Gníomhartha 9 - Na Cheithre Soisgéil agus Gníoṁartha na n-Aspol 1915 1921 (Peadar Ua Laoghaire)

CAIBIDIOL IX. Iompáil phóil chun an chreidimh, agus a dhíoghras. Énéas d’á leigheas ag Peadar, ⁊ Taibíta dá tógaint aige ón mbás.

¹ Agus tháinig Saul, agus é ag síorshéide bhagartha bháis i n-aghaidh deisgiobul an Tighearna, ag triall ar phrúnsa na sagart,

² Agus d’iarr sé air leitreacha thabhairt dó go Damascus, chun na sinagóg, i dtreó dá bhfaghadh sé aon daoine, fir ’ná mná, de ’n tslígh sin, go dtabharfadh sé leis iad gabhtha go Ierúsalem.

³ Agus ag cur na slíghe dhé dhó do thárla go dtáinig sé i gcómhgar do Dhamascus, agus go h-obann do las solus ó neamh ’n-a thímpul.

⁴ Agus thuit sé chun tailimh agus d’airigh sé an guth ghá rádh leis: A Shaul, a Shaul, cad chuige go bhfuilir am ghéarleanmhaint?

⁵ Agus dubhairt seisean: Cia h-é thu, a Thighearna? agus eisean: Mise Íosa ’na bhfuilirse am ghéarleanmhaint, is cruaidh ort bheith a’ speachuíol i n-aghaidh an phriocaire.

⁶ Agus dubhairt seisean agus é ag crith le h-uathbhás: A Thighearna, cad is toil leat a dhéanfainn?

⁷ Agus dubhairt an Tighearna leis: Eirigh agus imthigh isteach sa chathair agus neósfar sa n-áit sin duit cad tá agat le déanamh. Agus na fir a bhí le n-a chois bhíodar ’n-a seasamh agus uathbhás ortha, agus iad ag éisteacht leis an nguth agus ná feacadar aoinne.

⁸ Agus d’éirigh Saul de’n talamh agus d’osgail sé a shúile ach ní fheacaidh sé aon nídh. Agus do rugadar ar lámh air agus do sheoladar isteach i nDamascus é.

⁹ Agus bhí sé ansan trí lá gan radarc, agus níor chaith sé bia ’ná deoch.

¹⁰ Agus bhí i nDamascus duine de dheisgiobulaibh an Tighearna agus Ananías ab ainim dó, agus dubhairt an Tighearna leis, i n-aising: A Ananíais! Agus dubhairt seisean: Táim anso, A Thighearna!

¹¹ Agus dubhairt an Tighearna leis: Eirigh agus imthigh go dtí an tsráid ar a dtugtar an Díreach, agus loirg, i dtigh Iúdáis, fear ó Tharsus gur b’ainim dó Saul; mar, féach, tá sé ag guidhe Dé.

¹² (Agus chonnaic sé ar fear d’an bh’ainim Ananías agus é ag teacht isteach ag triall air agus ag cur a láimhe air chun radhairc a thabhairt dó.)

¹³ Ach d’fhreagair Ananías: A Thighearna, d’airigheas i dtaobh an fhir sin, ó n-a lán, méid na n-olc atá déanta aige do d’naoimh i n-Ierúsalem:

¹⁴ Agus tá úghdarás anso aige ó uachtaránaibh na sagart chun na ndaoine a ghlaodhann ar t’ainimse do ghabháil.

¹⁵ Dubhairt an Thighearna leis: Imthigh ort, óir is árthach toghtha an fear san agamsa chun m’ainime bhreith i láthair geinte agus ríghthe agus clainne Israéil.

¹⁶ Mar taisbeánfadsa dó cad iad na néithe móra atá le fulang aige ar son m’ainime.

¹⁷ Agus d’imthigh Ananías agus chuaidh sé isteach sa tigh agus chuir sé a lámh air agus dubhairt sé: A Shaul, a bhráthair, an Tighearna Íosa a thaisbeáin é féin duit ar an slígh agus tu ag teacht, do chuir sé mise chughat ionus go bhfeicfá agus go líonfí de’n Spioraid Naomh thu.

¹⁸ Agus láithreach do thuit mar bheadh gáinní d’á shúilibh agus fuair sé a radharc agus d’éirigh sé agus do baisteadh é.

¹⁹ Agus chaith sé bia agus tháinig neart dó. Agus d’fhan sé raint laethanta i bhfochair na ndeisgiobul a bhí i nDamascus.

²⁰ Agus láithreach, ins na sinagógaibh, bhí sé ag seanmóin i dtaobh Íosa, gur b’ é Mac Dé é.

²¹ Agus bhí uathbhás ar a raibh ag éisteacht leis, agus deiridís: Nách é seo an fear a bhí ag déanamh íde i n-Ierúsalem ar an muinntir a ghlaodhadh ar an ainim sin, agus nách é gnó a thug anso é ná chun iad do bhreith leis gabhtha ag triall ar uachtaránaibh na sagart?

