1 Samuel 1 - Kaxinawá Bíblia (BR)

Aĩbu Anã bake bisma huni bake Senhor Deusũ bimanikiaki, na hãtxarã

¹ José bake Efraimnẽ shenipabũ maewã mati mananã anu mae betsa Ramataim-Zofim anu huni betsa Efraimnẽ enabu Elcana hiwenikiaki, Zufẽ enabu betsarã. Efraimnẽ enabu Zufẽ huni bake betsa Toú inikiaki. Toũ huni bake betsa Eliú inikiaki. Eliú huni bake betsa Jeroão inikiaki. Jeroãonẽ huni bake betsa Elcana inikiaki.

² Elcana aĩ dabeya inikiaki. Hawẽ ainẽ kenarã, Ana inũ Penina inibukiaki. Peninã bake bikubainaya hakia Ana bakeuma inikiaki.

³ Ano tibi Senhor Deus kushipahaira kẽwãkĩ txashuwã tesẽshũ hawẽ sheni menu keyushũtã hawẽ nami huashũ Siló anushũ Senhor Deus bushũshũ hawenabubetã pinũ ikaini Senhor Deuski nukuti tari hiwe pũtenibu anu Elcana kapaunikiaki, Senhor Deuski nukuti tari hiwe pũtenibu anu hawenabu Senhor Deusbe hãtxashunika shanẽ ibu Elĩ huni bake dabe Hofni inũ Finéias hawenabu Senhor Deusbe hatu hãtxashunika ikaibutianã.

^4-5 Siló anu kashũ Senhor Deus bebũshũ kẽwãkĩ hatu pimakĩ txashuwã nami hua Elcanã hatu nesheshũkĩ hawẽ aĩ Penina inũ hawẽ huni bakebu inũ hawẽ aĩbu bakebu kẽtxa bestitxai nami mata washũ bestibu tibi hatu inãkĩ hakia hawẽ aĩ Ana kẽtxa nami mata dabea nesheshũ inãpaunikiaki, bake bitiruma wakĩ Senhor Deusũ nemabianikẽ Elcanã Ana duawakĩ betxipaihairakinã.

⁶ Elcanã hawẽ aĩ Ana betxipaihairai uĩkĩ Peninã Ana habi hawẽ hãtxawẽ hãtxa txakabuwakĩ bake bitirumawẽ taeshũ haki kashekĩ dake wapaunikiaki.

⁷ Bari tibi Senhor Deuski nukuti tari hiwe pũtenibu anu kashũ Peninã Ana hawẽtsaĩs habi bemetukĩ dake wakubaĩmis ana aka shinaĩ kashakĩ Senhor Deus kẽwãti nami piama

⁸ haskai uĩkĩ hawẽ bene Elcanã hawẽ aĩ Ana yukakĩ: “Anã, haskai mĩ kashai? Haskai mĩ punu nukashũ piamamẽ? Ea ẽ mĩ benerã, 10 huni bakebũ mia duawaibu keska ẽ haskamamẽ?” akĩ yuinikiaki.

⁹ Besiaibũ hawẽ benebe Siló anu kashiã Senhor Deus kẽwãti nami pikĩ nushutã Ana benikainaya habianuri Senhor Deuski nukuti tari hiwe pũtenibu anu Eli hawenabu Deusbe hatu hãtxashunika hiwe dapi hawẽ tsautiki tsaushũ uiãyã

^10-11 Eli dapi hua nia nui huĩti nishma punu nukahaira kashai heneama Senhor Deus yubakĩ yuikĩ: “Senhor Deus kushipahairatũ, earã, ẽ bakeuma mĩ dayaru ẽ nuitapahairaii. Ekiri shinãkĩ huni bake mĩ ea inãtiruki. Mĩ ea bimaiwẽ taeshũ hiwekũkaĩkĩ hau mia dayashũkĩ mia duawakubaĩshanũ ha ẽ bake meribi mina ẽ mia wamakatsis ikaii. Ẽ huni bake mĩ ea bimaima hawẽ unãti watirã, tsuã hawẽ bu meshteama ishanikiki”, aki

^12-13 hãtxa txaipakĩ Anã dayuikĩ hawẽ kesha bestiwẽ hãtxakĩ shabakabi hãtxama keba keba ibestiai Elĩ uĩkĩ hawẽ hãtxa nĩkama paeã dabanẽ shinãkĩ

¹⁴ Ana yukakĩ yuikĩ: —Hawatiã mĩ paeã mĩ bepe ikai? Vinho mĩ akai heneriwe!— aka

¹⁵ Anã kemakĩ yuikĩ: —Ẽ shanẽ ibuũ, ẽ haskamaki. Vinho inũ nushuti betsa paepa ẽ akamaki. Hakia ẽ nuihairai inũ ẽ shinãhairai ẽ hawẽ mawakatsis ikĩ dasibi Senhor Deus bebũshũ ẽ yuikĩ keyui ikaii.

