Efésios 5 - Kaxinawá Bíblia (BR)

¹ Matubu mã Deusũ bakebu kayabi pepabunã, haska Deusũ abuai haska besti txibãkĩ mawakubaĩkãwẽ.

² Haska inũ, Cristõ nuku abukĩ Deus duawanũ ika Deusũ kupiti nuku bishuĩ mawai inĩti hawẽrua keska puekĩ Deus benimawanikẽ haska Cristo nuku ishuni keskariakĩ nukubetã ikũwaĩbu dasibibube nui abunamei hiwekubaĩkãwẽ.

³ Hanushũ ikũwãbumã hatu ati wakĩ hawa txakabuki dakeama yuikĩ hamapaiwẽ kemuhairakubaini hiwemisbuki. Hakia matuburã, ana hatu keska hiweama haska ikũwaĩ hiweti betsahaira hiwekĩ txutanamebaũmisbukiri ana xinaĩ hãtxama inũ txakabu atimapa tibi ana xinaĩ hãtxamari inũ kemu paekiri ana xinaĩ hãtxama haska Deusũ hawenabu uĩkatsi ikai keska besti txibaĩ hãtxakubaĩkãwẽ.

⁴ Ha dikabi nukũ keshawẽ hãtxairã, ana dakewati hãtxa txakabu yuiama inũ, hãtxa hamapawẽ yuiama inũ, hãtxa tsua merabewatimawẽ ana hãtxama haska tibiwẽ hãtxa ana kaĩmama matũ keshawenã, Deus besti kẽwãkubaĩkãwẽ.

⁵ Ha inũ, txanima tsuabura haska dakeama hamapai tibibe txutanamebaũmisbu inũ, hawara atimapa tibi amisburã, Cristo inũ Deus shanẽ ibuaya hatube hiwetirubumaki. Ha inũ, tsuabura hamapaiwẽ kemumisrã, dami yushĩ itsa washũ kẽwãmisbu keskawẽ taea ha haskamisbu Cristo inũ Deusbe hiwetirubumariki.

Cristo txibaĩbu ma shabaki pesea keska hiwekũkaĩtikiaki, na hãtxarã

⁶ Tsuabũra matu beparãkĩ hamẽ matu yusĩkĩ paraĩburã, hatu nĩkayamakãwẽ. Tsuabũra Deus nĩkama hawa merabewatimakiri yusĩmisburã, Deusũ hatu kupitxakayamashanikiki. Uĩrakubaĩshãkãwẽ.

⁷ Ha inũ, hawara txakabuwaibube ana hatube dasiyamakubaĩkãwẽ.

⁸ Ha inũ, uatianã, nukũ Shanẽ Ibu unãkĩ ikũwãriama txakabui mexu merã ika keska mã hiwenibuki. Hamẽ eskatianã, Cristo ikũwaĩ haki dasitã matũ xinã maewatã mã betsahairawa mã ma shabaki pesea keska hiweabuki. Haska mã ma tapiã xinaĩ pe hiwekubaĩkãwẽ.

⁹ Ha shabapã nukũ xinã betsa wamatã nuku tapĩmai tsekekaĩkĩ mia imairã, nuku duapamai inũ, nuku kayatapimai inũ, nuku txani txakatimawaikiki.

¹⁰ Hawara Deusũ abuai unãtã heneama ashũkĩ benimawakubaĩkãwẽ.

¹¹ Tsuabura mexu merã nia keskashũ txakabu xinãtã matu amakatsis ikaiburã, hawa pe hayabumaki. Ana hatuki dasiama matuĩ hatu dakewakĩ shabakã kaĩma keska wakĩ shabakabi pepakiri hatu yuikubaĩkãwẽ.

¹² Hawara txakabuhaira hune ikaibu shabakabi yui daketiki.

¹³ Hatũ txakabukiri mã hatu unãmaya hawara hune txakabu betsa betsapawamisbu dasibibũ shabakabi unãtirubuki, ana haska washũ hunetimarã.

¹⁴ Haskakẽ haska xinã betsa watirubu xinãkĩ Deuskiri nawati yuikĩ: “Txakabũ matu tsumarã, mepamarikãwẽ. Mã mawabiani hanũ beniribirãkãwẽ. Matũ txakabu mã heneaya Messias Cristõ hawẽ txashawẽ matu yusĩkĩ matu unãmashanikiki”, ikaki.

¹⁵ Haskakẽ matũ hiwearã, uĩrakãwẽ. Hawara mã akai txibaĩ pe bestikubaĩkãwẽ, unaĩsmapamarã, hakia unãnepairã.

¹⁶ Natiã txakabu betsa betsapa huaya menã manama matũ hiwea pewarikãwẽ.

¹⁷ Haska inũ, ana hawarawẽ unaĩsmapama hawara nukũ Shanẽ Ibũ matu amakatsis ikai nĩka pewatã haska xinaĩkiri tapĩrikãwẽ.

