Gníomhartha 16 - Na Cheithre Soisgéil agus Gníoṁartha na n-Aspol 1915 1921 (Peadar Ua Laoghaire)

CAIBIDIOL XVI. Tugann Pól cuaird na n-eagailsí. Glaodhtar é chun seanmóinighthe i Macedonia. Sgiúrsáltar é i bhPhilippí.

¹ Agus thainig sé go dtí Derbé agus go dti Listra. agus féach, bhí sa n-áit sin deisgiobul dár bh’ ainim Tímoteus, mac do mhnaoi Iúdach n-a raibh an creideamh aici, agus d’athair gheinteach.

² Thug na bráithre a bhí i Listra agus i n-Icónium teistiméireacht mhaith ar an bhfear san.

³ Ba mhian le Pól an fear san do dhul leis féin, agus dhein sé tímpallghearradh air mar gheall ar na Iúdaígh a bhí ins na h-áiteanaibh sin. Óir dobh eól dóibh go léir gur gheinteach a athair.

⁴ Agus ag gabháil tré sna catharachaibh dóibh thugádar do sna daoine le cimeád na reachta a dí déanta ag na h-Aspuil agus ag na seanóirí a bhí i n-Ierúsalem.

⁵ Agus mar sin bhí na h-eagailsí d’á ndainginiú sa chreideamh agus ag dul i líonmhaire lá

⁶ Agus nuair a bhíodar ag gabháil tré chrích Phrigia agus Ghalatia do chosg an Spioraid Naomh iad ar bhriathar Dé do labhairt i n-Asia.

⁷ Agus nuair a thánadar isteach i Misia chuireadar chun dul isteach i mBitinia ach níor leos Spioraid Íosa dhóibh dul ann.

⁸ Ach tar éis gabháil tré Mhisia chuadar síos go Tróas.

⁹ agus do taisbeánadh aisling do Pól sa n-oidhche; fear ó Mhacedonia n-a sheasamh, agus é ’ghá ghuidhe, agus deireadh sé: Tar anall go Macedonia agus cabhruigh linne.

¹⁰ Agus nuair a chonnaic sé an aisling do cheapamair láithreach dul go Macedonia mar bhíomair deimhnightheach go raibh glaoidhte ag Dia orainn chun craobhsgaoile dhéanamh dóibh.

¹¹ Chuamair an luing, ceann ar aghaidh ó Thróas go dtánamair go Samotrácé, agus go Neápolis an lá ’n-a dhiaidh san,

¹² Agus as san go Philippi, príom-chathair sa chuid sin de Mhacedonia agus cathair daoine iasachta. Thugamair rainnt laethanta sa chathair sin, i gcómhairle.

¹³ Agus lá na sabbóide chuamair amach an geata i n-aice abhan, mar ar samhluigheadh úrnuighthe bheith ar siúbhal, agus do shuidheamair ann agus bhíomair ag cainnt le mnáibh a bhí cruinnighthe ann.

¹⁴ Agus bhí bean acu agus Lídia ab ainim di agus bhíod sí ag díol pur-puir i gcathair na dtiathírénach, agus bean diadha ab eadh í. D’airig sí an chainnt agus d’osgail an Tighearna a croidhe chun go n-éistfeadh sí le n-a raibh ag Pól d’á rád,

¹⁵ Agus do baisteadh í féin agus a teaghlach, agus ansan d’iarr sí níd: Má ’sé bhur meas (ar sise) go bhfuilimse dílis do’n Tighearna tagaidh isteach am thigh agus fanaid ann. Agus chuir sí fhiachaibh orainn dul.

¹⁶ agus do thárla, agus sinn ag dul chun úrnuighthe, go dtáinig ar an slighe rómhainn cailín n-a raibh spioraid phútónach inti. Agus do gheibheadh sí mórán saidhbhris do’n mhuinntir go mba leó í, ag tabhairt feasa uaithi.

¹⁷ Agus do lean sí Pól agus sinne, agus í ag liúirigh agus deireadh sí: Seirbhísigh do’n árd-Dhia iseadh na fir sin, agus táid siad ag innsint slighe bhúr slánuighthe dhaoibh.

¹⁸ Bhí sí ’ghá dhéanamh san ar feadh mórán laethanta. Do ghoill san an Phól agus d’iompuigh sé agus dubhairt sé leis an spioraid: Deirim leat, i n-ainim Íosa Críost, imtheacht amach aisti. Agus d’imthigh, an uair chéadna.

