115 Umi versíkulo bíblico jastudia vaʼerã

Ñandejára Ñe’ẽ he’i, opavave Espíritu Santo rupi ojegueraháva ha’eha Ñandejára ra’ykuéra. Biblia rehesa’ỹijo hag̃ua tekotevẽnte Espíritu Santo nepytyvõ, ha upéva reheve retopávo, he’i jeikuaa ha’e peteĩ vy’a guasu, ára ha pyhare reikovahína ipype. Opavave ta’yrakuéra oikuaa itúva ñe’ẽ, ha’ehaicha avei nde rehechakuaáta Ñandejára ne ru ramo, ikatúta nembo’e he’iha rupi. Ko’ã ára vaietévape jaikóva niko iñimportanteve jahechakuaa porãve Ñandejára, ha upépe ae retopáta arandupy ha akãporã reikotevẽva reheve rejesakuaa porã hag̃ua.

Umi Bereaygua ipy’a porãve Tesalonicayguakuéragui, ha ojapysaka porã Páblo ha Sílas ñe’ẽ rehe, ha kyre’ỹme oipyguara (oitypeka) meme árape Ñanderuete kuatiañe’ẽme añetépa Páblo ha Sílas ñe’ẽ.

Opaichagua ñe’ẽ ojehaiukáva Ñanderuete Pytu Porãite rupi, iporã oporombo’e ha oporomyatyrõ hag̃ua, oporomopotĩ ha oporombohekombo’e hag̃ua pe heko peguáva rehe, ikatu hag̃ua Hesu Crísto reheguáva oiko hekópe ha ikatupyry hag̃ua opaichagua tembiapo porãme.

Eñeha’ãmba reiko hag̃ua hekópe Ñanderuete renondépe, hembijokuái porãvaicha natekotevẽi reguerotĩ, emyasãi hekópe uvei Ñanderuete ñe’ẽporãite (evangélio).

Ñanderuete ñe’ẽ oikove, ipu’aka ha hakuave opaite kyse haimbe jováivagui, ha oike ánga ha pytu porã pa’ũ meve, omboja’o peve kangue joajuha ha karaku, ombojovake hag̃ua avei ñane pensamientokuéra ha ñande py’apy rembipota.

Peẽ peitypeka (peipyguara, peheka) Ñanderuete kuatiañe’ẽre, hi’ag̃ui peẽme pejohutaha ipype pe tekove tapia g̃uarãva, ha añetehápe Ñanderuete kuatiañe’ẽ che rechahare voi.

Temiendy ningo ne ñe’ẽ che pykuérape g̃uarã, ha mba’e ohesapéva che rape.

ne mitã ára guive reikuaa voi Ñanderuete kuatiañe’ẽ, kóva nemoaranduve rehóvo rejesalva hag̃ua pe jerovia rupi Hesu Crísto rehe.

Ñanderuete voi ome’ẽ arandu, ha ijurúgui ou akãguapy ha akãporã.

Upérõ Hesu oikuaauka hemimbo’ekuérape mba’épa he’ise umi ñe’ẽ oñe’ẽva hese Ñanderuete kuatiañe’ẽme,

Pejerure ha oñeme’ẽva’erã peẽme; peheka ha pejohuva’erã; pembota ha ojepe’ava’erã peẽme. Upe ojerurévape oñeme’ẽva’erã; upe ohekáva ojohuva’erã; ha upe ombotávape ojepe’ava’erã (pe okẽ).

Opaichagua ñe’ẽ ojehaiukáva Ñanderuete Pytu Porãite rupi, iporã oporombo’e ha oporomyatyrõ hag̃ua, oporomopotĩ ha oporombohekombo’e hag̃ua pe heko peguáva rehe,

Ha anítei pende reko ojogua kuimba’e térã kuña ko’ag̃agua rekópe, upéva rãngue peheja pende reko oñemoambue hag̃ua ohóvo (Pytu Porãmbáva rupi) pende py’apy rembipotapype, peikuaa hag̃ua Ñanderuete rembipota iporãha, hekópe ha oporombohorýva.

Che aju peve, emoñe’ẽ pe kuatiañe’ẽ, emoangapyhy, emokyre’ỹ ha ehekombo’e (hermanokuérape).

Che hermanokuéra pepensa avei opaite añetegua rehe, opaite mba’e oñemomba’eguasukuaáva rehe, opaite heko peguáva rehe, opaite justícia rehe, opaite ipotĩva rehe, opaite ipy’a porãva rehe, opaite ñe’ẽ ñemyasãi porã rehe, opaite heko porãva rehe, opaite ñemboete rehe.

