Apocalipse 4 - Kaxinawá Bíblia (BR)

Nai anushũ Deus kẽwaĩbu Joãonẽ uĩnikiaki, na hãtxarã

¹ Haska nĩkaxina inũ hati uĩshu naiuri besushũ beputi bepeã uĩtã hui trombeta mimawati kuxipa keskawẽ hawẽ dukũ Jesus hãtxai ẽ nĩkaxina ana habiãwẽri ea hãtxa wakĩ yuikĩ: “Ea anu inayuwe, mĩ inakẽ haskarara ana betsa betsapa inũbariai ẽ mia uĩmairã”, ea watã

² hawaira ea betsa watã ẽ yushĩki dasitã ea uĩma nai anu inashũ ẽ uĩshu matu yuinũ nĩkakãwẽ. Hari Shanẽ Ibu haki tsautiki nukũ Epa Deus tsauwa ẽ uĩshuki.

³ Ha tsauwa hawẽ yurarã, jaspe keska kasmai sardônica keska nẽkati karuhaira txashahaira bakamana bakamana ikaya hawẽ tsauti kesukawana namakis nawã bai tapia esmeralda nẽkati nãketapa keska txasha txasha ikikiki.

⁴ Hanua Deus shanẽ ibu haki tsauti anu 24 tsauti betsa hanu serebauna uĩkĩ 24 mekenikabu habu haki tsauwabu tari hushupa sawea shanẽ ibũ ouro mane maiti maiabu ẽ uĩayã

⁵ Deus hanu tsauwa anua kana bakatã tĩ ikaini dãka ikainaya Deusũ besuuri hawẽ merabenã yushĩ sete nãparina bĩ dekua nitxĩbauna txasha keskabuki.

⁶ Haska inũ, tsauti besuuri iãnẽwã beshnãhaira bakamanaya ha dapi hiweabu dabe inũ dabe ha tsauti anu mapubauna habũ besuuri beru sãkã daka inũ hatũ petxiuri beru pesãkã dakabu

⁷ ha dukũ inu ewapa betsa hawẽ yura leão keska ha katxu ina awa bake keska ha katxu betsa hunĩ besuya keska ha katxu betsa tete ewapa nuyai keska

⁸ hatibu seis pũyã peiya habũ yura hirabi hawẽ berunati txasha dakabũ bariri inũ mexu merã Deus kẽwãkĩ habũ heneisbumã yuikĩ: “Mĩ pepahairaki. Mĩ dasibi kuxipa binuaki. Mai hayariama nukũ Shanẽ Ibu Deus dasibi kuxipahaira hiwea haya inũ, natiã hiwekũkainai inũ, ana mĩ butushanai nũ unaiĩ”, ikĩ

⁹ Deus niti ikama hiwea ha dabe inũ dabe hiweabũ hamapai pepa hakiri xinãkĩ hawẽ pepakiri yuikĩ kẽwaĩbũ

¹⁰ ha 24 mekenikabũ kẽwãriakĩ dãti ishũ shanẽ ibuhairawakĩ habũ hatũ ouro mane maiti mabikitã inãkĩ hawẽ tae namã mãtxĩtã yuikĩ:

¹¹ “Dasibi damiwakĩ mĩ xinãwẽ hamapai dasibi mĩ damiwani mĩ nukũ Shanẽ Ibu inũ mĩ nukũ mekenika yushĩ Deuski. Haskawẽ taeshũ mia besti kẽwãkĩ nũ mia duawakubainaii”, akaibu uĩkĩ ẽ matu keneshunaii.