Salm 83 - An Bíobla Naofa 1981

In Aghaidh an Namhad

¹ Amhrán. Salm Ásáf.

² Ná bí i do thost, a Dhia; ná bí balbh, a Dhia; ná bí ciúin.

³ Óir féach! tá do naimhde ag tógáil clampair; agus tá do lucht fuatha ag tógáil a gcinn.

⁴ Chinn siad ar chomhairle in aghaidh do phobail; chuaigh siad i gcogar in aghaidh aos do ghrá.

⁵ Dúirt siad: “Déanaimis a scriosadh mar phobal; go ndéanfar dearmad ar ainm Iosrael feasta.”

⁶ Déanann siad cogar le chéile d'aon intinn; déanann siad cor agus conradh i do choinne.

⁷ Pubaill chlanna Eadóm agus Ísmeáéil; pubaill chlanna Mhóáb agus Hágár,

⁸ Geabal agus Amón agus Amáiléic; na Filistínigh agus lucht áitrithe na Tuíre,

⁹ Chuaigh an Asaír mar an gcéanna i gcomhar leo; a thabhairt cúnaimh agus nirt do chlann Lót. Selah

¹⁰ Déan leo siúd mar a rinne tú le Midián; le Síseará agus Iábaín cois Chiseon;

¹¹ an mhuintir a díthíodh ag Éan Dór, a ndearnadh aoileach dá gcoirp ar an talamh.

¹² Tabhair oidhe Oraeb agus Zéab ar a bhflatha, oidhe Zéaba agus Zalmuná ar a dtaoisigh -

¹³ an drong a dúirt: “Gabhaimis seilbh ar pháirceanna Dé mar oidhreacht againn féin.”

¹⁴ Cuir scaipeadh orthu, a Dhia, mar lóchán; nó mar cháith ag imeacht le gaoith.

¹⁵ Mar a loisceann an tine an choill, mar a loisceann an lasair na sléibhte,

¹⁶ cuir an ruaig orthu siúd le do dhoineann; cuir sceimhle agus scanradh orthu le do stoirm.

¹⁷ Folaigh a n‑éadan le náire; nó go n‑iarrfaidh siad d'ainm, a Thiarna.

¹⁸ Bíodh náire agus scéin go brách orthu; go n‑éaga siad faoi tháir agus tharcaisne!

¹⁹ Bíodh a fhios acu gur tú amháin an Tiarna; an Té is Airde os cionn an domhain go léir.