Ko’ã kuña ko’ãva tapia oikuaase mba’e pyahu, araka’eve katu ndohupitýi ni ndoikuaái pe añetegua.

Che py’apýpe añongatupa ne ñe’ẽ, ani hag̃ua añemohembiapo vai ne renondépe.

Pejapyhy avei pene akã mo’ãha, kóva he’ise pejejokóke pende salvacionrã rehe, ha pejapyhy pe kyse puku, kóva he’ise peñemo’ã ha pendyry Ñanderuete ñe’ẽ (Bíblia) reheve umi oñemoĩvare penderehe.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Ha Hesu ombohovái ichupekuéra: Pejavy, ndapeikuaáigui Ñanderuete kuatiañe’ẽ ni Ñanderuete pu’aka.

Hesu Crísto ñe’ẽ tomyenyhẽ pende py’apy opaite árape peñohekombo’e opaite arandúpe ha peñomokyre’ỹ Salmokuéra, purahéi ha ñembo’e rupi, ha peagradece Ñanderuetépe pende py’aite guive.

Ovy’aite ningo upe kuimba’e ndoikóiva tekove ñaña ñe’ẽ rapykuéri ha ndoikóiva hembiapo vaíva rape rehe, ha ndoguapýiva hapicha oñembohorýva apytépe. Ovy’aite ningo upe ojohúva py’aguapy Ñanderuete ñe’ẽme ha hese ojepy’amongetáva ára ha pyharépe.

Mitã kambúicha peheka kamby oñembojehe’a’ỹva, kóva ningo Ñanderuete ñe’ẽ oñembojehe’a’ỹva, ha Pytu Porãmbáva pu’aka rupi pende jerovia okakuaa porãve hag̃ua pejesalva peve.

Aníke peñembotavy pendejupe. Avave ndaikatúi oñembohory rei Ñanderuete rehe. Opaite umi mba’e ñande ñañotỹva, katuete ñamono’õ jevyva’erã avei. Upe oñotỹva ijyvyarigua rete (reko) rembipota vaípe g̃uarã, ijyvy arigua rete rembipota vaígui omono’õva’erã ñembyai; upe oñotỹva Pytu Porãmbávape g̃uarã, Pytu Porãmbávagui omono’õva’erã tekove tapia g̃uarãva.

Pe iñakãguapýva ohupity arandu; ha umi iñarandúva oheka akãguapy porã.

Peheka raẽ Ñanderuete rembipota ha hetãguasu, ha opaite ko’ã mba’e oñeme’ẽmbáta peẽme.

Opaite umi mba’e yma guive oĩva Ñanderuete kuatiañe’ẽme ojehaiva’ekue ñanembo’e hag̃ua, okakuaa hag̃ua ñane paciéncia ha ñanemokyre’ỹ hag̃ua iñemoangapyhy rupi, aipórõ jajejoko hatãkena pe esperánza rehe.

Cheresape’amína, tama’ẽ ne mba’e techapyrãva rehe oĩva guive ne rembiapoukapýpe.

Pe arandu nepytyvõvéta pirapirégui, omoingovégui ijárape.

Upévare upe oikóva Hesu Cristopype oñemoingo pyahúma, oñemboheko ambuéma (nacimiénto pyahu), pe teko tuja opáma (pe teko tuja nomandavéima hekovépe). Peikuaa porãke, pe teko pyahu oñepyrũma hague.

upévare ñañeha’ãmba ñañomokyre’ỹ ha jajohayhu hag̃ua, jajapove jahávo tembiapo porã. Ani hag̃ua japoi ñande iglésiagui, oĩ háicha umi ojapóva, ñañomokyre’ỹ uvei, pehechámagui oñemoag̃uiha ohóvo pe ára Hesu Crísto ou jevy hag̃ua.

Ha pehupity haguéicha pe Pytu Porãmbáva ñemona Ñanderuetégui pepyta hatãkena ipype, ha napeikotevẽvéima avave penembo’e. Pe Pytu Porãmbáva voi ningo penembo’e opaite mba’e rehe ha hendive oĩ pe añetegua, ha Ha’e ndaijapúi; Ha’e penembo’e haguéicha pévape pepyta, peñemopeteĩvo Hesu Crísto ndive.

Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.

Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.

Che pensamientokuéra ndaha’éi pene pensamiéntoicha ha pende rapekuéra ndaha’éi ku che rapéicha, he’i pende Ruete. Pe yvága ijyvateve háicha yvýgui, péicha hína che rapekuéra ijyvateve pende rapégui, ha che pensamiénto pene pensamiéntogui.

Eme’ẽmína chéve akã porã ha eñangarekomína cherehe ajapo hag̃ua che py’aite guive ne rembiapoukapy.

