Salm 148 - An Bíobla Naofa 1981

Moladh leis an Tiarna

¹ Alleluia. Molaigí an Tiarna ó na flaithis, molaigí é sna spéartha!

² Molaigí é, a aingle Dé, Molaigí é, a shluaite go léir!

³ Molaigí é, a ghrian is a ghealach, molaigí é, a réaltaí lonracha!

⁴ Molaigí é, a fhlaitheasa is airde, agus a uiscí atá os cionn na bhflaitheas!

⁵ Molaidís ainm an Tiarna, le hordú uaidh a cruthaíodh iad.

⁶ Shocraigh sé go brách iad; thug sé dlí dóibh nach rachaidh ar ceal.

⁷ Molaigí an Tiarna ón talamh, a mhíolta mhóra agus a dhuibheagána go léir!

⁸ A thine is a chloichshneachta, a shneachta is a cheobhrána, a anfaí gaoithe a chomhlíonann a bhriathar,

⁹ a shléibhte agus a chnoca uile, a chranna toraidh agus a chéadrasa!

¹⁰ A ainmhithe allta agus clóis, a phéisteanna agus a éanlaith an aeir!

¹¹ A ríthe agus a náisiúna na cruinne, a fhlatha an domhain is a bhreithiúna!

¹² A ógánacha agus a chailíní, a sheanóirí agus a leanaí le chéile,

¹³ molaigí ainm an Tiarna! óir is é amháin is airde, agus sáraíonn a ainm neamh agus talamh in éineacht.

¹⁴ D'ardaigh sé neart a phobail; bíonn a naoimh uile á mholadh; molann clann Iosrael é, an pobal atá ina fhogas. Alleluia!