1 Peadar 5 - Tiomna Nua 1951 (de Siúnta)

¹ Iarraim d’athchuinghe ar na seanóiribh ’n‐bhur measc, mise atá im’ sheanóir, chómh maith, agus im’ fhiadhnaidhe ar ar fhulaing Críost, agus im’ rannpháirtidhe, leis, de’n ghlóir foillseochar:

² beathuighidh tréad Dé atá ’n‐bhur measc, ag tabhairt aire dhó, ní d’bhur n‐aimhdheoin é, acht go toilteanach, do réir tola Dé; ní h‐é ar son táir‐éadála, acht le h‐ionnracas aigne;

³ gan bheith ag déanamh máighistreachta ar a bhfuil fá bhur gcúram, acht bheith ag tabhairt eisiompláire do’n tréad.

⁴ Agus nuair foillseochar an tÁrd‐Aodhaire, gheobhaidh sibh coróin na glóire nach dtéigheann i n‐éag.

⁵ Ar an gcuma chéadna, cuireadh an t‐aos óg iad féin fá cheannas na seanóir. Bíodh an umhlacht mar chlúdach oraibh, óir cuireann Dia i n‐aghaidh na n‐uaibhreach, acht do‐bheir sé grása do na h‐umhlaibh.

⁶ D’á bhrigh sin, umhluighidh sibh féin fá thréan‐láimh Dé, chum go n‐árdóchadh sé i dtráth oireamhnach sibh;

⁷ ag cur bhur gcúraim uile air, óir bheireann se féin aire dhaoibh.

⁸ Bidhidh stuamdha, bidhidh ar bhur n‐aire; bíonn bhur n‐áidhbheirseoir, an diabhal, ag siubhal thart timcheall mar leomhan búirfeadhach ar thóir an té fhéadas sé a shlugadh.

⁹ Seasuighidh ’n‐a aghaidh‐sean go daingean, creidmheach, agus a fhios agaibh go bhfuil an céasadh céadna d’á chur ar bhur mbráithribh atá san saoghal.

¹⁰ Agus Dia an uile ghrása, do ghlaodh chum a ghlóire féin i gCríost sibh, tar a éis daoibh fulang ar feadh tamaill bhig, foirbhfidh sé sibh, neartóchaidh agus daingneochaidh sé sibh.

¹¹ Dó‐san go raibh an chumhacht go saoghal na saoghal. Amen.

¹² Tré Shilbhánus, ár mbráthair dílis, do réir mo thuairme‐se, atáim ag scríobhadh go h‐aithghearr chugaibh, chum meanmna do thabhairt daoibh, agus chum a chur i dtuigsin daoibh gur ab é fíor‐ghrása Dé é seo: seasuighidh go daingean ann.

¹³ An eaglais atá san mBaibiolóin, do toghadh i n‐éinfheacht libh‐se, beannuigheann sí, mar aon lem’ mhac Marcus, daoibh.

¹⁴ Beannuighidh‐se d’á chéile le póig carthannachta. Go raibh síothcháin agaibh‐se uile atá i gCríost.