Salm 48 - An Bíobla Naofa 1981

Cathair Naofa Dé

¹ Amhrán. Salm chlann Chorach.

² Is éachtach an Tiarna agus is inmholta go mór é i gcathair ár nDé.

³ Is álainn an cnoc é a shliabh naofa, áthas an domhain uile. Is é Cnoc Shíón de leith an tuaiscirt cathair an ArdRí.

⁴ Chruthaigh Dia i lár a dúnta bheith ina dhaingean sábháilte.

⁵ Óir féach! chruinnigh na ríthe le chéile gur ionsaigh siad in éineacht.

⁶ Chuir a bhfaca siad anbhá agus alltacht orthu; rinneadh stangairí díobh le neart mearbhaill.

⁷ Tháinig crith cos is lámh orthu láithreach, amhail tinneas clainne;

⁸ mar a bheadh an ghaoth anoir ag milleadh loingeas Thairsís.

⁹ Mar a chualamar, is amhlaidh a chonaiceamar i gcathair ár nDé; i gcathair Thiarna na slua a dhaingnigh Dia go deo.

¹⁰ Déanaimid machnamh ar do bhuanghrá, a Dhia, i gceartlár do theampaill.

¹¹ Leathann do mholadh, ar nós d'ainm, a Thiarna, go críocha na cruinne. Is lán do dheaslámh d'fhíréantacht;

¹² gairdíonn Cnoc Shíón. Tá áthas ar iníonacha Iúdá de bharr do bhreithiúnais.

¹³ Siúlaigí Síón agus triallaigí ina timpeall comhairigí a túir.

¹⁴ Breathnaigí a rampair chosanta; scrúdaigí a dúnfoirt, go n‑inseoidh sibh don ghlúin atá le teacht:

¹⁵ is mar sin dár nDia. Is é ár nDia é go brách na breithe agus ár dtreoraí go deo.