Daniel 1 - Kaxinawá Bíblia (BR)

Israelĩ enabu ha dukũ Babilônia anu hatu iyukĩ taewanibukiaki, na hãtxarã

¹ Judá enabũ mai pakea anushũ hatu yunui Jeoaquim shanẽ ibuhairakũkaini ma 3 ano kaya Babilônia shanẽ ibuhaira Nabucodonosor hawẽ detenamenikabu itxapabube hikitã Jerusalém kebauni nati ikabu

² hawenabu hau hatu atxinũ Nabucodonosor Senhor Deusũ henea Nabucodonosor hawẽ detenamenikabubetã Jerusalém atxiabu ha katxu hikikaĩ Judá enabu shanẽ ibuhaira Jeoaquim atxitã hanushũ Judá enabu mai pakea anuabu hawẽ tsuma hatu watã hanushũ hawẽ kushipawẽ Templo anua hawẽ kẽwãti mabu meribi Senhor Deusuna itxapa hau bikĩ itxawanũbũ Nabucodonosorĩ hawẽ tsumabu hatu yunua bikĩ itxawaibũ hunibu pepabu katushũ habu inũ ha mabu meribi Babilônia anu Nabucodonosorĩ hatu bumakĩ Babilônia anu bitxiabu hawẽ yushibu kẽwãti hiwe hanu mabu meketi dĩtu Sinar anu Deus kẽwãti mabu meribi Nabucodonosorĩ hatu arumanikiaki.

^3-4 Ha dikabi Israelĩ enabu hatu iweshĩshũ shanẽ ibubũ enabu inũ mabuya pepabũ enabu anua berunãbu pepabu hawẽrua inũ, hawẽ yura hawa txakabu hayabuma inũ, hawaira tapĩkĩ nĩkatirubu inũ, shanẽ ibũ hiwe hawẽrua anushũ hawa bika teneama merabewakubaĩtirubu hatu katushũ Caldéia nawabũ hãtxa inũ hatũ una kene hau hatu yusĩkubaĩshanũbũ hawẽ hiwe hawẽrua anu hawẽ dayarubu yununika hawẽ kena Aspenaz Nabucodonosorĩ hatu yunua Israelĩ enabu berunãbu unãmakubaĩkĩ berunã huni pepabus hatu katubainima

⁵ hanushũ 3 ano ha berunãbu hatu yusĩkubaĩkĩ habias shanẽ ibũ piti inũ nushuti vinho shanẽ ibuhaira inãmisbu shaba tibi hau hatu pimakubaĩshanũbũ Nabucodonosorĩ hatu yunurianikiaki.

Daniel inũ hawẽ haibuaibũ hatũ kene tapinibukiaki, na hãtxarã

⁶ Judá enabu Daniel inũ, Hananias inũ, Misael inũ, Azarias ha berunãbube

⁷ dayaru yununika Aspenazĩ hatu katushũ hawẽ hãtxawẽ hatu kena betsa wakĩ Daniel kena bena wakĩ “Beltessazar” washũ Hananias kena bena wakĩ “Sadraque” washũ Misael kena bena wakĩ “Mesaque” washũ Azarias kena bena wakĩ “Abede-Nego” washũ hatu pima taewaya

⁸ shanẽ ibũ piti inũ nushuti vinho pepawẽ txakabui hatũ huĩti detsiskatsi ikama dayaru yununika Aspenaz Danielĩ yukakĩ: —Uiã. Shanẽ ibuhairatũ piti pehairabia hawẽ pitiwẽ yushibubu dami kẽwãmisbuwẽ taeshũ nukũ mekenika Deusũ beya txibãma nũ sinatamatirubuki, txakabuwakinã. Nũ txakabukatsi ikamarã, nuku dabe inũ dabebũ ha piti piyamakubaĩshãpa?— aka

⁹ dayaru yununika Aspenaz Deusũ berunãbuwẽ nuimaya

¹⁰ Aspenazĩ Daniel yuikĩ: —Ẽ shanẽ ibuhaira Nabucodonosoriwẽ taea ẽ dateaii. Hawara mã pikubaĩshanũbũ inũ mã nushukubaĩshanũbũ ẽ shanẽ ibũ ea yunushinaki. Berunã betsabu keskama mã imanai babuai ẽ shanẽ ibũ uĩtã matuwẽ taeshũ ẽ shanẽ ibũ ea hatu tenãmatiruki— aka

¹¹ hawẽ hãtxa nĩkatã Daniel inũ, Hananias inũ, Misael inũ, Azarias hau hatu mekekubainũ dayaru yununika Aspenaz yunushina Danielĩ yuikĩ:

¹² —Nũ mĩ tsumabuwẽ taeshũ mĩ nuku unãti wanũ ẽ mia ea akaii. Yusu hua besti nuku pimakĩ ũpash besti nuku neshumakĩ 10 shaba besti ha piti hau nuku inãkubainũbũ hatu yunuwe.

¹³ Ha 10 shaba binuaya shanẽ ibu pimakĩ habias piti berunã betsaburi pimakubainaibũ nukũ besu inũ hatũ besu uĩkĩ haratura besu pepa binua mĩ unãtiruwẽ taeshũ haska mĩ shinaĩ keska nuku ashãwẽ— aka

¹⁴ dayaru yununikatũ Daniel hãtxai hakiri pe shinãtã 10 shaba kaya pitiwẽ hatu unãti wa

¹⁵ ha 10 shaba binukainaya shanẽ ibũ piti berunã betsabũ pikubaini Daniel inũ hawẽ haibuaibũ besu shuai kushipakĩ hatu binuaya

¹⁶ haskaibũ shanẽ ibũ piti nami inũ vinho ha hatu inãma yusu inũ yunu betsa betsapa inũ ũpash besti hau hatu neshumakubainũbũ dayaru yununikatũ hatu yunua haska wakĩ hatu pimakubainaibũ

¹⁷ ha 4 berunãbũ Babilônia una kene inũ hatũ beya dasibi unãti hau tapĩ keyunũbũ shinã shabakabi wakĩ dasibi nĩkanika Deusũ hatu wakubaĩkĩ tsuara ushamabia nama keska uĩ inũ usha namakĩ uĩ haska yuinika wakĩ Deusũ Daniel besti unanepa wariakubainaya

¹⁸ hatishũ hatu yunuima hatu yusĩkĩ menetã hau ea uĩmai beshanũbũ, iwanã, shanẽ ibuhaira Nabucodonosorĩ hatu yunuima berunãbu dasibi hatu yusĩkubaini ma 3 ano keyuaibũ dayaru yununika Aspenazĩ berunãbu dasibi hatu iyushũ Nabucodonosor bebũ hatu nitxiã

^19-20 habu tibi unãti wakĩ bestibu tibi Nabucodonosorĩ hatu yukakubaĩkĩ hamapai sharabu Nabucodonosorĩ hatu unã keyukĩ Daniel inũ, Hananias inũ, Misael inũ, Azariasĩ berunã betsabu hatu binuhairaibu unãtã hamapai sharabukiri hatu ana yukahairaya hawaira tapinikakĩ unanepabũ shabakabi kemakĩ Babilônia anu mukayabu inũ yushibu yukanikabu dasibi 10 vezes hatu binu keyuabuwẽ taeshũ Daniel inũ, Hananias inũ, Misael inũ, Azarias hatu katua dayashũkĩ taewabainaibũ

²¹ Babilônia anu bari itxapa hiwekũkaini Pérsia nawabu shanẽ ibuhaira Cirõ hatu yunu taewabainaya Daniel dayashũriakũkainikiaki.