AMDOINDET 8 - BUKUIT NE TILIL

Kiruogutikab iman agobo ng’omnatet ak bounatet

¹ Ng’o ne kergei ak chito ne ng’om? Ak ng’o ne ingen kaweegetab kiy? Igochin ng’omnatetab chito togennyi koluu, ak kowalak uuindab togennyi.

² Aborun ale, Rib ng’atutietab laitoriat, ak ibwat ile kiiyosye eng’ Kamuktaindet.

³ Amesib iwe eng’ tainnyi; ameyai kiy ne ya kotugul: amu yaei laitoriat kiy age tugul ne iboiboegei.

⁴ Amu tinyei kimnatet ng’olyotab laitoriat; ak ng’o ne imuchi kolenji inendet, Iyae nee?

⁵ Manaei kiy ne ya age tugul ne ribei ng’atutiet; ak ibestos muguleldab chito ne ng’om betusiek ak kiruoget:

⁶ amu mi betut ak kiruoget ne bo ng’olyot age tugul; amu o nyalilda ne tinyei chito eng’ choto:

⁷ amu manaei kit ne biitu; amu tos ng’o ne imuchi komwachi inendet ole biitundoi kioto?

⁸ Mami chi ne tinyei kimnatet eng’ tamirmiriet korany tamirmiriet; ama tinyei kimnatet koboi betutab meet; ama mi undaet eng’ lugonoto: ama soru yaitiet inendet ne igochingei yaitionoto.

⁹ Kiageer chuto tugul, kiagiilji muguleldanyu boisiet age tugul ne kiyaei eng’ kureretab asista: mitei betut ne tinyei chito age kimnatet koboi age si kogochinegei nyalilda.

¹⁰ Ak kiageer ketubei kiptengeginik, ak kiba kererit; ak kiba eng’ ole tilil bik che kiyai ne mie, ak kigiutie ichek eng’ nganaset: buch nito agine.

¹¹ Amu ma sib kiruokyin boisiet ne ya, nyoru anyun mugulelwekab bik maget koyai yaitiet.

¹² Agot ngo yai kiptengekyot yaitiet konyil bogol, ak kotesak betusiekyik, angen ui tugul ale, mieitu eng’ ichek che iywei Kamuktaindet, che iyweisiei eng’ tainnyi:

¹³ ago mamieitu eng’ kiptengeginik, ama tesoksei betusiekyik che u uruet; amu maiyweisiei eng’ taitab Kamuktaindet.

¹⁴ Mi tangoita ne yaoksei eng’ ng’ony; amu mi bik che bo iman, che biityin kiy ko u boisionikab kiptengeginik; komi bik che yaach che biityin kiy ko u boisionikab che bo iman: kiamwa ale, tangoita nito agine.

¹⁵ Kialosu anyun boiboiyet, amu matinyei chi kiy ne mie eng’ kureretab asista kobate koam, ak koeei, ak kobaibait: amu tebyei noto koboto inendet eng’ boisiennyi, eng’ betusiek tugul che bo sobennyi, che kiigochi Kamuktaindet inendet eng’ kureretab asista.

¹⁶ Ye kiagiil muguleldanyu konai ng’omnatet, ak ageer boisiet ne kiyaei eng’ ng’ony; (amu mi ne mainuuchi bet anan kemoi:)

¹⁷ kiageer anyun boisionik tugul che bo Kamuktaindet, ale maimuchi chi konai boisiet ne kiyaei eng’ kureretab asista: amu agot ngogiilgei chito ne tai, kole kocheng’, ko manyoru; ee, agot ngo len chito ne ng’om konai, ko maimuchi konyor.