ויקרא 10:3 - Masoretic Text 1524

³ ויאמר משׁה אל אהרן הוא אשׁר דבר יהוה לאמר בקרבי אקדשׁ ועל פני כל העם אכבד וידם אהרן׃

תנ"ך וברית חדשה בתרגום מודני

³ וַיֹּ֨אמֶר מֹשֶׁ֜ה אֶֽל־אַהֲרֹ֗ן הוּא֩ אֲשֶׁר־דִּבֶּ֨ר יְהוָ֤ה ׀ לֵאמֹר֙ בִּקְרֹבַ֣י אֶקָּדֵ֔שׁ וְעַל־פְּנֵ֥י כָל־הָעָ֖ם אֶכָּבֵ֑ד וַיִּדֹּ֖ם אַהֲרֹֽן׃

Westminster Leningrad Codex

³ וַיֹּ֨אמֶר מֹשֶׁ֜ה אֶֽל־אַהֲרֹ֗ן הוּא֩ אֲשֶׁר־דִּבֶּ֨ר יְהוָ֤ה ׀ לֵאמֹר֙ בִּקְרֹבַ֣י אֶקָּדֵ֔שׁ וְעַל־פְּנֵ֥י כָל־הָעָ֖ם אֶכָּבֵ֑ד וַיִּדֹּ֖ם אַהֲרֹֽן׃

תנ"ך וברית חדשה בתרגום דליטש

³ וַיֹּ֨אמֶר מֹשֶׁ֜ה אֶֽל־אַהֲרֹ֗ן הוּא֩ אֲשֶׁר־דִּבֶּ֨ר יְהוָ֤ה ׀ לֵאמֹר֙ בִּקְרֹבַ֣י אֶקָּדֵ֔שׁ וְעַל־פְּנֵ֥י כָל־הָעָ֖ם אֶכָּבֵ֑ד וַיִּדֹּ֖ם אַהֲרֹֽן׃

ויקרא 10:3 הפניות הצלבה

בראשית 18:25

חללה לך מעשׂת כדבר הזה להמית צדיק עם רשׁע והיה כצדיק כרשׁע חללה לך השׁפט כל הארץ לא יעשׂה משׁפט׃

איוב 2:10

ויאמר אליה כדבר אחת הנבלות תדברי גם את הטוב נקבל מאת האלהים ואת הרע לא נקבל בכל זאת לא חטא איוב בשׂפתיו׃

תהלים 119:120

סמר מפחדך בשׂרי וממשׁפטיך יראתי׃

תהלים 148:14

וירם קרן לעמו תהלה לכל חסידיו לבני ישׂראל עם קרבו הללו יה׃

תהלים 39:10

(39:11) הסר מעלי נגעך מתגרת ידך אני כליתי׃

תהלים 39:9

(39:10) נאלמתי לא אפתח פי כי אתה עשׂית׃

תהלים 46:10

(46:11) הרפו ודעו כי אנכי אלהים ארום בגוים ארום בארץ׃

תהלים 89:7

(89:8) אל נערץ בסוד קדשׁים רבה ונורא על כל סביביו׃

תהלים 93:5

עדתיך נאמנו מאד לביתך נאוה קדשׁ יהוה לארך ימים׃

שמות 14:17

ואני הנני מחזק את לב מצרים ויבאו אחריהם ואכבדה בפרעה ובכל חילו ברכבו ובפרשׁיו׃

שמות 14:4

וחזקתי את לב פרעה ורדף אחריהם ואכבדה בפרעה ובכל חילו וידעו מצרים כי אני יהוה ויעשׂו כן׃

שמות 19:22

וגם הכהנים הנגשׁים אל יהוה יתקדשׁו פן יפרץ בהם יהוה׃

שמות 19:24

ויאמר אליו יהוה לך רד ועלית אתה ואהרן עמך והכהנים והעם אל יהרסו לעלת אל יהוה פן יפרץ׃

