ Deusbe hãtxashunikã txi tapu anushũ kuakĩ keyushuna hawẽ nami pitxãshũ ma hua hawenabubetã hawẽ kẽwãti nami pikubainaibũ

⁶ Senhor Deus kẽwãti hiwe ariabumabia shaba ha dukũ ushe 7tiã Senhor Deus kẽwãkĩ shaba tibi inabu hirabi menukĩ keyukubaĩkĩ taewanibukiaki.

⁷ Haska Pérsia nawa shanẽ ibuhaira Cirõ hawẽ yunuti una hatu inaĩmawẽ taeshũ hau Senhor Deus kẽwãti hiwe wanũbũ Líbano mati anushũ kusha derashũ sẽkekĩ itxapawashũ ha hi kekukĩ txaipa washũ ianẽwãwẽ bukĩ Jope anu keti ashũ hene anua mapemakĩ ianẽwã kesha hau mãtxĩkubainũbũ maewã dabe Tiro inũ Sidom anu hiweabũ yubakatã piti inũ nushuti inũ piti sheni hawa yaushiama hatu inãkubaĩkĩ habu mishki dayanikabu inũ hi mastanikabu dayamakĩ peiwẽ hatu pakakubainaibũ

Senhor Deus kẽwãti hiwe Templo bena wakĩ taewanibukiaki, na hãtxarã

⁸ Jerusalém anu hikimabu ano bestitxai inũ ushe dabe kaya Sealtielĩ huni bake Zorobabel inũ Jozadaquẽ huni bake Jesua hawenabu Deusbe hãtxashunikabu inũ, Israelĩ huni bake Levĩ enabũ hawẽ haibuaibu inũ, Babilônia anu hatu iyunibu ma habube txĩtũbiranimabubetã ana Deus kẽwãti hiwe Templo bena wakĩ taewakĩ hau habu dayakubaĩshanũbũ Levĩ enabu hunibu 20 ano binuabu katushũ yununikabũ hatu yunuabu

⁹ Deus kẽwãti hiwe bena wai dayakubainaibu hau habũ hatu yunukubainũbũ Jesua hawẽ huni bakebuya inũ, hawẽ betsabu inũ, Judá enabu Cadmiel inũ, hawẽ huni bakebu inũ, Levĩ enabu Henadadẽ huni bakebu inũ, hawẽ betsabu inũ, hawenabu betsabu hatibu habus shukutã daya hatu yunukubainibukiaki.

¹⁰ Senhor Deus kẽwãti hiwe haki tsamabaũti mishki dayanikabũ ma hanakĩ keyuaibũ haska Israelĩ enabu shanẽ ibuhaira Davĩ hatu yununi keska txibãkĩ hawenabu Deusbe hãtxashunikabũ hawẽ tari hawẽrua haya besiti sawetã hawẽ txã ati trombeta tsumatã hatu keshea mapuabu Levĩ enabu Asafẽ enabũ mane bronze turu tsakama tsakama ati dabe hawẽ Senhor Deus kẽwãti tsuma mapuabũ

¹¹ betsabũ kẽwaĩ kãtaibũ betsabũri kemakĩ: “Senhor Deus pepaki. Israelĩ enabu betxipai nuimis hawẽ nui keyutimahairaki. Pepawakĩ benimawanãkãwẽ”, ikubainaibũ Senhor Deus kẽwãti hiwe bena wakĩ ma taewaibuwẽ taea yurã kaiã benima txakayamai sai sai ikĩ Senhor Deus kẽwãkubainaibũ

¹² Senhor Deus kẽwãti hiwe bena waibu uĩ hawenabu Deusbe hãtxashunikabu inũ Levĩ enabu inũ hawenabu yunui shanẽ ibu itxapabu natiã ma anibubia Senhor Deus kẽwãti hiwe Templo Salomãonẽ ani habũ uinibuwẽ taea benima txakayamai kashai bis bis ikubainaibũ habiastiãri betsabu itxapaburi benimahairai sai sai iriakubainaibũ

¹³ benimai sai sai ikaibu inũ kashai bis bis ikaibu tsua hatũ hui unãtiruma txaihairashũ nĩkanibukiaki, itimaskakĩ hatũ hui kaĩmaiburã.