Apocalipse 16 - Kaxinawá Bíblia (BR)

¹ Hanushũ ẽ ana nĩkaya nai anu Deus kẽwãti Templo anua hui kuxipawẽ sete nai tsumabu tsuãra yunukĩ hatu yuikĩ: “Matũ sete kẽtxaki Deus sinatamis mata mesehaira mai anu bushũ hiweabuki hatu hukakeakeritãkãwẽ”, hatu wa

Deusũ hawẽ hatu kupiti sete nai tsumabũ kẽtxa mata hukakeakekubainaibu uĩnikiaki, na hãtxarã

² nai tsuma betsa ha dukũ kashũ hawẽ kẽtxaki Deus sinatamis mata mai anu hukaya ha yurabu mai anu hiweabu habu ha yuinaka mese atimapa habũ unãtiyabu inũ hawẽ dami kẽwãmisbu habũ yuraki txami isĩ atimapa kaĩkĩ isĩhaira hatu tenemaya

³ hanua nai tsuma ha segundo kashũ hawẽ kẽtxaki Deus sinatamis mata iãnẽwanu hukaya huni pubẽ hatuki sinatakĩ hatu txatxia mawai himi habamis keskai hene pisiwa hene merã hiweabu dasibi mawaibũ

⁴ hanua nai tsuma ha terceiro kashũ hawẽ kẽtxaki Deus sinatamis mata hene kayabi dasibi inũ txatxa dasibi anu hukaya hene dami himi keyuaya

⁵ nai tsuma hene hatũ mekemistũ Deus yuikĩ: “Mai hayariama mĩ hiweni inũ natiãri Deus meribi hiwemistũ hawa kaneama habis hatu unãti wakĩ mĩ amisrã, mĩ mia besti nũ unaiĩ.

⁶ Mĩ hãtxa yuishunikabu inũ Jesus txibaĩbu itxakawakĩ habũ himi habawakĩ tenãkubaĩmisbu haburi hatu kupikĩ himi mĩ hatu amaii. Haska mẽnũ ika imisburã, hau haskanũbũwẽ”, akaya

⁷ hanushũ Deus kẽwãkĩ tapu hanu hawẽ inãkuĩti hanamisbu anushũ tsuãra yuikĩ: “Shanẽ Ibu Epa Deus dasibi binuatuũ, hanuki. Dasibi kuxipayakĩ kaneisma yurabu unãti watã txanima mĩ xinã kayatapiawẽ miã besti mĩ hatu kupiaii. Mĩ pehairaki”, akaya

⁸ hanua nai tsuma ha quarto kashũ hawẽ kẽtxaki Deus sinatamis mata bari anu hukakĩ bari kuxipa wa ha barĩ kuxipa bitã yurabu menuaya

⁹ hawẽ kupiti txakabu tibi Deusũ yunukĩ hatu tenemaiwẽ taeshũ ha kuhairaiwẽ menubiakĩ haska xarabu mebiai Deuski shetxakakĩ kẽwãnũ ishũ xinã betsa wabumaki.

¹⁰ Hanua nai tsuma ha quinto kashũ hawẽ kẽtxaki Deus sinatamis mata yuinaka mese atimapahaira haki tsauti anu huka hawẽ mae mexuaya yurabu ana hawawẽ haskatima isĩ tenei hatũ hana bushtebaĩbaina manibia

¹¹ habũ isĩ txakabu tibi mebiai inũ txami tenebiai habũ hiwea txakabu henekatsi ikama Deus nai anu hiwea haki shetxakai hãtxa txakabu yui heneabumaki.

¹² Hanua nai tsuma ha sexto kashũ hawẽ kẽtxaki Deus sinatamis mata henewã Eufrates anu hukaya hau shanẽ ibubu bari huaikiria hau hawẽ benũbũ bai tapĩshuni hene netsuaya

¹³ hanushũ yuinaka mese atimapa hashpa anua inũ, yuxibu sheanã hashpa anua inũ, huni betsã parã hãtxa yusĩmis hashpa anua habu tibi anua yushĩ txakabu heu keska kaĩaĩ ẽ uĩshuki.

¹⁴ Ha yushĩ tibirã, hawẽ yushĩ txakabuwẽ dayakĩ dami atimaska betsa betsapa hatu washũkĩ shanẽ ibubu dasibi mai hirabi anua hatu tashnibirã hatũ soldadobuya detenamemanũ, iwanã, hatu itxa wakẽ hanushũ Deus kuxipa binuatũ hanu akaitiã hatu maemakĩ yamawashanikiki.

¹⁵ Haskai ẽ uĩayã Jesus hãtxai: “Uĩa. Ea ana matu anu kairã, ẽ yumetsu kai keskakaĩshanaii, tsuã haska ana xinãmakenã. Habu mã benimashanaiburã, usha keskama bestẽshũ mĩ hiwea mĩ tari mĩ meke pewa keska ishãkãwẽ, hawa mĩ tari pekatã nia keskamarã, matũ yura tariuma nia hawẽ mã daketiru keska iyamakãshunã”, ea waya

¹⁶ hanushũ yushĩ txakabu heu keskabu bushũ hau Deusbe detenamenũbũ hawẽ Hebreu hãtxawẽ Armagedom mae anu shanẽ ibubu dasibi hatu itxawabu

¹⁷ hanua ha nai tsumabu hawẽ henea ha sétimo kashũ hawẽ kẽtxaki Deus sinatamis mata hawẽ huĩsinaibu anu niwe anu hukaya hanua Deus shanẽ ibu haki tsauti hawẽ hiwe anua hãtxa kuxipa kaĩkĩ yuikĩ: “Ma hatis besti ẽ keyushuki”, ikaya

¹⁸ hanua kana baka baka itã tĩ ikaĩkaini mai taka aki mai patxa sakui yurabu mai anu hiweabu: “Haskakũkiranai nũ meismaki”, iki mesehairaibũ

¹⁹ dasibi yurabũ mae ewapa Deusũ tekekĩ keyukĩ ha mae ewapa Babilônia kuxipahairabia hawẽ txakabu xinaĩ haki sinatahairakĩ pakea dabe inũ besti washũ hatu kupihairakĩ

²⁰ dasibi natukã tibi yamawariakĩ mati dasibi yamawakĩ

²¹ haska waya naiuria barush ui itamama betsa 40 kilo yurabuki niri imaya barush ui mesehairawẽ taea yurabu Deuski shetxakashanaibu nĩkakĩ ẽ uĩshuki.