שמות 30:30

ואת אהרן ואת בניו תמשׁח וקדשׁת אתם לכהן׃

ישעיה 39:8

ויאמר חזקיהו אל ישׁעיהו טוב דבר יהוה אשׁר דברת ויאמר כי יהיה שׁלום ואמת בימי׃

ישעיה 49:3

ויאמר לי עבדי אתה ישׂראל אשׁר בך אתפאר׃

ישעיה 52:11

סורו סורו צאו משׁם טמא אל תגעו צאו מתוכה הברו נשׂאי כלי יהוה׃

יחזקאל 20:41

בריח ניחח ארצה אתכם בהוציאי אתכם מן העמים וקבצתי אתכם מן הארצות אשׁר נפצתם בם ונקדשׁתי בכם לעיני הגוים׃

יחזקאל 28:22

ואמרת כה אמר אדני יהוה הנני עליך צידון ונכבדתי בתוכך וידעו כי אני יהוה בעשׂותי בה שׁפטים ונקדשׁתי׃

יחזקאל 38:16

ועלית על עמי ישׂראל כענן לכסות הארץ באחרית הימים תהיה והבאותיך על ארצי למען דעת הגוים אתי בהקדשׁי בך לעיניהם גוג׃

יחזקאל 40:46

והלשׁכה אשׁר פניה דרך הצפון לכהנים שׁמרי משׁמרת המזבח המה בני צדוק הקרבים מבני לוי אל יהוה לשׁרתו׃

יחזקאל 42:13

ויאמר אלי לשׁכות הצפון לשׁכות הדרום אשׁר אל פני הגזרה הנה לשׁכות הקדשׁ אשׁר יאכלו שׁם הכהנים אשׁר קרובים ליהוה קדשׁי הקדשׁים שׁם יניחו קדשׁי הקדשׁים והמנחה והחטאת והאשׁם כי המקום קדשׁ׃

ויקרא 21:15

ולא יחלל זרעו בעמיו כי אני יהוה מקדשׁו׃

ויקרא 21:17

דבר אל אהרן לאמר אישׁ מזרעך לדרתם אשׁר יהיה בו מום לא יקרב להקריב לחם אלהיו׃

ויקרא 21:21

כל אישׁ אשׁר בו מום מזרע אהרן הכהן לא יגשׁ להקריב את אשׁי יהוה מום בו את לחם אלהיו לא יגשׁ להקריב׃

ויקרא 21:6

קדשׁים יהיו לאלהיהם ולא יחללו שׁם אלהיהם כי את אשׁי יהוה לחם אלהיהם הם מקריבם והיו קדשׁ׃

ויקרא 21:8

וקדשׁתו כי את לחם אלהיך הוא מקריב קדשׁ יהיה לך כי קדושׁ אני יהוה מקדשׁכם׃

ויקרא 22:9

ושׁמרו את משׁמרתי ולא ישׂאו עליו חטא ומתו בו כי יחללהו אני יהוה מקדשׁם׃

ויקרא 8:35

ופתח אהל מועד תשׁבו יומם ולילה שׁבעת ימים ושׁמרתם את משׁמרת יהוה ולא תמותו כי כן צויתי׃

במדבר 16:5

וידבר אל קרח ואל כל עדתו לאמר בקר וידע יהוה את אשׁר לו ואת הקדושׁ והקריב אליו ואת אשׁר יבחר בו יקריב אליו׃

במדבר 20:12

ויאמר יהוה אל משׁה ואל אהרן יען לא האמנתם בי להקדישׁני לעיני בני ישׂראל לכן לא תביאו את הקהל הזה אל הארץ אשׁר נתתי׃

דברים 32:51

על אשׁר מעלתם בי בתוך בני ישׂראל במי מריבת קדשׁ מדבר צן על אשׁר לא קדשׁתם אותי בתוך בני ישׂראל׃

שמואל א 2:30

לכן נאם יהוה אלהי ישׂראל אמור אמרתי ביתך ובית אביך יתהלכו לפני עד עולם ועתה נאם יהוה חלילה לי כי מכבדי אכבד ובזי יקלו׃

שמואל א 3:18

ויגד לו שׁמואל את כל הדברים ולא כחד ממנו ויאמר יהוה הוא הטוב בעינו יעשׂה׃

שמואל א 6:20

ויאמרו אנשׁי בית שׁמשׁ מי יוכל לעמד לפני יהוה האלהים הקדושׁ הזה ואל מי יעלה מעלינו׃