Upévare peñemokyre’ỹ pembojoapy hag̃ua pende jerovia rehe teko porã, pende reko porã rehe kuaapy arandu, pende kuaapy arandu rehe jejokokuaa, pende jejokokuaa rehe paciéncia, penepaciéncia rehe ñemomirĩ (jejapo’i), pene ñemomirĩ rehe hermáno mborayhu, pene hermáno mborayhu rehe Ñanderuete mborayhu añeteguáva. Ko’ã mba’e ko’ãva oĩ ramo pendepype ha okakuaave ramo ohóvo pende rekovépe, peẽ ndapeiko reimo’ãi ha ndapeikuaa reimo’ãi Hesu Crístope, ha pende rekovépe hi’áta katuete pe Pytu Porãmbáva yva.

Upévare tapeho ha peñemohemimbo’e opaite tetãnguérape, ha pebautiza ichupekuéra Túva, Ta’ýra ha Pytu Porãmbáva rérape. Ha oiko peteĩ yvy ryryiguasu, ha peteĩ Ñanderuete yvága rembiguái oguejy yvágagui ha oipe’a pe ita, ha oguapy hi’ári. Ha pembo’e ichupekuéra ojapo hag̃ua opaite mba’e Che ha’eva’ekue peẽme pejapo hag̃ua. Ha peikuaa porãke, Che aĩha penendive opaite ára opa peve ko ára atyguasu (ko múndo).

Pe jerovia onace pe evangéliogui, ha pe evangélio ou Hesu Crísto ñe’ẽgui, (Isaías 53).

Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.

Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia, ñemomirĩ, jejokokuaa. Moises rembiapoukapykuéra katu noñemoĩri ko’ã Pytu Porãmbáva’a rehe.

Emoĩ Ñanderuete pópe ne rembiaporã ha osẽ porãva’erã.

Opaite mba’e ikatu chéve g̃uarã, Ha’e chemombaretégui.

Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

Peikove jevy ramo (penace jevy ramo) Hesu Crísto ndive, peheka umi mba’e yvateguáva, Hesu Crísto oguapyhápe Ñanderuete akatúape. pemonde haguére pe tekove pyahu, kóva ningo oñembopyahuve ohóvo ha oñembojojave ohóvo ñande apohare reko rehe ha peikuaa porãve pehóvo ichupe, peikove hag̃ua avei Hesu Crísto rekópe. Oĩháme ko tekove reko pyahu ndojuavýi ojuehegui Greciaygua ha Judaygua, ipire’i oñekytĩ’óva (oñecircuncidáva) ha noñekytĩ’óiva, tetã ambueygua ha ka’aguygua (escítas), tembiguái ha jára; Hesu Crísto oĩ hag̃ua opaite mba’épe ha opavave rekovépe. Ñanderuete pendeporavo, penemboheko potĩ ha penderayhúgui peñemonde jeporiahuvereko mborayhu reheve, py’a porã, ñemomirĩ, pochykuaa’ỹ, paciéncia. Pejogueropu’aka ha peñoperdona, oime ramo oñemohembiapo vaíva; Hesu Crísto peneperdona haguéicha upéicha peperdona avei pende rapichápe. Opaite ko’ã mba’e ári pemonde mborayhu, péva ningo ombojoaju porã añetetehápe. Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe. Hesu Crísto ñe’ẽ tomyenyhẽ pende py’apy opaite árape peñohekombo’e opaite arandúpe ha peñomokyre’ỹ Salmokuéra, purahéi ha ñembo’e rupi, ha peagradece Ñanderuetépe pende py’aite guive. Ha opaite mba’e pejapóva guive pene ñe’ẽ térã pene rembiapo rupi, pejapo Ñandejára Hesu Crísto rérape ichuperõguáicha ha peagradece Ñandejára Ñanderuetépe Hesu Crísto rupi. Pe tembireko iñe’ẽrenduva’erã iménape, ija háicha Hesu Crísto reheguávape. Peẽ ména pehayhu añetehápe pene rembirekópe, ha anítei pembopy’aro ichupekuéra. Peheka umi mba’e yvága peguáva, ani yvy ariguáva.

Pe ñemoñe’ẽ paha oñehenduva’ekue ningo kóa: Ekyhyje Ñanderuetégui, ha ejapo hembiapoukapykuéra; péva hína pe iporãvéva kuimba’e ha kuñakuérape g̃uarã. Ñanderuete ombojovakéta opaichagua yvyarigua rembiapo, ta’iporã térã ta’ivai, ñemiháme ramojepe ojejaporaka’e ko’ã mba’e.

