Salm 112 - An Bíobla Naofa 1981

Aoibhneas an Fhíréin Salm Aibítreach

¹ Alleluia. Is aoibhinn don fhear ar a mbíonn eagla an Tiarna; a thugann taitneamh dá aitheanta uile.

² Beidh a shliocht siúd go tréan ar talamh; is beannaithe clann an duine ionraic.

³ Beidh maoin is maitheas ina theaghlach; mairfidh a fhíréantacht go brách is choíche.

⁴ Bíonn ina sholas sa dorchacht don dea-dhuine; is trócaireach é, is fial, is ionraic.

⁵ Bíonn an dea-dhuine carthanach fial lena chuid; riarann sé a ghnó go ceart onórach.

⁶ Ní chorrófar an fíréan choíche; mairfidh a chuimhne go brách na breithe.

⁷ Ní chuirfidh drochscéala eagla air; is daingean a chroí, is é an Tiarna a dhóchas.

⁸ Is dílis daingean a chroí gan eagla; feicfidh sé a naimhde á dtreascairt.

⁹ Dáileann sé a chuid go fial ar lucht an ghátair; maireann a fhéile go brách agus choíche. Tógfar a cheann, ardófar a chumhacht go glórmhar.

¹⁰ Feicfidh an peacach agus beidh sé ar buile. Bainfidh sé dioscán as a fhiacla agus leáfaidh sé; agus meathfaidh mian an urchóidigh.