Yelemiya 36 - Luganuzi Luswanu Kuli Wanhu Wose 2002

Baluku yakusoma mu Nyumba yo Mulungu, za mu kalatasi mhalinje ye ligolo-golo

¹ Kukawa mu mwaka we kane wa mu wutemi wa Yehoyakimu u mwana wa Yosiya, u mutemi wa Yuda, u Muwaha Mulungu yakanonjela yakatya,

² “Alu gwe Yelemiya, wusole kalatasi mhalinje ye ligolo-golo, wandice zinghani zose za Isilayeli na Yuda, hamonga ne makungugo gose, zono nakulonjelaga. Wandice zinghani zose zono nakulonjelaga, ku wulawilila ha mwamulizo lono namula kulongana nagwe, lono Yosiya yali yakali yatemile, sunga mwi'zuwa lye zuwali.

³ Na lunji i wanhu wa Yuda, kolo wakuhulika ze magazo mawaha gono nghusaka niwatendele, lunji wopituka wagalece metumo gawo mabi. Nane niwanenele masutya gawo hamonga no wubi wawo.”

⁴ Ale du, nane nghawa kumucema Baluku u mwana wa Neli, nghawa kuzilonga zinghani zose hali mwene, zono Muwaha Mulungu yanonjelaga, akuno mwene nayo yakuzandika. Nayo Baluku, yakazandika zinghani zose mu kalatasi yiyo mhalinje ye ligolo-golo.

⁵ Hanyuma, nghawa kumulajiliza Baluku nghatya nhavi, “Alu Baluku, ane no muyago, si nghomboligwe ninjile mu Nyumba yo Mulungu.

⁶ Holeka nghukunena, agwe wubite wukasome zizi za mu kalatasi yiyi mhalinje ye ligolo-golo, zono ane nali kukulonjeleza nagwe wukuzandika. Wukazisome ha mwande ye wanhu wose, mwi'zuwa lyo kuleka kulya. Wubite wukazisome mumo mu kalatasi yiyi mhalinje ye ligolo-golo, kwe yizi yiwaha muno, i wanhu ho wasume kuzihulika zose, zono Muwaha Mulungu yanonjela, nane nghawa kukulonjeleza, nagwe wukawa kuzandika. Nagwe nhondo wime i hanhu hono wanhu wose wosuma kukuhulika, hamonga ne wanhu wa Yuda wono wowa wazize baha ku wulawa mu vikaya vyawo.

⁷ Na lunji wosuma kumulomba Muwaha Mulungu, no kupituka no kuzileka zinzila zawo i zimbi. Hambi u Muwaha Mulungu nha kakondya kuwogofya muno i wanhu wawa, kwe likuwo lyakwe liwaha, hamonga no wukali wakwe.”

⁸ Ale, baho nayo Baluku, yakawa kuzisoma zinghani zose zo Muwaha Mulungu mu Nyumba yo Mulungu, yakatyatya nhavivilya du vyono namulajiliza yetume.

⁹ Na mu mwezi we licenda wa mu mwaka we 'hano, wa mu wutemi wa Yehoyakimu, lono yali yatemile mu yisi ya Yuda, i wanhu wakaleka kulya, ho watuje wendezwe wo Muwaha Mulungu. No wuleka kulya wuwo, wukawa wuwanojeye wanhu wose wono wekaye mu Yelusalemi, hamonga na wose wono wali wazize baho, wakulawa mu vikaya vya Yuda.

¹⁰ Nawo i wanhu lono wali wakondya kwikala, wahulicize, nayo Baluku yakawa kuzisoma zinghani zose zono namulonjelezaga, nayo yakuzandika mu kalatasi mhalinje ye ligolo-golo. Nayo yakazisomela zizi zose mu Nyumba yo Mulungu, mu cinyumba ca Gemaliya u mwana wa Shafani, u mwandici wa he 'kumbo lya hacanyha. Ne cinyumba cakwe cici, cali mwi'kumbo lya hacanyha, behi no Mulango mupya we Nyumba yo Mulungu.

Kalatasi mhalinje ye ligolo-golo yikusomwa hali wetumami

¹¹ Nayo Mikaya u mwana wa Gemaliya, kanyhi yo mwizukulu kwa Shafani, yali yeza kuzihulika zizi zikusomwa mu kalatasi mhalinje ye ligolo-golo, zono u Muwaha Mulungu yalonjile,

¹² hodu yakawa kutuluka, yakawa kubita kwi'kulu ko ku cumba co mwandici we likumbo, hono wali wehangulize hamonga i wetumami wose. Na wono wali wali baho, wali wo awa, Elishama u mwandici we likumbo, na Delaya u mwana wa Shemaya, na Elinatani u mwana wa Akiboli, na Gemaliya u mwana wa Shafani, na Zedekiya u mwana wa Hananiya, hamonga ne wetumami wanji wose, wali wali baho.

¹³ Nayo Mikaya yakawa kuwaloloseza zinghani zose zono yazihulice Baluku yakuwasomela wanhu.

¹⁴ Ale, baho, nawo i wetumami wawa, wakawa kumutuma Yehudi u mwana wa Nataniya, kanyhi yo mwizukulu wa Shelemiya, kanyhi yo mwizukulu civu wa Kushi, yabite yakamulonjele Baluku yayilete

¹⁵ hali wene yiyo kalatasi mhalinje ye ligolo-golo, yono yayisomile hali wanhu. Nayo Baluku yakawa kuyileta hali wene. 16 Nawo wakamutya, “Ale, wikale hasi, wucisomele nase kalatasi yiyo mhalinje ye ligolo-golo.” Nayo Baluku yakawa kuwasomela zose.