Upévare che hermanokuéra, che ajerure asy peẽme, Ñanderuete poriahuvereko rehe, peme’ẽmba pende rekove Ñanderuetépe g̃uarã peteĩ kuave’ẽmby oikovévaicha, ipotĩva ha ombohorýva ichupe, kóva ningo pe cúlto añeteguáva ñame’ẽkuaáva Ñanderuetépe. Pejohayhu oñohermánoicha, pejo’apo mba’e ramo, péva he’ise emomba’eve ne hermánope ndejehegui voi. Ani peneate’ỹ pene rembiapópe, peñemokyre’ỹ katu pende pytu porãme, ha pejapopa Hesu Crísto he’íva guive peẽme. Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei. Peipytyvõ hermanokuérape hemikotevẽme, peporombohupa porãkena. Pehovasa umi ndaija’éiva penderehe, pehovasa ha ani pemaldeci. Pevy’a umi ovy’áva ndive, ha pejahe’o umi ojahe’óva ndive. Peiko peteĩ py’ápe oñondive; ani peñembotuicha, peñemomirĩ uvei; ani pejeguereko iñarandúva ramo. Ani pemyengovia avavépe ivaíva ivaívare, peñeha’ãmba katu pejapo hag̃ua mba’e iporãva opavavépe g̃uarã. Peñeha’ãmbáke, ijáva guive peẽme, peiko hag̃ua py’aguapýpe opavave ndive. Che hermanokuéra pohayhúva, ani peñevenga peẽ voi pende rapicha rehe, pemoĩmba katu Ñanderuete pópe. Ojehai voi Ñanderuete kuatiañe’ẽme: Che avengáta ha amyengoviáta opavave rembiapo vaikue, (Deuteronómio 32,35). Ha anítei pende reko ojogua kuimba’e térã kuña ko’ag̃agua rekópe, upéva rãngue peheja pende reko oñemoambue hag̃ua ohóvo (Pytu Porãmbáva rupi) pende py’apy rembipotapype, peikuaa hag̃ua Ñanderuete rembipota iporãha, hekópe ha oporombohorýva.

Ndapeikuaái piko umi oñaníva carrerahápe oñanimba joa añete ningo, peteĩmínte oñeme’ẽva’erã katu pe oñaníva repy (prémio), upévare peñani porã pehupity hag̃ua avei pe oñaníva repy. Umi oñeha’ãmbáva ojejoko heta mba’égui ohupity hag̃uánte peteĩ yvyra rogue ñopẽmbyre iñakã rehegua jeguaka ramo, ha pya’e oñembyaíva; ñandéve g̃uarã katu oñembosako’i peteĩ akã rehegua ñopẽmbyre jeguaka oñembyai’ỹva araka’eve. Upévare che añani ramo, nañani reíri, ha añorãirõ ramo, nainupãi yvytu rei rehe, péicha che añeha’ãmba ajoko hag̃ua che rete heta mba’égui, ha’e opyta hag̃ua che rembipota poguýpe, ani hag̃ua che ambo’e rire ambuekuérape oñeha’ã porãmba hag̃ua, ha che voi apia Hesu Crísto rapégui.

Che aha’ãrõ Ñanderuete chepytyvõ hag̃ua, che ánga oha’ãrõ ne ñe’ẽ ojejapopa hag̃ua hekoitépe.

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.

Peñemokyre’ỹke Ñanderuete pu’akaguasu rupi, peẽ penembarete hag̃ua. Peiporu hekópe Ñanderuete ñorãirõ rembiporukuéra peñemoĩ hag̃ua Satana rehe, ha’e pende reitységui iñuhãme.

Pe kyhyje Ñanderuetégui ningo pe arandu rapo, ha akãguapy rupi ojekuaáma heko potĩva.

Jerovia ningo he’ise jahupitytaha katuete umi mba’e ñaha’ãrõvañaína, ha he’ise avei ndajahechái ramojepe mba’eve, nañandepy’a mokõiri, jaikuaa porãgui (umi mba’e Ha’e oprometemava’ekue, katuete oikotaha avei).

Chembo’ékena tacheakã porã ha tachearandu, ajeroviágui ne rembiapoukapykuéra rehe.

Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

Pemomba’eguasu uvei Ñanderuetépe pende py’apýpe, ha peñembosako’ipeína pembohovái hag̃ua opaite oporandúva peẽme pe jerovia perekóva rehe pende py’apýpe.

Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra). Ema’ẽmína oĩpa chepype ñaña reko, ha chemboguata pe tape añeteguáva rehe.

peiko hag̃ua Ñanderuete ra’y ha itajýra añeteguáva ramo ha avave anítei ojohu mba’evai pende rekovépe, oñe’ẽvai hag̃ua penderehe, peiko uvei heko potĩva ramo peikove ramojepe tekove vai ha iñañáva apytépe, pemimbi ha pehesape hag̃ua ko yvy apére ku jasytata omimbi háicha ára rehe. Pejejokókena Ñanderuete ñe’ẽ oporomoingovéva rehe, ani hag̃ua ojehecha Hesu Crísto árape añani ha amba’apo rei hague pende apytépe, che avy’aite uvei penderehe.

Opaite mba’e reguerekóva guive eme’ẽ arandu rehehápe, ehupitýke arandu; ha opaite ne mba’erepy eme’ẽ akãguapy rehehápe.

Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.

Péicha tohesape avei pende resape pende rapichakuéra apytépe, ohecha hag̃ua hikuái pene rembiapo porã ha omomba’eguasu hag̃ua pende Ruetépe oĩva yvagakuérape.

Che añembokurusúmagui Hesu Crísto ndive, ndaikovéima che, Hesu Crísto oikógui chepype. Che aikove ramojepe che ro’ópe, aikove che jerovia rupi Ñanderuete Ra’y rehe, Ha’e cherayhúgui ha oñeme’ẽmava’ekue che aikove hag̃ua Ha’érupi.

Anítei peiporuka pende rete reheguáva angaipápe, teko vai rembiporurã ramo, upéva rãngue peñeme’ẽmba Ñanderuete pópe, Ha’e oiporu hag̃ua pende rete reheguáva tembiapo porãme, teko porã rembiporu ramo; peikuaágui pesẽma hague pe ñemano pu’akakuégui, peiko hag̃ua tekove pyahu pu’aka poguýpe.

Jaiko ramo tesapépe, Ha’e oĩ háicha tesapépe, upéicharamo jaiko porã avei oñondive, ha Hesu Crísto ruguy ñanemopotĩ opaichagua tembiapo vaígui. Hesu Crísto Ñanderuete Ra’y voi.

Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.

Hiérrope oñehãimbe’e hiérro, ha péicha avei yvyariguakuéra oñohekombo’e oñomongeta porã hag̃ua.

Ne rembiapoukapy ningo tembiapo techapyrãva, upévare che ánga oñeha’ãmba ojapopa hag̃ua umi mba’e. Che juru omombe’u opaite mba’e nde juru he’íva guive. Ne ñe’ẽ ohesape ñaneakã porã hag̃ua, ha omoarandu hag̃ua umi itavývape.

Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Ne rembiapoukapy chembopurahéi aiko ramojepe ambue tetãme.

Ñande jaguerekógui ñande jerekuévo ku araícha heta techahare ojeroviaitéva, upévare jaipe’a ñandejehegui opaite mba’e ñandejopýva ha ñandejokoséva, ha avei pe angaipa ñanemoñuhãséva, ha ñañani paciéncia reheve pe carréra oñemoĩva ñane renonderãme. Umíva ningo mbovy ára ñandehavira hi’ã háichante ichupekuéra, kóva katu ñanerekombo’e ha ñandehavira ñande reko iporãve hag̃ua ha ñande reko ojoguave hag̃ua Hesu Crísto reko porãme. Añetehápe opaichagua jehavira jahasa asy aja, nañanembovy’amo’ãi, hasy uvei; upéi katu hi’a justícia ha py’aguapy, umi ojepokuaávape g̃uarã. Upévare pemombarete jevy pende jyva ikane’õva ha pene renypy’ã ikangýva. Pemyatyrõ pende rape ikarẽva, ani hag̃ua pende pykuéra ikaráu, tokuera uvei. Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope, ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe. Anítei oime pende apytépe peteĩ opoíva Ñanderuetégui, ojehu haguéicha Esau ndive; okaru porã hag̃uánte ha’e, ovende ta’ýra ypykue reko, (Génesis 25,31). Peikuaa voi ningo uperire, Esau ohupityse hague avei itúva jehovasa, itúva katu ombotove ichupe. Heta tesay reheve oheka itúva ohovasa peve ichupe avei; pe jehovasa iporãvéva katu oñeme’ẽmba jepéma, (Jacóbope). Peẽ napeñembojaiva’ekue pe cérro rehe (Israelguakuéraicha), ikatúva rehe ojepoko oĩháme tata hendýva, arai hũetéva, pytũmby ha yvytu jepoka. Ha napehendúi avei pe turu (trompéta) pu ni Ñanderuete ñe’ẽ. Upéramo Israelguakuéra ojerure asy anive hag̃ua Ha’e oñe’ẽ ichupekuéra. Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.

