Apocalipse 12 - Kaxinawá Bíblia (BR)

Aĩbuki yuxibu sheanã pubẽnikiaki, na hãtxarã

¹ Hanua nai anua unãmati betsa tashnikirani aĩbu hawẽ batxi barĩ txashapã yabua inũ, hawẽ tae ushẽ tatxasha inũ, shanẽ ibũ maiti 12 bixi nea maia

² ha aĩbu tuya bake kaĩnũ ika isĩhaira mei bis ikai ẽ uĩayã

³ hanua hawẽ unãmati dami betsa nai anua tashnia yuxibu sheanã taxipa hawẽ yura kapetãwã yura keska sete bushkaya dez mashũyã bushka tibiki shanẽ ibũ maiti maia tashnitã

⁴ tsuãra bixi hatiubukũs watã pake dabe inũ besti habiatius wakẽ pakea betsa yuxibu sheanãtũ hawẽ hina bekũ bekũ akĩ bixi pakea betsa mai anu urẽtã ha yuxibu sheanãtũ aĩbu tuya bake kaĩnũ ikai ha dapi hawẽ besuuri nishũ hawẽ bake kaĩaĩ atxishũ shẽanũ, iwanã, manaya

⁵ ha aĩbu anua huni bake kaĩtã ewatã nawa betsa betsapa dasibi binukĩ habũ Deus nĩkabuma hawa kaneama kupi hau shanẽ ibushanũ ha bakeixta kaĩa sheanãtũ shẽapanã iyukĩ hawẽ shanẽ ibũ tsauti anu Deusũ pashawakĩ ainikẽ

⁶ aĩbu hanu tsua hiweabumanu pashawakĩ mae betsa anu Deusũ aĩbu pewashuni anushũ 1.260 shaba harishũ hau pimakubaĩshanũbũ hari yunua aĩbu pashakẽ

⁷ hanua nai anua Deusũ nai tsumabu shanẽ ibuhaira Miguel hawẽ tsumabube inũ yuxibu sheanã hawẽ tsumabuyari hatube detenameaibũ

⁸ yuxibu sheanãtũ maematirubumawẽ taeshũ nai anu ana habube hiwetirubuma Miguelĩ hatu urẽkĩ

⁹ ha yuxibu dunuwã hiwei taeni sheanã txani ewã yura dasibibu hatu parãkubaĩmis nũ Diabo Satanás wamis hawẽ tsumabube mai anu hatu maemakĩ niri akabũ

¹⁰ hanua hui kuxipa nai anua kaĩaĩ ẽ nĩkaya yuikĩ: “Nukũ betsabu habũ ikũwaĩbu bariri inũ mexu merã Deus bebũshũ nuku hatu txitẽkĩ yuãmis ma putabuki. Pehairaki. Natiã Deus shanẽ ibuaya hawẽ bake Messias Jesus Cristo habe shanẽ ibukĩ hatũ kuxipahairawẽ nuku mekekĩ taewakanikiki, ha yauxikĩ ana hawenabu benutimarã.

¹¹ Habu nukũ betsabũ Satanás maemakinã, Jesus Deusũ txashuwã bake habu mawashũkĩ hawẽ himi habaniwẽ taea inũ hawẽ kakape hãtxa txanikĩ hawa dateama hatũ hiwea benutiruma unãkubaĩmisshũ habu mawawẽ dateisbumã Satanás ma maemariabuki.

¹² Haskawẽ taea nai inũ mã hanu hiweabuũ, benimarikãwẽ. Hakia mã mai anu inũ iãnẽwã anu hiweabuũ, mã peirakãwã. Satanás pubẽhairatũ bari itxapama besti matu itxakawatiru xinaĩ matu anu ma hari butuaki”, hatu wa

¹³ hanushũ yuxibu sheanã ma mai anu puta uĩtã ha huni bakẽ ewa yuxibu sheanãtũ itxakawakĩ nuitapawakĩ taewakubainaya

¹⁴ hanu tsua hiweabumanu txai harishũ bari dabe inũ besti namakis keska Deusũ aĩbu merabewakĩ pimakubainũ, iwanã, tete ewapã pũyã damiwatã Deusũ aĩbuki tsamĩa hawẽ nuyakaini hanu hiweshanai anu pashawashanũ ikaya

¹⁵ yuxibu sheanã haki sinatahairakĩ hawẽ hashpakã ũpash tuea txara txara ikĩ hene ewabaĩkĩ hau aĩbu nũtãbainũ, iwanã, aka

¹⁶ hakia maĩ aĩbu merabewakĩ ha yuxibu sheanãtũ hene wa ha mai hashpatã hene tsu akĩ keyuaya

¹⁷ haskaya yuxibu sheanã aĩbuki ana sinatahairakĩ ana hawawẽ haska watima hawẽ bababu teshebũ Deusũ hãtxa txibãkĩ Jesus ikũwãkubainaibu tenãnũ ika

¹⁸ ha yuxibu sheanã iãnẽwã kesha hanus keshea nikẽ