Salm 47 - An Bíobla Naofa 1981

Rí an Domhain

¹ Do stiúrthóir an chóir. Salm chlann Chorach.

² Buailigí bhur mbosa, a chiníocha uile; glaoigí ar Dhia le gártha gairdis!

³ Óir is ard é an Tiarna agus is uamhnach, ina ardrí os cionn na cruinne.

⁴ Cuireann sé ciníocha faoinár smacht agus cuireann sé náisiúin faoinár gcosa.

⁵ Is uaidh a fuaireamar ár n‑oidhreacht; oidhreacht Iacóib dá dtugann sé grá.

⁶ Gabhann Dia in airde le gártha molta; gabhann sé in airde le séideadh an stoic.

⁷ Seinntear ceol dár nDia, seinntear ceol dó; seinntear ceol dár Rí, seinntear ceol dó!

⁸ Is é Dia rí na cruinne go léir; seinnigí agus canaigí go hoilte dó!

⁹ Tá Dia ina rí ar na náisiúin; tá sé ina shuí ar a ríchathaoir naofa.

¹⁰ Cruinníonn taoisigh na gciníocha i gceann a chéile; i bhfochair phobal Dhia Abrahám. Óir is le Dia lucht rialaithe na cruinne; is aige atá an chumhacht go hiomlán.