Mba’eveichagua ñe’ẽ tie’ỹ ani osẽ pende jurúgui, pejénte ñe’ẽ porã omopu’ãva’erãichagua nde rapichápe ijehasa asýpe ha ombopy’aguapy hag̃ua nerendúvape.

Embo’e pe mitãme haperã rehe, ha ituja rire jepeve ndopiaiva’erã ichugui.

Ipotĩeterei ningo ne ñe’ẽ ha upévagui ne rembiguái ohayhu avei ne ñe’ẽ.

Pevy’a tapia Hesu Cristopype, ha ha’e jevy: Pevy’ákena. Pende py’aporã tojekuaauka opavavépe, Hesu Crísto jeju hi’ag̃uíma. Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

Ñanderuete he’i: Che rohekombo’éta ndéve ha ahechaukáta ndéve pe tape moõrupípa nde reguatava’erã, Che ahechaukáta ndéve che rembipota ha ajesarekóta nderehe.

Pekaru ramo térã pey’u ramo, térã pejapo ramo ambue mba’e, pejapopa pemomba’eguasu hag̃ua Ñanderuetépe.

Ani pembyaty pirapireita ko yvy ári, kupi’i ha ao raso ombyai hag̃uáme, ha mondahakuéra omonda hag̃uáme, Reme’ẽ jave pirapire imboriahúvape ani rembopuka turu, ne renondépe umi tova mokõi (fariseokuéra) ojapo háicha Ñanderuete rogakuérape ha táva cálle rupi, oñembotuicha hag̃uánte. Añetehápe Che ha’e peẽme ha’ekuéra ohupitýma hembiapo porã repy. pembyaty uvei pirapireita yvágape, kupi’i ha ao raso ombyai’ỹ hag̃uáme, ha mondahakuéra omonda’ỹ hag̃uáme. Nde pirapireita oĩháme, upépe oĩva’erã avei ne ñe’ã (korasõ).

Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.

Ñanderuete ome’ẽma iñe’ẽ: Heta ombopoguy hesekuéra ija’e’ỹvape, heta ningo oĩ umi omombe’útava pe marandu porã:

upe iñate’ỹva oñemomboriahu; upe ikyre’ỹva katu oñembopirapire;

Che katu ha’ese peẽme: Peikókena Pytu Porãmbáva poguýpe, péicharamo ndapejapomo’ãvéi pende yvyarigua rete rembipota vai (Galaciayguakuérape 5,25).

Ñanderuete pendeporavo, penemboheko potĩ ha penderayhúgui peñemonde jeporiahuvereko mborayhu reheve, py’a porã, ñemomirĩ, pochykuaa’ỹ, paciéncia. Pejogueropu’aka ha peñoperdona, oime ramo oñemohembiapo vaíva; Hesu Crísto peneperdona haguéicha upéicha peperdona avei pende rapichápe. Opaite ko’ã mba’e ári pemonde mborayhu, péva ningo ombojoaju porã añetetehápe.

Evy’aite Ñanderuete ndive, Ha’e tome’ẽ ndéve nde py’apy ojeruréva.

Ha Ñanderuete, pe teko jajaipa Jára ha Ñandejára Hesu Crísto Ru tome’ẽ peẽme pe Pytu Porãmbáva rehegua arandu ha tojehechauka peẽme peikuaa porãve hag̃ua pehóvo ichupe, ha tohesape pende py’apy resa peikuaa hag̃ua mba’épa he’ise pe esperánza peẽ peguerekóva, Ha’e penerenóigui, pehechakuaa porã hag̃ua pe jopói tuichaitéva Ha’e ombosako’ímava Hesu Crísto reheguávape g̃uarã,

Che ra’y, aníke nderesarái che rembiapoukapýgui, eñongatu uvei nde py’apýpe che rekombo’e, upéicharamo nde róga henyhẽta koga’águi ha nde parral rakã’a omyenyhẽta ne mba’yru vínogui. Aníke ndepochy, che ra’y, Ñanderuete ndehavira ramo ha aníke ndekuerái hekombo’égui; Ñanderuete ningo ohavira pe ohayhúvape, pe túva ohavira háicha ita’ýra ohayhúvape (oipotágui oguatá porã). Ovy’aite upe tapicha ojohúva arandu ha ohupitýva akãguapy; umía jahupity ramo iporãve plátagui ha umía jaguereko ramo iporãve órogui. Hepyeteve ita vera hepývagui; ha opaite mba’e ikatúva guive reipota, ndaikatúi ñambojoja hesekuéra. Tekove puku oĩ ijakatúa gotýo; ha ijasu gotýo oĩ mba’erepyeta ha terakuã porã. Hapekuéra ningo nembopy’a rory ha hape po’ikuéra nembopy’aguapýta. Ha’ehína yvyra oporomoingovéva umi hese oñemomba’évape g̃uarã, ha ovy’a iterei umi oñemomba’etévape hese. Arandupópe Ñanderuete ojapo ypyva’ekue ko yvy ha akãporãme omohendava’ekue yvagakuéra. upéicharõ tekove puku ha heta áño py’aguapy reheguáva omyenyhẽta nde rekove.

