Lucas 24 - Kaxinawá Bíblia (BR)

Jesus maiwaxinabu bestẽkaina benanibukiaki, na hãtxarã

¹ hanua ma huĩrukũti binuxĩkẽ domingotiã penamahaira maiwati tãpe anu bukatsi hawẽ dapushti sheni ma pewaxinabu buaibũ aĩbu betsaburi hatu txibaĩ hatube bui

² kematã ha mixki beputi ewapahaira tsuãra ma tarãbu betxitã

³ hikikaĩ Shanẽ Ibu Jesusũ yura hawa betxiama

⁴ hani tsuã haskara waxina unãma hanua e iki keyutã uĩaĩbũ habianuri hawaira huni dabe hatu bebũ tashnia tari hushupa txashahaira sawea betxitã

⁵ haska uĩ datehairai maĩ beui beti ikaibũ huni dabetã hatu yuikĩ: —Haskakĩ maiwati merã huni hiwea mã benakanai?

^6-7 Nenumaki. Ma bestẽkainaki. Galiléia anushũ matu yusĩkĩ yuikĩ: “Earã, matũ Hutxi Kayabi Iuwa huni txakabũ ea atxishũ hiki ea mastabu mawa shaba dabe inũ besti kaya ẽ ana bestẽshanaii, haska Deusũ yubanirã”, akĩ matu yusĩkĩ yuimarã, mã xinãmamẽ? Xinãkãwẽ— hatu wa

⁸ haska Jesusũ hatu yuima ikũ xinãtã

^9-10 maiwati tãpe anua kaĩbaini Maria Madalena inũ, Joana inũ, Tiagõ ewa Maria inũ, aĩbu betsabu habũ kaka bushũ Jesusũ 11 tsuma kuxipabu inũ habũ Jesus txibãmis betsabu haska uĩkãshu hatu yuibiabu

¹¹ hatũ hãtxa hawa ikũwãma: “Haskatãrũ haskanũ humei ikanikiki”, ikaibũ

¹² hanua Pedro hari txaniaibũ nĩkatã: “Eãri uĩtanũ”, ika tashnikaini maiwati tãpe anu kuxikaĩ uĩnũ ika kakui denikaĩ uke merã uĩkĩ hawẽ yabuxinabu tari hamauri daka uĩtã haska uĩ e iki teku itã Pedrõ haskaxina xinaĩ xinãyabi kaya

Emaús maekiri bai tanabainaibu Jesus hatuki nukunikiaki, na hãtxarã

¹³ hanua Jerusalém anua bui 11 quilômetro mae betsa hawẽ kena Emaús anu habias shabatiã Jesusũ tsuma betsabu dabe bui

¹⁴ haska wakeaketã tenãxinabu bestẽkainakiri hãtxai

¹⁵ yuinamekubainaibũ habiatiãri Jesus hatu itxũ tashnitã kakĩ hatu txibaĩ kai hatuki nukukainaya

¹⁶ hau unãyamanũbũ Deusũ hatũ beru betsa wa

¹⁷ hanushũ Jesusũ hatu yukakĩ: —Bai tanabiranirã, hawa yui mã ikubaĩkanai?— hatu wakĩ ana hatu nui txipea nuiyabi buaibũ

¹⁸ hanushũ habu betsa Cleopasĩ yuikĩ: —Jerusalém anua haska dasibi waxinabu dasibibũ unãkanikiki. Jerusalém anu bai hubiaxina haskakĩ miã besti mĩ haska uĩyama ixiãmẽ?— aka

¹⁹ hanushũ hatu yukakĩ: —Haskaxinamẽ? Ea yuiwe— aka ana yuikĩ: —Jesus Nazaré anua ewani itxakawakĩ eskaya tenãxinabuki. Mia yuinũ nĩkawe. Deusũ hãtxa yuishunika pepahaira eskakĩ Deus inũ yura itxapabu hawẽ aka uĩmakĩ daya duapa inũ hãtxa kuxipai unãnepai

²⁰ pepahairabiakẽ hau tenãnũbũ Deusbe nukunabu hãtxashunika shanẽ ibubu inũ nukũ mae shanẽ ibu betsabũ nawabu anu Jesus yunuabu cruzki hatu mastamabu mawaxinaki.

