Salm 92 - An Bíobla Naofa 1981

An Ceart Diaga

¹ Salm. Amhrán le haghaidh na Sabóide.

² Is maith é buíochas a thabhairt don Tiarna, agus ceol a dhéanamh do d'ainm, a Neach is Airde,

³ d'fhonn do bhuanghrá a fhógairt ar maidin, agus do dhílse i dtráthanna na hoíche,

⁴ le ceol na cruite agus na cláirsí; mar aon le ceadal na lire.

⁵ Óir chuir do ghníomhartha áthas orm, a Thiarna; déanaim gairdeas in oibreacha do lámh.

⁶ Nach éachtach iad d'oibreacha, a Thiarna! nach domhain iad go dearfa do smaointe!

⁷ Ní aithníonn fear na díchéille, ná ní thuigeann an t‑amadán an ní seo.

⁸ Cé go n‑eascraíonn na héagráifigh mar fhéar, agus go mbíonn na hainbheartaigh faoi bhláth,

⁹ níl i ndán dóibh ach léirscrios go brách; ach is tusa, a Thiarna, an Neach is Airde de shíor.

¹⁰ Óir scriosfar do naimhde, sea do naimhde, a Thiarna, agus scaipfear na hurchóidigh go léir.

¹¹ Thug tú dom neart an daimh allta, agus dhoirt tú ola úr orm anuas.

¹² D'fhéach mo shúile go buach ar mo naimhde; chuala mo chluasa dea-scéala a dtreascartha.

¹³ Beidh na fíréin faoi bhláth mar chrann pailme; fásfaidh siad mar chéadras na Liobáine.

¹⁴ Arna bplandú in áras an Tiarna dóibh, beidh siad faoi mhaise i gcúirteanna Dé.

¹⁵ Tabharfaidh siad toradh uathu fiú amháin nuair is críon dóibh, agus iad go húrghlas i gcónaí,

¹⁶ a fhoilsiú a fhíréanta is atá an Tiarna; mo charraig é, gan mí-ionracas ar bith ann.