Upévare ningo ndaorepy’akangýi, omano ramojepe ohóvo ore kuimba’e oka peguáva, ore kuimba’e pypeguáva katu oñembopyahuve ohóvo ko’ẽ ko’ẽ rehe.

Opaite ko’ã mba’evai ñande jagueropu’akapa Hesu Crísto rupi, ñanderayhúgui.

Peguata hekópe, Hesu Crísto ñe’ẽ porã he’i háicha, aha ramo pene rendápe térã che pore’ỹme jepe, tahendu peẽ peimembaha peteĩ pytu porã añóme, ha peñeha’ãmba py’a peteĩme pemyasãive hag̃ua pe jerovia Hesu Crísto evangélio rehe.

Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,

Ore Ruete, Nde orembopy’aguapy, nderupínte ore rembiapokuéra osẽ porãmba.

Pevy’a tapiákena. Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10). Peagradece opaite mba’e rehe, kóva ningo Ñanderuete rembipota ojeroviáva guivépe g̃uarã Hesu Crístore.

Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.

Upévare upe ohendúva che ñe’ẽ ha ojapóva hekoitépe ambojoja pe kuimba’e iñakãguapy porãva rehe, omopu’ãva hóga itaguasu ári. Ha oúvo amaguasu, ha pe y osyry hatãvo, ha pe yvytu oipeju hatã vaívo pe óga rehe, mba’evéicharamo ndo’ái, oñemopu’ãgui itaguasu ári.

Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.

Ajepy’amongeta ne rembiapoukapy rehe, ama’ẽ porãta nde rape rehe.

Opaite pejapóva guive, pejapo pende py’aite guive pejapórõ guáicha Ñanderuetépe g̃uarã, ha ani yvyariguápente.

Eñangareko porãve nde py’apy rehe opaite ambue mba’égui, ichugui heñóigui pe tekovete.

Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.

Upévare peñembosako’i porãke, pejepy’amongeta hekópe ha peha’ãrõmba Hesu Crísto ou jevy peve ijopoiguasu (iporiahuvereko) reheve.

Che ñembo’e tog̃uahẽ ne renondépe, cheguenohẽmína che jejopy vaígui, Nde ere haguéicha rejaposeha.

Hesu katu ombohovái ichupe: Ñanderuete kuatiañe’ẽme katu ojehai voi napan rehe añói oikovehína yvyariguakuéra, opaite ñe’ẽ osẽvare Ñanderuete jurúgui uvei, (Deuteronómio 8,3).

Che hermanokuéra, che ningo nda’eséi ahupitypáma hague, peteĩ mba’e año ajapo, cheresarái umi mba’e tapykuépe opytava’ekuégui ha añeha’ãmba ahupity hag̃ua umi mba’e oĩva che renonderãme. Aguata ahávo ag̃uahẽ meve hu’ãme ha ahupity hag̃ua che rembiapo repy, Ñanderuete ome’ẽtava opavave umi Ha’e ohenoiva’ekuépe Hesu Crístope g̃uarã.

Che poavisase pe poriahuvereko rupi Ñanderuete ome’ẽmava’ekue chéve, ani hag̃ua avave oñembotuicha hekope’ỹ, tohechakuaa uvei pe poriahuvereko me’ẽmby Ñanderuete ome’ẽ háicha oimeraẽvape ijerovia rupi.

Pe yvyarigua opensa haperã rehe, Ñanderuete katu omboguata ichupe.

Upéicha amopu’ã che popytekuéra ne rembiapoukapy ahayhúva gotýo ha ajepy’amongeta’aína ne rembiapoukapy rehe.

Ha opaite oguerekóva ko esperánza kóva ipype, toñemboheko porã, Ha’e heko porã háicha avei.

Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.

Upéi Nehemías he’ive ichupekuéra: Tapeho ha pe’u tembi’u ikyráva, ha pe’u víno he’ẽva, ha peguerahauka avei tembi’u umi mba’eve nombosako’iriva’ekuépe; ko ára kóvape oñemboykémagui Ñandejárape g̃uarã; ani peñembyasýtei, Ñanderuete vy’a tapenemyenyhẽ uvei pende py’apy.

