Seanfhocal 16 - An Bíobla Naofa 1981

¹ Déanann croí an duine an beartú; ach sé an Tiarna a thugann an freagra.

² Bíonn iompar an duine gan cháim dar leis féin, ach is é an Tiarna a thomhaiseann an intinn.

³ Fág do shaothar go léir faoin Tiarna, agus cuirfear do phleananna go léir i gcrích.

⁴ Rinne an Tiarna gach ní le haghaidh cuspóra ar leith, agus an t‑urchóideach le haghaidh lá na tubaiste.

⁵ Is fuath leis an Tiarna an croí uaibhreach, bí deimhin de nach rachaidh sé gan phionós.

⁶ Déantar leorghníomh sa pheaca trí dhílseacht agus seasmhacht; seachnaíonn fear an t‑olc le heagla an Tiarna.

⁷ Nuair a thugann bealaí duine taitneamh don Tiarna, déanann sé cairde fiú dá eascairde.

⁸ Is fearr an beagán agus an chóir ná an mórán agus an éagóir.

⁹ Beartaíonn duine a chúrsa ina chroí ach sé an Tiarna a threoraíonn a chéimeanna.

¹⁰ Tagann oracail ó bhéal an rí, ní dhéanann sé dearmad nuair a fhógraíonn a bhreith.

¹¹ Is leis an Tiarna an mheá agus na scálaí cothroma; is é a rinne na meáchana uile sa mhála.

¹² Is gráin le ríthe an t‑olc a dhéanamh, mar is í an fhíréantacht is bonn faoin ríchathaoir.

¹³ Bíonn fáilte ag an rí roimh bheola fíréanta; bíonn grá aige don té a labhraíonn go cóir.

¹⁴ Teachtaire báis fearg rí, ach déanfaidh an t‑eagnaí í a cheansú.

¹⁵ Bíonn an bheatha i ngile ghnúis an rí, agus is geall le scamaill bháistí an earraigh a ghnaoi.

¹⁶ Is fearr an eagna a aimsiú ná an t‑ór; tóg tuiscint mar rogha thar an airgead.

¹⁷ Casann ród an fhíréin i leataobh ón olc; an té a fhaireann cá bhfuil a thriall caomhnaíonn sé a bheo.

¹⁸ Gabhann uabhar roimh thubaiste; agus éirí in airde roimh threascairt.

¹⁹ Is fearr a bheith umhal ó chroí i measc na n‑íseal ná an chreach a roinnt leis na huaibhrigh.

²⁰ Beidh an rath ar an té a thugann aird ar an mbriathar; is méanar don té a mbíonn a mhuinín aige as an Tiarna.

²¹ Tugtar fear na críonnachta ar an té atá eagnaí croí; cuireann milse briathar le meallacacht ráite.

²² Is foinse beatha an ghaois don té a bhfuil sí ina sheilbh ach is í an bhaois crá na n‑amadán.

²³ Múineann croí an eagnaí gliceas dá bhéal, agus cuireann sé le meallacacht a bhriathar.

²⁴ Is cuma nó cior mheala briathra séimhe; is milis iad le blaiseadh agus is sláintiúil iad don chorp.

²⁵ Tá cosán ann a shamhlaíonn ceart do dhuine, ach níl de chríoch leis ach an bás.

²⁶ Bíonn goile an tsaothraí ag saothar dó, agus a chraos ocrach á ghriogadh.

²⁷ Beartaíonn an t‑alfraits olc, agus is cuma nó tine loiscneach briathra a bhéil.

²⁸ Síolann an cealgaire aighneas, agus deighleann an béadánaí dlúthchairde óna chéile.

²⁹ Cuireann an foréigneach a chomharsa ar seachrán, agus meallann é ar bhóthar nach fónta.

³⁰ Tá urchóid á taibhreamh d'fhear sméidte na súl, agus tá an t‑olc déanta ag an té a chuireann grabhas air féin.

³¹ Coróin ghlóire é an ceann liath agus beatha fhíréanta a thuilleann í.

³² Is fearr an duine stuama ná an gaiscíoch tréan; agus an té atá ina mháistir air féin ná an té a dhéanann cathair a ghabháil.

³³ Ar an ucht a chaitear na cranna, ach ón Tiarna a thagann an réiteach.