²² Ach bhí Saul ag neartú go mór agus é ag cur na n-Iúdach ar mearaídhe, a raibh i nDamascus díobh, toisg é bheith ghá dheimhniú gur bh’ é sin an Críost.

²³ Agus nuair a bhí a lán laethanta caithte dhein na Iúdaígh a bheartú, do thoil a chéile, go marbhóchaidís é.

²⁴ Ach do fuair Saul eólus ar iad a bheith ar a thí. Agus bhí lucht cimeádta acu ar na geataíbh do ló agus d’oidhche, chun go marbhóchaidís é.

²⁵ Ach do thóg na deisgiobuil é sa n-oidhche agus chuireadar síos de dhruim an fhalla é i gciseán.

²⁶ Agus tháinig sé go Ierúsalem agus mheas sé dul leis na deisgiobuil, ach bhí eagla acu go léir roimis agus ní chreidfidís gur dheisgiobul é.

²⁷ Ach do thóg Barnabas é agus do rug sé ag triall ar na h-Aspoil é agus d’inis sé dhóibh conus mar a chonnaic sé an Tighearna ar an slígh agus gur labhair sé leis, agus conus mar a dhein sé obhair chalma i n-ainim Íosa, i nDamascus.

²⁸ Agus bhí sé ’n-a bhfochair, ag gabháil amach agus ag gabháil isteach i n-Ierúsalem agus obair chalma aige ’á dhéanamh i n-ainim an Tighearna.

²⁹ Do labhradh sé mar an gcéadna leis na geintibh agus bhíodh sé ag díospóireacht leis na Gréagaigh; agus bhíodar san a d’iarraidh é chur chun báis.

³⁰ Fuair na bráithre an nídh sin amach agus do rugadar go Caesaréa é agus chuireadar as san go Tarsus é.

³¹ Agus bhí síothcháin ag an eaglais ar fuid Iúdaéa go léir agus as fuid Ghalillí agus Shamaría, agus bhí sí ag dul ar aghaid ag gluaiseacht i n-eagla an Tighearna, agus í dá líonadh le sólás an Spioraid Naoimh.

³² Agus do thárla, nuair a bhí Peadar ag tabhairt a chuard sa tímpal ortha, go dtháinig sé chun na naomh a bhí ’n-a gcomhnuíghe i Lidda.

³³ Agus fuair sé sa n-áit sin duine d’ár bh’ainim Énéas, a bhí gan lúth a ghéag agus a bhí ar a leabhaidh ar feadh ocht mblian.

³⁴ Agus dubhairt Peadar leir: A Énéis, tá an Tighearna Íosa Críost ag tabhairt sláinte dhuit. Éirigh agus córuigh do leabaidh! Agus d’éirigh sé láithreach.

³⁵ Agus chonnaic muinntir Lidda go léir é agus muinntir Sharóna, agus d’iompuighdar chun an Tighearna.

³⁶ Agus bhí i n-Ioppé bandeisgiobul agus Taibíta ab ainim di, nú, ar mhíniú, Dorcas. Agus bhí a lán deagh-ghniómhartha agus a lán déarca aici sin ’á déanamh.

³⁷ Agus do thárla ins na laethibh sin gur buaileadh breóite í agus go bhfuair sí bás. Agus do níghdar í agus chuireadar sa tseómra uachtarach í.

³⁸ Ach, ó bhí Lidda cómhgasach do Ioppé agus gur airigh na deisgiobuil Peadar a bheith sa n-áith sin, chuireadar beirt fhear chuige ’ghá rádh leis: Ná déin ríghneas gan teacht ag triall orainn.

³⁹ Agus d’eirigh Peadar agus tháinig sé leó. Agus nuair a tháinig sé ann do rugadar suas é go dtí an seómra mór, agus bhí na baintrneacha ’n-a seasamh ’n-a thímpal agus iad ag sile deór agus iad ag taisbeáint na gcótaí agus na mball éadaigh dó a dheineadh Dorcas dóibh.

⁴⁰ Annsan do chuir Peadar na daoine go léir amach as an seómra agus do leig sé é féin ar a ghlúinibh agus dhein sé úrnuighthe, agus d’iompuigh sé chun an chuirp agus dubhairt sé: A Thaibíta, éirigh! Agus d’osgail sisi a súile agus chonnaic sí Peadar agus d’éirigh sí aniar.

⁴¹ Agus thug sé a lámh di agus chuir sé ’n-a seasamh í. Asus do ghlaoidh sé isteach na naoimh agus na baintreacha agus thug sé suas dóibh í ’n-a beathaidh.

⁴² Ansan do h-innseadh é ar fuaid Ioppé go léir agus do chreid a lán daoine sa Tighearna.

⁴³ Agus do thuit amach gur fhan sé mórán laethanta i n-Ioppé, i dtigh fir gur bh’ ainim dó Símón, fear leathair do leasú.