EZEKIEL 17 - BUKUIT NE TILIL

Kalewenet agobo kipsichinik aeng’ ak ketitab sabibuk ak kit ne iboru

¹ Kinyonja ng’olyotab Jehovah, kolenja,

² Ee weritab chi, mwa tangochet, ak imwachi kalewenet gotab Israel;

³ ilenji, Mwaei Kiptaiyat Jehovah ko u ni kole; Kinyonji Lebanon kipsichit ne no ne tinyei kebebaik che eechen ak ko koen, che nyiitat kororik che kitinyei saleiywek che ter, ak koib walitab tarakwet:

⁴ ak kieb temet ne ki tabanu barak ne kinamgei ak che ng’orng’oren, ak koib kwo emetab mung’aret; kiinde nganasetab chemung’arainik.

⁵ Kiib kogeny keswek che bo emonoto, ak kwo kogolji ng’ung’unyek che akwaen; kilechi ole negite beek che chang’; kimin ko u koibeiyot.

⁶ Ak kibit ak koek ketitab sabibuk ne tebeesitu ne magoitu, ne arung’jingei temenikyik, ak komi tigitikyik kurerennyi: kiek anyun ketitab sabibuk, ak kosich temenik, ak kong’atyo.

⁷ Kimi kogeny kipsichit age ne o ne kitinyei kebebaik che eechen ak kororik che chang’: ak ogeero, kiaruny ketito bo sabibuk tigitikyik, kotokyi kipsichinoto, ak kowakta temenikyik kotokyigei inendet, eng’ kererjosiek ole kiga kiminji, kole si kobise beek kipsichinoto.

⁸ Kiga kiminji ng’ung’unyek che miachen eng’ ole negite beek che chang’, si kobiit kowakta temenik, si kobiit koi logoek, si kobiit koek ketit ne kararan ne bo sabibuk.

⁹ Mwa inye ile, Mwaei Kiptaiyat Jehovah ko u ni kole: Tos mieitu? Tos maituti kipsichinoto tigitikyik, ak koeb logoekyik, si kobiit kores, si kobiit koresyo sogekyik tugul che ng’orng’or; agot ngo mami kimnatet ne wo anan bik che chang’ che itutu?

¹⁰ Ee, ogeero, tos mieitu ye kagemin? Tos maresei tugul, ye usyi usonetab kong’asis? Resei eng’ kererjosiek ole kibite.

¹¹ Kinyonja kogeny ng’olyotab Jehovah kolenja,

¹² Mwachi anyun got ne ngeleliot, ilenji, Tos mongen ole teptoi tuguchu? Mwachi ichek, ilenji, Ogeero, kigonyo Jerusalem laitoriatab Babulon, ak koluul laitoriandennyi, ak bounikyik, ak komut ichek kobwa Babulon.

¹³ Ak kiluul iyotetab laitoriat ak koyomisgei koboto inendet: kibirji kogeny inendet eng’ kayosiet, ak komut bik che kimen che bo emet:

¹⁴ kole, si kobiit konyeratit bounatet, si ma imuch koeetgei, ago si kobiit kotonon ye ribei kayomisennyi.

¹⁵ Ago kiingelelji inendet amu kiiyokto tononjinikyik koba Misri, si kobiit kogochi inendet mbartanyisiek ak bik che chang’. Tos kiberuri? Tos chilil inendet ne yaei tuguk che u choto? Tos but kayomiset, ak kochilil?

¹⁶ Mwaei Kiptaiyat Jehovah kole, Ko u ye asobe, meei inendet iman eng’ ole menyei laitoriat ne kiindoi inendet koek laitoriat, ne kisas kayosiennyi, ak kibut kayomisennyi, meei koboto inendet eng’ Babulon.

¹⁷ Ama tilei kiy eng’ inendet Parao koboto lugennyi ne kim, ak kweanet ne o, eng’ luget, ye irurugot ng’ung’unyek koek tulonok ak koteech irimoik, si kobar bik che chang’.

¹⁸ Amu kigosas kayosiet kobut arorutiet, ak ogeero, kigonde eunnyi ago kigoyai tuguchoto tugul; machilili.

¹⁹ Mwaei anyun Kiptaiyat Jehovah ko u ni kole: Ko u ye asobe, aipchini iman metinnyi kayosiennyu ne kigosas ak kayomisennyu ne kigobut.

²⁰ Ak aiitochini mestennyu inendet, ak konam mestennyu inendet ak amut inendet kwo Babulon, ak ager kong’ inendet eng’ oloto amu ngelelnatet ne kiingelelja.

²¹ Ak kebare rotwetab chok bikyik tugul che kimweei eng’ kweanaikyik tugul, ak kiseerat che ng’etu koba usonet age tugul: si onai ole a Jehovah ne koamwa ng’olyondonito.

²² Mwaei Kiptaiyat Jehovah ko u ni kole: Aibe kogeny walitab tarakwet ne koi ak amin; ak aeb temet ne ng’arng’ar, eng’ temenikyik che ng’orng’or che tabanu barak, ak aminji tulwet ne koi ne toogunot.

²³ Aminjini tulwet ne koi ne bo Israel: ak kowakta, ak koi logoek, ak koek tarakwet ne mie: ak komeny kelunnyi taritik alak tugul che tirirendos; menyei taritichoto uruetab temenikyik.

²⁴ Si konai ketik tugul che bo timin kole, A Jehovah ne kiachooru ketit ne koi, ak aeet ketit ne ming’in, ak ayaam ketit ne tuon, ak agochi ketit ne yaamat kotunen: kaamwa ane Jehovah, ak ayae.