תהלים 146 - Masoretic Text 1524

¹ הללו יה הללי נפשׁי את יהוה׃

² אהללה יהוה בחיי אזמרה לאלהי בעודי׃

³ אל תבטחו בנדיבים בבן אדם שׁאין לו תשׁועה׃

⁴ תצא רוחו ישׁב לאדמתו ביום ההוא אבדו עשׁתנתיו׃

⁵ אשׁרי שׁאל יעקב בעזרו שׂברו על יהוה אלהיו׃

⁶ עשׂה שׁמים וארץ את הים ואת כל אשׁר בם השׁמר אמת לעולם׃

⁷ עשׂה משׁפט לעשׁוקים נתן לחם לרעבים יהוה מתיר אסורים׃

⁸ יהוה פקח עורים יהוה זקף כפופים יהוה אהב צדיקים׃

⁹ יהוה שׁמר את גרים יתום ואלמנה יעודד ודרך רשׁעים יעות׃

¹⁰ ימלך יהוה לעולם אלהיך ציון לדר ודר הללו יה׃