1 Samuel 3 - Kaxinawá Bíblia (BR)

Senhor Deusũ Samuel hãtxa wanikiaki, na hãtxarã

¹ Elĩ yunua Samuel Senhor Deus dayashũkũkainaya habiatiãri haska tashnimakĩ Senhor Deusũ tsua hawẽtsaĩs hãtxa waisma inũ hatiraki tsuara shabakabi namai keskawẽ hatu uĩmakĩ hawẽ hãtxa hatu yuisma

² Elĩ beru betsai ma beshushi taekĩ ana pe uiãmakẽ meshu betsatiã hawẽ dĩtu anu ma ushakẽ

³ Senhor Deuski nukuti tari hiwe pũtenibu anu hanu hawẽ hatube yubakani hãtxa aruni bau aruabu inũ hanu dĩtu tari meribi anuri bĩ nukaisma anu Samuel daka ushakẽ

⁴ hanushũ Senhor Deusũ kenakĩ: —Samuel!— aka hatũ kemakĩ: —Ẽ nenuki— itã

⁵ kushikaini Eli anu kashũ yuikĩ: —Ma ẽ huai hawamẽkaĩ ea yuiriwe— aka Elĩ kemakĩ yuikĩ: —Ẽ mia hawa kenamaki. Ushari kawe— aka hanua Samuel ka ushanũ ika dakakẽ

⁶ Senhor Deusũ ana kenakĩ: —Samuel!— aka Samuel benikaini ana Eli anu kashũ yuikĩ: —Ana ẽ huai hawamẽkaĩ ea yuiwe— aka Elĩ ana kemakĩ yuikĩ: —Ẽ bakeẽ, ẽ mia kenamaki. Usha tenẽwãma ushari kawe— aka ana ka dakakẽ

⁷ Samuelĩ Senhor Deusũ hãtxa nĩkakĩ tapĩ pewariama inũ hawa Senhor Deuskiri uĩriamawẽ taea

⁸ ma 3ki Senhor Deusũ Samuel ana kenakĩ: —Samuel!— aka hawaira bestẽtã ana Eli anu benikaĩ yuikĩ: —Ana ẽ huaii. Hawamẽkaĩ ea yuiwe— aka Senhor Deusũ Samuel kenabaũbaunai atimas Elĩ unãtã

⁹ hanushũ yuikĩ: —Ka dakashũ manatãwẽ. Senhor Deusũ mia ana kenaya kemakĩ eska yuishãwẽ: “Mĩ dayarũ ẽ mia nĩkai ea hãtxa wawe”, ashãwẽ— aka hanua ana ka Samuel dakakẽ

¹⁰ Senhor Deus hukirã Samuel kenabaũbaũshu keska wakĩ: —Samuel! Samuel!— aka hanushũ Samuelĩ kemakĩ yuikĩ: —Mĩ dayarũ ẽ mia nĩkai ea hãtxa wawe— aka

¹¹ Senhor Deusũ Samuel yuikĩ: —Israelĩ enabu hiwebaunabu anu hawara kaĩmakĩ ẽ hatu datea nĩkai e ibaũshãkanikiki.

¹² Hawenabukiri haska ẽ Eli yuima hawa binumama na habia shaba betsatiã ẽ hatu bika tenemashanaii.

¹³ Ẽ hãtxa danãkĩ hawẽ huni bake dabetũ txakabuwakĩ ekiri hãtxa txakabukĩ yuiaibũ Elĩ hawẽ bakebũ txakabuwakubainaibu unãbiakĩ hatu nemakĩ pewaismawẽ taeshũ haska ẽ bebũkiri yuishina keska wakĩ hawa heneama ẽ hatu kupikubaĩshanaii.

¹⁴ Eska hatu wakatsi ẽ hatukiri yubakashinaki. Ea daewakĩ hatũ txakabu ea buamanũ, ishũ, hatũ inabu itxapa tesẽshũ hirabi ea menukĩ keyushũkĩ inũ hawara inãkuĩ itxapawẽ ea daewabiabu Elĩ enabu hatũ txakabu ẽ hatu tere ataskama ishanaii— atã kakẽ

¹⁵ Samuel dakayukẽ penama bestẽshũ Senhor Deuski nukuti tari hiwe hikiti shui bepeã haska Senhor Deusũ yuiwana Samuelĩ shinaĩ Eli yuikatsi ikama hawẽ dateaya

¹⁶ hakia Elĩ Samuel kena hua

¹⁷ Elĩ yukakĩ yuikĩ: —Haskara Senhor Deusũ mia yuishinai hawa huneama dasibi ẽ mia yukai ea yui keyuwe. Dasibi mĩ ea yuiama betsa mĩ huneawẽ taeshũ hau Deusũ mia kupihairanũwẽ— aka

¹⁸ Senhor Deusũ hãtxa Samuelĩ Eli banabimakĩ huneama dasibi yui keyua, Elĩ nĩkatã yuikĩ: —Aa, mĩ ea peirawawa! Txanimaki. Nukũ Shanẽ Ibu kayabiki. Hawenaki. Haska betxipaiai keska hau anũwẽ— aka

¹⁹ Senhor Deusũ merabewa Samuel yumekũkaini huni ewakũkaĩkĩ haska Senhor Deus yubakani hãtxa hawa betsa heneama Samuelĩ ashũkubainaiwẽ taeshũ

²⁰ Israelĩ enabũ maiwã pakebukuã norte kesha betsa Dã anua inũ sul kesha betsa Berseba anu hiweabũ yuikĩ: “Samuel txanima Senhor Deusũ hãtxa yuishunika kayabiki”, iwanã, unanibukiaki.

²¹ Siló anu Samuel hiwekẽ habianuas Senhor Deusũ hawẽ hãtxa shabakabi Samuel ana yusĩkubainaya