Iób 27 - An Bíobla Naofa 1981

¹ Agus lean Iób air lena aitheasc agus dúirt:

² Dar Dia beo a bhain díom mo cheart, Agus dar an Uilechumhachtach a chuir gruaim ar m'anam,

³ Fad tá an dé ionam, Agus spiorad Dé i mo pholláirí,

⁴ Ní labhróidh mo bheola focal éithigh go brach Ná ní thiocfaidh bréag as mo bhéal!

⁵ Gura fada uaim a admháil go bhfuil tú sa cheart! Go lá mo bháis ní shéanfaidh mé m'ionracas.

⁶ Seasaim ar fhód m'fhíréantachta, agus ní bhogfaidh mé. Níl ábhar gearáin ag mo choinsias orm de bharr mo shaoil.

⁷ Droch-chríoch ar m'eascara, dála an urchóidigh, Agus ar mo namhaid, dála an éagráifigh.

⁸ Óir cén dóchas atá ag an aindiaga ag [guí] dó, Agus ag ardú a anama chun Dé?

⁹ An n‑éistfidh Dia lena ghlao Nuair a thagann an mí-ádh sa mhullach air?

¹⁰ An é an tUilechumhachtach is gean leis? An gcuireann sé a ghuí i gcónaí chun Dé?

¹¹ A mhalairt! Taispeánfaidh mé daoibh cé mar oibríonn cumhacht Dé, Gan aon chuid de bheartais an Uilechumhachtaigh a cheilt.

¹² Dá dtuigfeadh sibh féin go léir iad, Ní chuirfeadh sibh bhur n‑anáil amú ar bhriathra baotha.

An Mac Mallachtan

¹³ Sé seo atá i ndán ag Dia don choirpeach, Agus an oidhreacht a bhronnann an tUilechumhachtach ar an tíoránach.

¹⁴ Dá líonmhaire iad a chlann mhac, sé an claíomh is dán dóibh; Agus beidh a sliochtsan ar an ngannchuid bia.

¹⁵ Déanfaidh an bás an mhuintir a bheidh fágtha a adhlacadh, Agus ní dhéanfaidh a mbaintreacha olagón.

¹⁶ Cruinníodh sé airgead mar luaithreach, Agus cnuasaíodh sé éadach mar chré.

¹⁷ Bíodh aige! Ach is duine cóir a chaithfidh, Agus roinnfear a chuid airgid ar an muintir ionraic.

¹⁸ Thog sé nead damhán alla dó féin, Agus seantán fhear faire.

¹⁹ Luíonn sé síos saibhir, ach ní bheidh sé amhlaidh arís, Nuair a dhúiseoidh sé beidh gach ní imithe.

²⁰ Tiocfaidh uafáis sa mhullach air mar thuile, Agus fuadóidh stoirm é san oíche.

²¹ Ardóidh an ghaoth anoir ón talamh é, agus béarfaidh sí léi é, Sciobfaidh sí é óna áit chónaithe.

²² Déanfar sprioc lámhaigh de gan trua ná taise; Caithfidh sé teitheadh ó lucht a bhagartha.

²³ Buailfear bosa nuair a leagfar ar lár é, Agus beifear ag drannadh air ó gach aird.