Salm 85 - An Bíobla Naofa 1981

Athbhunú Chlann Iosrael

¹ Do stiúrthóir an chóir. Salm le clann Chorach.

² Bhí tú fabhrach le do thalamh, a Thiarna; d'athraigh tú chun feabhais cinniúint Iacóib.

³ Mhaith tú a gcoir do do phobal agus d'fholaigh tú a bpeacaí go léir.

⁴ Chuir tú cosc le d'fhearg ar fad; chuir tú suas de do chonfadh buile.

⁵ Cuir ar ais sinn, a Dhia ár Slanaitheoir; agus ná bí i bhfaltanas linn feasta.

⁶ An mbeidh tú i bhfeirg linn go brách, nach mbeidh deireadh go deo le do fhraoch?

⁷ Nach dtabharfaidh tú aiseag ár mbeatha dúinn chun go ndéanfaidh do phobal lúcháir ionat?

⁸ Taispeáin dúinn, a Thiarna, do thrócaire, agus tabhair dúinn cúnamh do shlánaithe.

⁹ Éistfidh mé leis an Tiarna Dia óir labhróidh sé ar son na síochána - síocháin dá mhuintir agus dá fhíréin; agus don dream a d'iompaigh chuige ó chroí.

¹⁰ Tá a shlánú i ngar do lucht a eaglaithe; chun go gcónódh a ghlóir inár dtír.

¹¹ Casadh ar a chéile an buanghrá is an dílseacht; phóg an fhíréantacht agus an tsíocháin a chéile.

¹² Eascróidh an dílseacht as an talamh; agus breathnóidh an fhíréantacht ó neamh.

¹³ Cuirfidh an Tiarna an séan orainn; agus tabharfaidh an talamh a thoradh uaidh.

¹⁴ Rachaidh an fhíréantacht roimhe amach; agus an slánú i slí a choiscéimeanna.