¹⁸ Haska inũ, mã nushuti pae xarabu beya wanirã, hawẽ kemui xinã txãkaĩ pe mekeama mã txakabumisrã, ha henetã natiã Deusũ Yushĩ Pepa bestiwẽ kemukĩ nushukĩ akawakĩ mata wakĩ matũ huĩti benimai xinã txãkãkubaĩkãwẽ.

¹⁹ Eska tibi bestiwẽ yuikĩ kẽwãkubaĩkãwẽ. Mã hatubetã ikũwaĩbube Deuskiri nawati tibiwẽ nukũ Shanẽ Ibu kẽwaĩ huĩti hirabiwẽ benimawakubaĩkãwẽ.

²⁰ Hawara mã haya inũ hawara mã hayama Epa Deusũ dasibi nuku inãmis xinãkĩ yuikĩ: “Haska hamapai xarabu mĩ ea inaĩwẽ taeshũ ẽ mia kẽwaiĩ”, akubaĩkãwẽ, nukũ Shanẽ Ibu Jesus Cristõ kena kuxipawẽ yuikinã.

Haskai duanamekũkaĩtikiaki, na hãtxarã

²¹ Haska inũ, Cristokiri pe xinãkĩ mã duawakatsis ikairã, ikũwaĩbu betsabube binunãnãkatsis ikama hatube yununãnãma nĩkakanãkubaĩkãwẽ.

²² Beneyabuũ, matu yununũ nĩkakãwẽ. Nukũ Shanẽ Ibũ matu yunua nĩkashũ mã akai keska wakĩ matũ benẽ matu yunua habebis yununamei hẽ iyamama ashũkubaĩkãwẽ.

²³ Haska inũ, Cristo mã ikũwaĩburã, Cristorã, matũ bushkaki. Maturã, mã hawẽ pabuki. Matũ bushka matũ mekenikaki. Habiaskari mã aĩbu beneyaburã, matũ benerã, matũ bushkaki, hatũ matu mekemisrã.

²⁴ Haskakẽ nũ Cristo ikũwaĩbũ hawẽ yunua tibi nĩkashũ nũ amis keska wakĩ matũ benẽ hamapai mia yunua nĩkashũ aĩbu tibitũ matũ beneri nĩkasama hau hatu ashũriakubainũbũwẽ.

²⁵ Aĩyãbuũ, maturi yununũ nĩkakãwẽ. Cristo habũ ikũwãshanaibuwẽ nuikĩ abui hawẽ hiwea hatu inãni keskai maturi matũ aĩwẽ nuikĩ parãma hatu abuhairakubaĩkãwẽ.

²⁶ Cristõ nuku haska wakatsi ikĩ nũ hawẽ ikũwaĩbu nuku mawashũkĩ hawena meribi txakabuma nũ shũpinũbũ hawẽ kakape nũ ikũwaĩwẽ taeshũ nuku naximamisbuki.

²⁷ Cristo habũ nũ ikũwaĩbu pepahaira hawa detsis neama hawa tari txũpima ana hawa txakabu betsa tibi hayama nukũ hiwea sheni henetã pepa meribi besti haska hatũ besu uĩkatsis ikikiki.

²⁸ Habiaskariai hawẽ bene hawẽ aĩbe ketashameshũ abuirã, hawẽ yura keskawẽ taea hunibũ hatũ aĩwẽ hau nuikubainũbũwẽ. Haska xinãkinã, hatũmebi hatũ yurawẽ nui keskakĩ hatũ aĩ abukanikiki.

²⁹ Tsuabũra hatũ yura danãma pimakĩ mekemis keska wakĩ habiaskari wakĩ Cristõ hawẽ ikũwaĩbu mekemiski,

³⁰ hawẽ yurakenã. Nukuburã, ha yurakirã, nũ hawẽ pabu tibiki.

³¹ Haskawẽ taea haska huni inũ hawẽ aĩ yura bestitxai keskatikiri Moisés kenekĩ yuikĩ: “Haskawẽ taea hunĩ hawẽ ibubu dapashkabaĩ hawẽ aĩbe ketashametã ha dabe hiwei ana yura dabema yura bestitxai keskatiki”, hatu waniki.

³² Aĩyaĩ inũ beneyai yura bestitxai keska hiwearã, mĩ tapĩtirurã, bikaki. Hakia habiaskariai Cristo inũ dasibi ha ikũwaĩbu haki dasia habiaskariki, Cristoki nũ haki dasia nũ yura bestitxai keskaburã.

³³ Habiaskari wakĩ haska huni tibitũ hawẽ yura ibubis mekemis keska wakĩ hau hawẽ aĩ pe mekekĩ duawakubainũbũwẽ. Haska inũ, hatũ aĩnĩ hawẽ benẽ yunuai hau nĩkashũkubainũbũwẽ.