¹⁹ Ansan, nuair a chonnaic an mhuinntir go mba leó í go raibh deire le n-a súil leis an saidhbhreas, do ruga-dar ar Phól agus ar Sílas agus do thugadar leó iad go h-áit an mhargaidh, i láthair na n-uachtarán.

²⁰ Agus chuireadar i láthair na ngiúistísí iad agus dubhradar: Iúdaígh iseadh na daoine seo, agus táid siad ag cur na catharach tré na chéile orainn.

²¹ Agus tá nós acu dá dteagasc nách dleaghlach dúinne a ghlacadh, mar is Rómhánaigh sinn.

²² Agus do chruinnigh an pobul ’n-a gcoinnibh, agus do stracadh a gcuid éadaigh, agus d’órduigh na giúistísí gabháil de slataibh ortha.

²³ Agus do buaileadh mórán buillí ortha agus ansan do cuiread i bpríosún iad, agus dubhradh le fear an phríosúin iad a chimeád go maith.

²⁴ Agus nuair a fuair sé sin an t-órdú san do chuir sé sa charcair ba shia isteach iad agus a gcosa daingean i gceap adhmaid.

²⁵ I lár na h-óidhche, ámhthach, bhí Pól agus Sílas ag déanamh úrnuighthe agus ag moladh Dé, agus bhí na príosúnaigh ag éisteacht leó.

²⁶ Agus go h-obann do tháinig luasgadh talmhan i dtreó go raibh fallaí an phríosúin d’á suathadh go bun. Ansan, siúd na geataí go léir ar osgailt agus na ceangalacha sgaoilte de sna priosúnaigh go léir.

²⁷ Do dúisigh fear cimeádta an phríosúin as a chodla agus nuair a chonnaic sé dóirse an phríosúin ar osgailt cheap sé go raibh na príosúnaigh imighthe agus tharraig sé a chlaidheam as a thruail chun é féin a mharbhadh.

²⁸ Do liúigh Pól air, ámhthach, do ghuth árd agus dubhairt sé: Ná dein aon díobháil duit fhéin; táimíd go léir anso.

²⁹ D’iarr sé solus agus chuaidh sé isteach agus chaith sé é féin ag cosaibh Phóil agus Shílais,

³⁰ Agus thug sé leis amach iad agus dúbhairt sé: A Thighearnaí, cad ’tá le déanamh agam ionus go saorfí me?

³¹ Agus dubhradar-san: Creid sa Tighearna Íosa agus beidh tú slán, tu féin agus do theaghlach.

³² Agus do labhradar briathar an Tighearna leis féin agus le n-a raibh ’n-a theaghlach.

³³ Agus thóg sé iad an tráth céadna de’n oidhche agus do nígh sé a gcneadhacha, agus do baisteadh é féin agus a theaghlach láithreach.

³⁴ agus thug sé isteach ’n-a thigh féin iad agus chuir sé na suidhe chun búird iad, agus bhí gáirdeachas air féin agus an a theaghlach agus a gcreideamh i nDia.

³⁵ Agus nuair a tháinig an lá chuir na giúistísí oificeacha, ’ghá rád: Sgaoilidh uaibh na fir sin.

³⁶ D’innis fear cimeádta an phríosúin an chainnt sin do Phól: Chuir na giúistísí órdú sibh do sgaoile chun siúbhail; anois, dá bhrígh sin téighidh amach agus imthighidh i síothcháin.

³⁷ Dubhairt Pól leó, ámhthach: Is fir Rómhánacha sinn. Do sgiúrsáladh sinn os cómhair an phobuil, gan breith tabhartha orainn, agus do cuiread i bpríosún sinn. An maith leó anois sinn do dhíbirt uatha a gan fhios? Ní bheidh san mar sin.

³⁸ Tagaidís anso, Agus cuiridís féin amach sinn. D’innis na h-oificeacha do sna giúistísíbh an chainnt sin. Tháinig sgannra ortha nuair airíghdar gur bh’ fheara Rómhánacha iad.

³⁹ Thánadar agus d’iarradar maitheamhnachas ortha, agus do rugadar amach iad agus d’iarradar ortha imtheacht as an gcathair.

⁴⁰ Ach nuair a chuadar-san amach as an dphríosún chuadar isteach i dtigh Lídia, agus chonnacadar na bráithre agus chuireadar sólás ortha. Ansan do ghluaiseadar chun siúbhail.