¹⁶ Ninga yali yeza kukondya kuwasomela zose, hobaho wose wakawa kwilanga munhu na muyagwe akuno wena no woga wuwaha. Wakawa kumulonjela Baluku wakatya, “Yicinojeye cimumanyize no mutemi nghani zizi.

¹⁷ Ninga hamba nhavivyo cikusaka wucimanyize nase ta, vyono wuzitujile zinghani zizi zose no kuzandika? Hamba Yelemiya yo yali kukulonjeleza nagwe wukuzandika lo?”

¹⁸ Nayo Baluku yakawapitula yakawatya, “Heya mbeka! Yelemiya yo yali kunonjeleza zinghani zizi zose, nane niwa kuzandika no wino, mu kalatasi yiyi mhalinje ye ligolo-golo.”

¹⁹ Nawo wakawa kumutya Baluku, “Alu hono yili nhavivyo, alu agwe hamonga na Yelemiya, mutize mubite mukehundice, hamba munhu yunji wo wose yalece kuhamanya hono mowa mwihundice.”

U mutemi Yehoyakimu yakuyikongoga yi yilya kalatasi mhalinje ye ligolo-golo

²⁰ Nawo wetumami wakawa kuyisola kalatasi mhalinje ye ligolo-golo, wakawa kuyiwika mu cinyumba ca Elishama u mwandici we likumbo. Wene wakawa kubita kwi'kumbo lyo mutemi, wakawa kumuloloseza mutemi zinghani zose.

²¹ Nayo mutemi yakawa kumutuma Yehudi yabite yakayilete yiyo kalatasi mhalinje ye ligolo-golo kuli mwene. Nayo Yehudi yakawa kubita yakawa kuyisola mu cinyumba ca Elishama, yakawa kumusomela mutemi hamonga ne wetumami wose wono wali wemile baho wamupilime.

²² Na mu mapango gago, wali mwezi we licenda, nayo mutemi yali yekaye i hanhu hono ho wuli moto mumo mwi'kulu, yakota moto ku soko vyali vilo vye cinyuli

²³ Nayo Yehudi yaza kuwa yasoma kalatasi yidatu hamba yine nhavi, hodu mutemi yakayidemulanga kalatasi yiyo ko mumaje, yakawa kuyigumila mu moto, nayo yikawa kuticimilila lukulu yose mu moto.

²⁴ Ninga nghani yo wizine, vyono mutemi hamonga ne wetumami wakwe wono wazihulika zizi zose, hamba si walajila wukalale yaye mu zinhumbula zawo.

²⁵ Hamba yiwe Elinatani na Delaya, hamonga na Gemaliya, wajela kumukaga mutemi, yalece kuyiticimiza kalatasi yiyo, ninga mwene mutemi hamba si yawacelelela yaye.

²⁶ Hanyuma ya zizo, u mutemi yakawa kumulajiliza Yelameli u mwana wo mutemi, hamonga na Selaya u mwana wa Aziliyeli, na Shelemiya u mwana wa Abideli, waze wanyibate ane Yelemiya, hamonga na Baluku u mwandici wangu. Ninga Muwaha Mulungu, yali yakondya kucihundika.

Yelemiya yakwandika kanyhi kalatasi yinji mhalinje ye ligolo-golo

²⁷ Baho u mutemi Yehoyakimu, yali yeza kukondya kuyiticimiza mu moto, i kalatasi mhalinje ye ligolo-golo, yono ane Yelemiya namulonjelezaga Baluku, nayo yakwandika, Muwaha Mulungu yakanonjela yakatya,

²⁸ “Gwe Yelemiya, alu wusole kanyhi kalatasi yinji yono yipalinjile ye ligolo-golo, wandice kanyhi zinghani zose zono wali wakondya kuzandika mu kalatasi nongozi mhalinje ye ligolo-golo.

²⁹ U Muwaha Mulungu yakanhuma mbite nghamulonjele mutemi Yehoyakimu nimutye nhavi, ‘Alu Yehoyakimu, vyono wakondya kuyiticimiza mu moto ayilya kalatasi mhalinje ye ligolo-golo, na kanyhi kuwa kumuwuza Yelemiya wukutya, ku sokoci kandika, nha vyono u mutemi wa Babiloni kolo kuza yayihodanje yisi yiyi, yawawulaje ne wanhu wayo wose, hamonga ne zimitugo zayo.

³⁰ Ale nane luno, ane no Muwaha Mulungu, nghukulonjela nha vyono, agwe mutemi Yehoyakimu, holowa hasina kanyhi hamba monga wa muli wanago, mono kolotema mu wutemi wa Dawudi. Sunga no muvimba wako, si wolozikwa yaye, langa wolotagwa du mwi'hala caka wutowe ne lizuwa, mwi'pango lye misi, na mu cilo namo, wuputwe ne mbeho nghali.

³¹ Nane nokulipiciza gwegwe ne wanago wose, hamonga ne wetumami wako wose, ku soko yo wubi wono mwitumile. Kanyhi yo nghani yo wizine, vyono gwegwe ne wanhu wa Yelusalemi ne wanhu wa Yuda, hasina hamba yumonga mono yaziceleleye zinghani zangu. Holeka nane luno, nomuletelenyi magazo mawaha nyenye wose, gono nali nakondya kugawaga vyono nomuletelenyi.’ ”

³² Ale, nane Yelemiya nghawa kuyisola kanyhi kalatasi yinji mhalinje ye ligolo-golo, nghawa kumupela Baluku u mwandici wangu. Nayo yakawa kuzandika zinghani zose nha vyono namulonjelezaga nene. Yakazandika zinghani zose du kanyhi, nha vyono zali zinha mu kalatasi nongozi, hamonga no wityatye wayo we zinghani zayo, nha vyono namulonjelezaga nene.