¹⁶ “Aĩbu txakabuki”, ikĩ ekiri shinãyamawe. Hakia ẽ punu nukai nuitapakirã haskatima ẽ Senhor Deusbe hãtxayua mĩ ea uĩkĩ aki ikaii, ẽ paeã keskarã— aka

¹⁷ Elĩ kemakĩ yuikĩ: —Haska mĩ yukashu keska Israelĩ mekenika Deusũ hau mia ashũshanũ unanuma inũ kariwe— aka

¹⁸ kemakĩ: —Haskakenã, pehairaki. Ẽ ma kaii— abaini hanua huanu hawenabuki nukutã hatubetã pi ana hawa punu nukataskama ikũkainikiaki.

¹⁹ Ushashini penama bestẽtã Senhor Deus kẽwãtã txĩtũkaini hatũ mae Ramá anu hikimabu hawẽ aĩ Ana Elcanã txutakubainaya haska Anã yukakĩ ea ashiã Senhor Deusũ nĩkaimashũ shinãkĩ

²⁰ merabewaya Anã ma bake bi tuyaima ewatã huni bake kaiã Senhor Deus ma yukakĩ ea akimawẽ taeshũ kenakĩ: “Samuelki”, anikiaki.

²¹ Hanua ano betsatiã Siló anushũ Senhor Deus kẽwãkĩ txashuwã nami Elcanã hawenabu pashkashũtã hawẽ kẽwãti nami ana pinũ, iwanã, hawẽ aĩ dabe inũ hawẽ bake dasibibu iyukatsis ikaya

²² hakia Ana kakatsi ikama hawẽ bene yuikĩ: —Ẽ mibe ana kayuamaki. Ẽ bakẽ txutxu henetanaya besti Siló anu mibetã nukũ bake iyushũ hau Senhor Deus besti dayashuni hari niti itã hiwekũkaĩshanũ ha besti nitxĩshuni ẽ kashanaii— aka

²³ hawẽ bene Elcanã kemakĩ yuikĩ: —Haska mĩ shinaĩ keska akubaĩwẽ. Txutxu heneriamakẽ habianu hiweyuwe. Haska Senhor Deusbe mĩ yubakaima ashũshãwẽ— atã hawenabu iyui Siló anu katani huaya hanu hawẽ aĩ Ana bashikuima hawẽ bake yume wakubaĩkĩ txutxu henematã

²⁴ ma txutxu henebiaima bakeishtabiakẽ Siló anu Senhor Deus nukuti tari hiwe pũtenibu anu iyukĩ 3 ina awa bake inũ shekiwã trigo 22 litro inũ bitxi sakuki vinho matari bushuĩ Siló anu hikitã

²⁵ ina awa bake bushuã Eli inãbu Senhor Deus meneshũkĩ keyuaya hanushũ hatũ huni bake Eli uĩmakĩ

²⁶ Anã Eli yuikĩ: —Ẽ Shanẽ ibuũ, bari betsatiã mĩ uiãyã ẽ eskayama mia yuinũ nĩkawe. Txanima mia dapishũ ea aĩbũ ẽ kesha bestiwẽ Senhor Deus ẽ ea akĩ yukahairai uĩkĩ ẽ paeã keska mĩ ea yuiyamarã, ẽ eaki.

²⁷ Hau ea huni bake inãnũ, iwanã, Senhor Deus yukakĩ ẽ ea aka ea ma inãyamarã, na habiaki.

²⁸ Haskawẽ taeshũ ẽ Senhor Deusbe yubakani meribi hawena ma ẽ inãkĩ nitxĩshuniyuaki, hau hawẽ hiwea hirabiwẽri Senhor Deus dayashũkũkaĩshanunã. Miã yume washũkĩ dayamashũkubaĩshãwẽ— aka nĩkatã benimai ibu wai Eli Senhor Deus bebũ maĩ beti ishũ kẽwanikiaki.