1 Samuel 9 - Kaxinawá Bíblia (BR)

Samuelki Saul nukunikiaki, na hãtxarã

¹ Jacó huni bake Benjamimnẽ enabu huni betsa dasibibũ betxipaimisbu hawẽ kena Quis inikiaki. Hawẽ shenipabu Afiasĩ huni bake betsa Becorate inikiaki. Becoratẽ huni bake betsa Zeror inikiaki. Zerorĩ huni bake betsa Abiel inikiaki. Abielĩ huni bake betsa Quis inikiaki.

² Quisĩ huni bake iyua huni ewa hawẽrua ewapa keyatapa hawẽ kena Saul inikiaki. Israelĩ enabu betsa hawẽrua keyatapa ha keska tsua habebisma hatu binu keyua inikiaki.

³ Shaba betsatiã Quisĩ jumenta itxapa ibubis harakirira bui benushĩkẽ hawẽ bake Saul yuikĩ: —Nukũ dayaru haratura betsabe kashũ nukũ jumenta benakubaũtãkãwẽ— aka

⁴ Saul hawẽ dayaru betsabe kakĩ Efraimnẽ enabũ maewã mati matipa bai kapukebaĩkĩ benakubaini Salisa maewãri kapukeriabaini hakia hawẽ epã jumento hawa betxiama, ana kai Saalim maewãri kapukeriabaini hawa betxiama Benjamimnẽ enabũ maiwã pakea anuri bena keyubiakubaina hawẽ epã jumenta hania betxiama

⁵ ana kai Zufẽ enabũ maewã anu hikitã hawẽ dayaru habetã benakubaunai Saulũ yuikĩ: —Txĩtũrikainãwẽ. Ẽ epa hawẽ jumentawẽ nuibiashina ha binumai nukuwẽri nui: “Benuabuki”, ishũ, nuku shinãhairaikiki— aka

⁶ hawẽ dayarũ shinãtã kemakĩ yuikĩ: —Na maewã anu Deusũ hãtxa yuishunika hiweaki. Hawara yuia imiswẽ taeshũ haki mesekĩ hawẽ hãtxa nĩkamisbuki. Hari kanãwẽ, hatũ ha baiwẽ kashũ nukũ jumenta mapua nũ betxitiru nuku yuitirumẽkainã— aka

⁷ Saulũ kemakĩ: —Haskakenã, uinũ kawe. Hakia hawa bushũ nũ inãkuĩtirumẽ? Nukũ sakuki nũ misi beshiã ana hayamawẽ taea nũ hawa inãkĩ benimawatimaki— aka

⁸ kemakĩ hawẽ dayarũ Saul yuikĩ: —Prata pei heshe karuma ẽ kapãkãki ẽ hayaki. Haratu baiwẽ nũ kai hau nuku yuinũ na prata pei heshe pishta Deusũ hãtxa yuishunika inãnũ kawe— aka

⁹ (Nukũ shenipabu hiweatiã Israelĩ enabũ Deus yukakatsi ikĩ yuikĩ: “Unãhaira uinũ kawe”, abiapaunibũ ikis unãhaira hãtxa betsawẽ kenakĩ: “Deusũ hãtxa yuishunikaki”, amisbuki.)

¹⁰ Hawẽ dayarũ hãtxa nĩkatã Saulũ yuikĩ: —Haska mĩ shinaĩ peki. Hanu kanãwẽ— aka hanu Deusũ hãtxa yuishunika hiwea anu bui

¹¹ hawẽ mae mananã anu mapekebaĩkĩ txipashbũ ũpash bi butubiranaibuki nukushũ hatu yukakĩ: —Nenu habianua nũ haki nukutirumẽ, ha unãhairakirã?— hatu wa

¹² txipashbũ kemakĩ yuikĩ: —Heẽ. Na habianua mã haki nukutiruki. Mananã meribi harishũ Deus kẽwãmisbu anushũ nami hatu pimai nukũ mae anu ma huaki. Menã hawairabaĩ haki nukuritãkãwẽ.