Pevy’a umi ovy’áva ndive, ha pejahe’o umi ojahe’óva ndive.

Che rayhupára, opaite mba’épe aha’ãrõ oho porã ndéve ha taneresãi oho porã háicha ne ángape.

Ñandejára Hesu Crísto ha Ñandejára Ñanderuete ñanderayhúva ha ñanemoangapyhýva tapia iporiahuvereko rupi, péva ningo pe esperánza jaguerekóva. Ha’e tomokyre’ỹ pende py’apy ha tapenemombarete opaichagua ñe’ẽ ha tembiapo porã rupi, pejéva ha pejapóva guivépe.

Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.

Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi. Ñande ñañemoĩva’ekue ramojepe Ñanderuete rehe, Hesu Crísto ñanemoĩ porãma iñemano rupi Itúva ndive. Ha Ñanderuete omoingove jevy haguére Hesu Crístope omanova’ekue apytégui, Ha’e ñanemoingove jevýta avei omanova’ekue apytégui. Ha’e ñanemopotĩva’ekue jaikove hag̃ua tapia Hesu Crísto ha Ñanderuete ndive yvágape. Ndaupévai año, jarovy’aite avei Ñanderuetépe, Ñandejára Hesu Crísto rupi. Hesu Crísto rupínte jaiko porã jevýma avei ñande apohare, Ñanderuete ndive. Peteĩ kuimba’e, Adan rupi oike pe angaipa opavave rekovépe, ha pe angaipa rupi opavavete omanova’erã katuete avei, opavavete oñemboheko vai haguére avei. Pe angaipa oikóma ko yvy ári, Ñanderuete ome’ẽ mboyve Moiséspe hembiapoukapykuéra, ndojehechakuaái katu pe angaipa, og̃uahẽ meve Moises rembiapoukapykuéra. Opáichavo Adan guive Moises peve, pe ñemano ipu’akava’ekue umi oñemboheko vaiva’ekue rehe. Noñemoangaipa vaíri ramojepe hikuái, Adan oñemoangaipa vaiete haguéicha, Adan ningo ojoguava’ekue pe oútavape uperire. Ñanderuete poriahuvereko me’ẽmby ningo Hesu Crísto kuave’ẽmby ha kóva ndojoguaiete katu Adan ñe’ẽrendu’ỹme; Adan ñe’ẽrendu’ỹ ogueru opavavévape ñemano, Hesu Crísto kuave’ẽmby katu ogueru pe tekove añeteguáva hetápe g̃uarã. Hesu Crísto ningo Ñanderuete jopói ndetuicháva opavavévape g̃uarã. Pe angaipa ou peteĩ kuimba’e rupi, ndaupéichai Ñanderuete poriahuvereko me’ẽmby rehe, ouva’ekue hetaiterei tembiapo vaípe g̃uarã. Ñanderuete jehavira oumava’ekue ñandéve peteĩ angaipa rupi ha ogueru pe ñemano, Hesu Crísto kuave’ẽmby katu ñanemboheko potĩ ñane angaipágui. Upéicha, peteĩ kuimba’e, Adan, rembiapo vaikue rupi opavave opyta pe ñemano pu’aka poguýpe. Pe ambue kuimba’e, Hesu Crísto rupi katu opavave ohupitýva guive Ñanderuete jopói ha oñembohekopotĩva opyta pe tekove añetegua pu’aka poguýpe ha oisãmbyhýta Hesu Crísto ndive ko yvy tuichakue. Peteĩ kuimba’e, Adan, angaipa rupi opavave ho’a ñemano pu’aka poguýpe; ambue kuimba’e, Hesu Crísto rupi, opavave ohupity pe salvacion, péva ningo pe tekove tapia g̃uarãva. Peteĩ kuimba’e iñe’ẽrendu’ỹva’ekue rupi opavave oñemboheko vaíma, ha ambue kuimba’e iñe’ẽrenduva’ekue rupi opavave oñemboheko potĩ jevyva’erã ojeroviáma guive. Hesu Crísto rupi ñande jahupitýma Ñanderuete poriahuvereko jopói, jajeroviágui hese, ha ñaime hatã ipype, ha javy’a jahupitytaha rehe avei Ñanderuete reko jajaipa.

Che Ruete, nderehénte che ajejoko che mitã guive ha Nde reñangareko porã cherehe.

Ko’ág̃a ningo opyta gueteri jerovia, esperánza ha mborayhu, ko’ã mbohapy apytégui, pe mba’e tuichavéva ningo pe mborayhu añeteguáva.

Ñembo’e Ñandejárape