Salm 73 - An Bíobla Naofa 1981

An Tríú Leabhar Bréagshonas na nÉagráifeach

1 Salm Ásáf.

¹ Salm Ásáf. 1 Nach maith atá Dia don dream díreach; an Tiarna dá bhfuil glan ó chroí.

² Ach is beag nár sciorr mo chosa uaim; is beag nár shleamhnaigh mo chéimeanna;

³ Óir bhíos ag éad le lucht éirí in airde, ag faire dom ar shéan na n‑éagráifeach.

⁴ Ní bhíonn siad siúd á gcrá ná á gciapadh; is slán a gcorp agus is sleamhain.

⁵ Níl páirt acu in anacraí na so-mharaithe ná ní dhéantar a sciúrsáil mar dhaoine eile.

⁶ Uime sin, is é an t‑uabhar a muince, agus folaíonn an foréigean iad amhail éadach.

⁷ Bíonn a gcroí ag cur thar maoil le mioscais; brúchtann smaointe a n‑intinne amach.

⁸ Bíonn siad ag fonóid is ag labhairt go mailíseach agus beartaíonn siad an t‑ansmacht go huaibhreach.

⁹ Tugann siad fogha faoi na flaithis lena mbéal agus triallann a dteanga ar fud an talaimh.

¹⁰ Dá bhrí sin bíonn an pobal á moladh agus slogann siad a mbíonn á rá acu.

¹¹ Agus deir siad: “Cá bhfios do Dhia? An amhlaidh is eol don Té is Airde?”

¹² Féach! sin é dála na bpeacach; téann siad i saibhreas agus iad ar a sástacht.

¹³ Nach díomhaoin dom mo chroí a bheith glan agam agus mo lámha a ní san ionracas,

¹⁴ agus mé bheith do mo chrá ar feadh an lae agus do mo smachtú gach aon ré solais!

¹⁵ Dá ndéarfainn: “Labhróidh mé mar iad siúd,” bheinn ag tréigean dúchas do chlainne.

¹⁶ Rinne mé machnamh d'fhonn go dtuigfinn an ní seo, ach chuaigh sé thar m'acmhainn a dhéanamh,

¹⁷ nó go ndeachaigh mé i sanctóir Dé is gur thugas do m'aire a gcríoch dhéanach.

¹⁸ Chuir tú i slí shleamhain iad go dearfa agus thug orthu titim chun a n‑aimhleasa.

¹⁹ Féach mar a thit siad le halt na haon uaire; chuaigh siad ar ceal arna scriosadh le scanradh.

²⁰ Amhail taibhreamh a scaiptear le dúiseacht cuirfidh tú a samhailtí ar ceal, a Thiarna.

²¹ Toisc go raibh m'aigne á spreagadh chun feirge le linn do mo chroí bheith á chiapadh,

²² bhí mé amaideach, baoth, neamhthuisceanach; ba chuma nó beithíoch mé i d'fhianaise.

²³ Mar sin féin bím i d'fhochair de shíor agus beireann tú ar dheasláimh orm.

²⁴ Déanfaidh tú mo threorú le do chomhairle agus glacfaidh tú chun na glóire faoi dheoidh mé.

²⁵ Cé atá agam ar neamh ach tú; agus má bhím leatsa ní áil liom a bhfuil ar talamh.

²⁶ Bíodh go gcliseann mo cholainn is mo chroí rinne carraig mo chléibh de Dhia; is é mo chuid é go síoraí suthain.

²⁷ An drong a thréigeann thú rachaidh siad ar ceal; scriosann tú a n‑imíonn uait le striapachas.

²⁸ Is fearr liomsa bheith i ngar do Dhia agus mo dhóchas a chur sa Tiarna, mo Dhia, ionas go n‑inseoinn d'éachtaí go léir i ndoirse iníon Shíón.