¹³ Mananãshũ hatu pimai kariama hikishũ hawaira benatãkãwẽ. Huriamakẽ nukunabũ piama manayumisbuki. Inabu tesẽshũ hawẽ sheni menu keyutã hawẽ kẽwãti nami huabu hamaki pitirubumaki. Hakia ha unãhaira hushũ ha piti ma hatu Deus kẽwãkĩ ma hatu pewashũkẽ tsuabura hatu kena bei itxashũ pimisbuki. Haskawẽ taea hawairabaĩritãkãwẽ, ikis hanua mã haki nukuairã— akeakeabu

¹⁴ hanua ana mapekebaini hawẽ mae hikiti shui ma kemaibũ mananã meribi harishũ Deus kẽwãmisbu anu kai Samuel hatukiri hui tashnikirani huaya

¹⁵ uatiã Saul huriama Senhor Deusũ bebũkiri Samuel yuikĩ:

¹⁶ “Meshukiri habia bariri huni betsa Benjamimnẽ enabũ maiwã pakeanua hanu mianu betsa ẽ yunushanaii. Israelĩ enabu ẽ hatu ena wani hau habũ shanẽ ibu ikũkaĩshanũ ha huni ea katushũkĩ ea meribi washũshãwẽ. Filisteu nawabũ hatu itxakawaibu bika tenekĩ Israelĩ enabũ ea yukaibu hatuwẽ nuikĩ ẽ nĩkaiwẽ taeshũ ẽ hatu merabewaya Filisteu nawabu ha hunĩ maemakĩ ea hatu putamashũshanikiki”, aka Samuelĩ nĩkashinawẽ taeshũ

¹⁷ Saul huai Samuelĩ uiãyã Senhor Deusũ yuikĩ: “Ha huni huaikiri ẽ mia hãtxa washinarã, haki. Ha huninã, enabu anua shanẽ ibushũkĩ hatu yunukubaĩshanikiki”, aka

¹⁸ mae hikiti shui anu Samuelki kematã Saulũ yukakĩ: —Mĩ ea yuitirumẽ, ha huni unãhaira harakiri hiweamẽkainã?— aka

¹⁹ kemakĩ Samuelĩ Saul yuikĩ: —Unãhairarã, habia ẽ eaki. Mananã meribi anushũ Deus kẽwãmisbu anu ebe bukãwẽ, harishũ mã ebetã piairã. Meshukiri penama hawara mĩ ea yukakatsi ikai kemakĩ ẽ mia yuishanaii. Haska watã ẽ mia nitxĩshanaii.

²⁰ Hakia ha matũ jumenta mã benushina 3 dia mã benairã, ana hawẽ nuiyamawe, ma betxishinabukirã. Ha dikabi, Israelĩ enabu habũ matu betxipaiaiburã, mã matubuki, mĩ miarã— aka

²¹ Saulũ kemakĩ yuikĩ: —Israelĩ enabu shukua betsa Benjamimnẽ enaburã, enaburiki. Nũ itxapamaki, eskarabesrã. Ha inũ, Benjamimnẽ enabu betsa ẽ epã enabu shukua nũ itxapamariki. Haskakĩ mĩ haskakiri ea yuiai?— aka

²² hawa kemama hatu iyui mati anu mapekekaĩ hanushũ piti hiwe wanibu anushũ piaibu anu Saul inũ hawẽ dayaru bitxishũ 30 hunibu namakis shanẽ ibuhairatũ tsauti anu hatu tsaumatã

²³ bawaru huni yuikĩ: —Ha nami pashkatã tari aruwe— iwanã —Ẽ mia inãshina ikis bewe— aka

²⁴ hawaira kishi hirabi bitãshũ Saul bebũ tsauãyã Samuelĩ Saul yuikĩ: —Ẽ mia arushũshina mia beshũshuki. Ẽ hatu kena beabubetã mĩ piyunũ ẽ mia hawa shinãmabia arushũshinawẽ taeshũ piriwe— aka habias shabatiã Samuelbetã Saulũ pinikiaki.

²⁵ Meribi kẽwãti hiwe anua butubirani mae anu hikitã hau hanu ushanũ hiwe sapa mamaki pewashuna

²⁶ hari Saul usha dakashinaya penama hanu ushati pepa anu Saul dakakẽ Samuelĩ kenakĩ yuikĩ: —Bestẽtã buturikirãwẽ, ẽ ma mia nitxiainã— aka Saul benitã butuaya hanushũ Saul inũ Samuel bai anu tashnimabaini

²⁷ mae kesha anu butukaĩkĩ Samuelĩ Saul yuikĩ: —Hau mĩ dayaru ha dukũ bebukainũ nitxĩwẽ. Hakia mianã, ea manayuwe, eska Deusũ ea yuishina ẽ mibe hãtxairã— aka hawẽ dayaru nitxiã bebukaini ma kakẽ