Salm 19 - An Bíobla Naofa 1981

Dia agus an Dúlra

¹ Do stiúrthóir an chóir. Salm le Dáiví.

A

² Fógraíonn na spéartha glóir Dé agus foilsíonn an fhirmimint saothar a lámh.

³ Insíonn na laethanta an scéal dá chéile agus tugann na hoícheannta an t‑eolas dá chéile.

⁴ Ní chluintear caint ná canúint ná briathar

⁵ cé go ngabhann a nglór i ngach uile thír agus a bhfocail go críocha imchiana na cruinne. Is iontu a chuir sé a bhoth don ghrian

⁶ a thagann mar nuachar amach as a sheomra ag gairdiú mar ghaiscíoch ag cur chun reatha.

⁷ Tá a thriall amach as teorainn na spéire agus a iomchuairt thart chun na teorann eile, agus níl dul óna theas ag aon ní ar bith.

B

⁸ Tá dlí an Tiarna gan cháim: athbheonn sé an t‑anam. Is iontaofa í fianaise an Tiarna, a thugann eagna don fhíréan.

⁹ Is díreach iad forálacha an Tiarna: cuirid áthas ar an gcroí; is glan í aithne an Tiarna, soilsíonn sí na súile.

¹⁰ Is íon í eagla an Tiarna, maireann sí go deo; is fíor iad reachtanna an Tiarna, táid uile go cóir.

¹¹ Is mó is so-mhianaithe iad ná ór, ná mínór dá ghlaine; agus is milse iad ná mil, ná mil ar sileadh ón gcíor.

¹² Múineann siad eolas do do ghiolla; is cúis luaíochta a gcomhlíonadh.

¹³ Cé a fhéadfaidh a earráidí a aithint? ná leag orm mo pheacaí folaigh.

¹⁴ Caomhnaigh do ghiolla ar an uabhar sula bhfaighe sé mo bhua; Ansin is ea a bheidh mé gan smál agus saor ó thrompheaca.

¹⁵ Go raibh briathra uile mo bhéil agus smaointe mo chroí taitneamhach leatsa, a Thiarna, a charraig liom, is a shlánaitheoir.