Salm 136 - An Bíobla Naofa 1981

An Hallel Mór: Iomann Cásca

¹ Alleluia. Tugaigí buíochas don Tiarna toisc gur maith é, agus go maireann a bhuanghrá go brách.

² Tugaigí buíochas do Dhia na ndéithe, óir maireann a bhuanghrá go brách.

³ Tugaigí buíochas do Thiarna na dtiarnaí, óir maireann a bhuanghrá go brách.

⁴ Is é an t‑aon neach amháin é a dhéanann móréachtaí, óir maireann a bhuanghrá go brách.

⁵ Rinne sé na flaithis le feabhas a eagna, óir maireann a bhuanghrá go brách.

⁶ Rinne sé an talamh a leathadh ar na huiscí, óir maireann a bhuanghrá go brách.

⁷ Eisean a rinne na soilse móra, óir maireann a bhuanghrá go brách.

⁸ Chuir sé an ghrian i gceannas an lae, óir maireann a bhuanghrá go brách;

⁹ an ré is na réaltaí i gceannas na hoíche, óir maireann a bhuanghrá go brách.

¹⁰ Bhuail sé céadghin na nÉigipteach, óir maireann a bhuanghrá go brách.

¹¹ Agus threoraigh sé Iosrael as a measc, óir maireann a bhuanghrá go brách.

¹² Le cumhacht a láimhe agus neart a chuisle, óir maireann a bhuanghrá go brách.

¹³ Roinn sé an Mhuir Rua ina dhá cuid, óir maireann a bhuanghrá go brách.

¹⁴ Agus thug ar Iosrael siúl anonn trína lár, óir maireann a bhuanghrá go brách.

¹⁵ Threascair sé Forann agus a shlua sa mhuir, óir maireann a bhuanghrá go brách;

¹⁶ agus sheol a phobal tríd an bhfásach, óir maireann a bhuanghrá go brách.

¹⁷ Bhuail sé na ríthe móra, óir maireann a bhuanghrá go brách;

¹⁸ agus mharaigh sé na ríthe cumhachtacha, óir maireann a bhuanghrá go brách;

¹⁹ Síochon, rí na nAmórach, óir maireann a bhuanghrá go brách;

²⁰ agus Óg a bhí ina rí ar Bháiseán, óir maireann a bhuanghrá go brách.

²¹ Agus thug sé a bhfearann mar oidhreacht, óir maireann a bhuanghrá go brách;

²² mar oidhreacht do Iosrael a sheirbhíseach, óir maireann a bhuanghrá go brách.

²³ Chuimhnigh sé orainn nuair a bhíomar dár mbuaireamh, óir maireann a bhuanghrá go brách.

²⁴ Agus rinne sé ár bhfuascailt ónár naimhde, óir maireann a bhuanghrá go brách.

²⁵ Bronnann sé bia ar a maireann sa cholainn, óir maireann a bhuanghrá go brách.

²⁶ Gabhaigí buíochas le Dia na bhflaitheas, óir maireann a bhuanghrá go brách.