JOSHUA 9 - BUKUIT NE TILILKoyaei Israelik arorutiet bikab Gideon 1 Ak ye kingogas laitorinik tugul che kimi Jordan bitonin, emetab tulonok, ak warenget, ak ngegut tugul ne bo araraita ne o ne mi tai eng’ Lebanon, Hitik, Amorik, Kananik, Perisik, Hibik, koboto Jebusik; 2 koyumgei kobargei ak Josua koboto Israel, eng’ kabwatet agenge. 3 Ago kingogas bik che kimenyei Gibeon kit ne kiga yachi Josua Jeriko ak Ai, 4 koyai ng’alset agichek, ak koba koigei bik che kiyoktoi, ak kiib kuniok che osen, eng’ sigirokwak, ak lolotinwekab divaik che osen, che kigogerer, che kigenabanab; 5 ak kweonik che kigoosegitu che kigeginogin, che kimi kelyekwak, ak ngoroik che osen che kiilaachi; ak makatinik tugul che ki amitwogikwak ko kiga koyaamnyo ak koucho. 6 Ak kiba ole mi Josua eng’ nganaset eng’ Gilgal, ak komwachi inendet ak bikab Israel kolenji, Kibunu emet ne loo; ara anyun ongeyai arorutiet ak okwek. 7 Ak kilenji bikab Israel Hibik, Kale ng’o momenye kwenunnyo; kimuktoi ano keyai arorutiet ak okwek? 8 Ak kilenji ichek Josua, Ki otwogiguk. Ak kilenji Josua ichek, O ng’o? Ak obunu ano? 9 Ak kolenji, Bunu otwogiguk emet ne loo kot amu kainetab Jehovah Kamuktaindeng’ung’: amu kigegas etunatennyi, ak tuguk tugul che kiyai eng’ Misri, 10 ak tuguk tugul che kiyachi laitorinik aeng’ che bo Amorik, che kimi Jordan bitonin, Sihon laitoriatab Hesbon, ak Og laitoriatab Basan, ne kimi Astarot. 11 Ak kimwawech boisiekyok ak bik tugul che menyei emennyo, kole, Oib amitwogik eng’ eunekwok che bo banda, obe otorokte, ak olenji, Ki otwogikwok: ara anyun, ongeyai arorutiet ak okwek. 12 Kigiibu makatinichuchok eng’ gorikyok ko ta komi ma eng’ betut ne kiging’eetosi kebwane oling’wong’; ago nguno ogeero, kigoyaamnyo, ak koucho: 13 ak ki leelach lolotinwechu kiga kinyiit divaik, ak ogeero, kigogereris: ak kigoosegitu ngoroichuchok ak kweonikyok amu banda ne koi kot. 14 Ak kiam ichek amitwogikab bichoto, ama teeb ng’omnatet kobun kutitab Jehovah. 15 Ak kiyai kalyet Josua ak icheget, ak koyai arorutiet, kole kobagakta kosopcho: ak kiiyosiechi bounikab tuiyet. 16 Ak kingobata betusiek somogu, ko kagoyai arorutiet ak ichek, kogas kele, kaga ki bikab kokwenywa, ak komenyei kwenunywa. 17 Ak kiba lagokab Israel ak koit nganasokab bichoto eng’ betutab somok. Nganasokwak ko ki Gibeon, Kepira, Beerot, ak Kiriat-jearim. 18 Ak ma bar lagokab Israel ichek, amu kiga koyosiechi bounikab tuiyet eng’ Jehovah Kamuktaindetab Israel. Ak kiing’unyng’uny tuiyet komugul agobo bounik. 19 Ago kilenji bounik tugul tuiyet komugul, Kigiyosiechi ichek eng’ Jehovah Kamuktaindetab Israel: ara anyun, magimuchi ketwa ichek. 20 Kiyachini ko u ni, ak kebagakte kosopcho; si matebenech neregek, amu kayosiet ne kigiyosiechi. 21 Ak kilenji bounik ichek, Obagach kosopcho: kiek anyun ichek che betei kwenik ak koramjin beek tuiyet komugul ko u ye kiga mwachi bounik. 22 Kiiyokto anyun Josua keguur ichek, ak kong’alalji kolenji, Amu nee si ong’alech, ole, Kimenye ole loo mising’ eng’ okwek; ago kaga omenye kwenunnyo? 23 Ara anyun, o chubotin, amagoi betyo eng’ okwek che otwogik, che betei kwenik ak che ramei beek che bo gotab Kamuktaindennyu. 24 Ak kiwolji ichek Josua kolenji, Amu kigimwachi otwogiguk iman, ko u ye king’at Jehovah Kamuktaindeng’ung’ otwogindennyi Musa kogonok emet tugul ak kobar eng’ taing’wong’ bik tugul che menyei emoni; kigiweisie anyun mising’ agobo sobonwekyok amu okwek, keyai anyun ko u nito. 25 Ara anyun, keero, kimi euneguk: ko u ye igeere ile mie eng’ inye ak ko bo iman, iyaiywech ko u noto. 26 Ak kiyachi anyun ko u noto, ak kosor eng’ eunekab lagokab Israel, si mabar. 27 Ak kiyai Josua ichek eng’ betunoto koek che betei kwenik ak koramjin beek tuiyet ak kaptisisietab Jehovah, agoi ra, eng’ ole leweni inendet. |