²¹ Ha inũ, Jesusũ nawabu nitxĩkĩ Israelbu nuku pe mekekĩ Deus nuku daewashũshanai dabanẽ nũ hamẽ dasibi manakakubaĩxinaki. Ha inũ, ma shaba dabe inũ besti binubiakainaya nũ hawa uĩriamaki.

^22-23 Haska inũ, nukubetã habũ Jesus txibãriamisbu aĩbuaibu penamahaira maiwati tãpe anu bushũ Jesusũ yura hawa uĩama nai tsuma dabe hatu betxãkamea nia uĩaĩbu hatu yuikĩ: “Jesus hiweaki”, hatu wa beshũkiaki. Haska nuku yuiabu datei nuku dateabu e itã nũ nĩkaki.

²⁴ Haska nukuki txaniaibũ nukũ haibu betsaburi maiwati tãpe anu bushũ haska aĩbuaibũ yuishu keska uĩkĩ hawa Jesus uĩyama iriakãshukiaki— aka

²⁵ hanua Jesusbe hãtxai unãriabuma Jesusũ hatu yuikĩ: —Deusũ hãtxa yuishunikabũ merabenã Messias Cristokiri kenenibu unãbiakĩ unãshubira ikũ beshmas wakĩ xinã pewariama mã kaneaii.

²⁶ Nukũ merabenã Messias shanẽ iburiama hau haskai yumaĩ kanũ Epa Deusũ yununiki— iwanã,

²⁷ Deusũ Moisés yusĩa keneniwẽ hatu yusĩ taewakĩ Deusũ hãtxa yuishunikabu dasibibũ yusĩa hãtxawẽri Jesusũ hatu yusĩkĩ hatu unãmakubainaya

²⁸ Emaúski kemai buaibũ hatu binubainai dabanẽ

²⁹ nemakĩ yuikĩ: —Ma bari kai mexuikiki. Habianu nukube niti iyuwe— akabu nĩkatã habianu hatube baxikui niti itã

³⁰ habianushũ hatubetã pinũ ika bashti itã misi bishũ piti hayabuwẽ taeshũ Deus kẽwãtã tũkeshũ hatu inãyã

³¹ habiatiãri Deusũ hatũ beru ana betsa waya Jesus uĩkĩ unãtanaibũs samama ana damikainaya

³² ha dabetã xinaĩ yuinamekĩ: —Bai tanabirãkĩ Deusũ hãtxa yuishunikabũ yusĩni nuku unãmakĩ nuku yusĩayã nũ huĩti xinã txãkãkũkirãshuki, haskamamẽ?— iki yuinametã

³³ ma mexubiakẽ ana hanu ikatsi ikama benibirani Jerusalém anu hawaira txĩtũbaĩ Jesusũ 11 tsuma kuxipayabu inũ hatube hawẽ tsumabu betsabu itxabu anu hatu anu hikituxitã

³⁴ hanushũ habu itxapabu yuikĩ: —Ikũki! Ma besteãki, nukũ Shanẽ Iburã, ha Simão Pedroki nukukĩ uĩmashurã— iwanã, yui hatuki txaniaya

³⁵ hanushũ haska Jesus unãriamabia bai tanabaĩkĩ Jesusũ ha dabe hatube kakĩ yusĩshu yuitã hanushũ misi tũkeshũ hatu inaĩ anu atimas shabakabi uĩbirã hatu yuiaibũ

Jesus bestẽkaina hawẽ tsumabuki nukunikiaki, na hãtxarã

³⁶ haskashu yui meneriama hãtxã waĩbũ Jesus hawaira dami naxui itã hatu hãtxa wakĩ yuikĩ: —Haska mã unãnumamẽ? Ma ẽ huaki. Dateyamakãwẽ— hatu wabia

³⁷ datekĩ xinãkĩ yuikĩ: “Narã, yushĩmẽkaĩ?” ikĩ uĩkĩ xinaĩbũ

³⁸ Jesusũ ana hatu yuikĩ: —Haskai mesei datei mã e ikanai? Mã huĩti kuximẽ?— iwanã,

^39-40 hawẽ mekẽ inũ hawẽ tae hatu uĩmakĩ yuikĩ: —Ẽ tae inũ ẽ mekẽ uĩkãwẽ, habia ẽ eakirã. Nami inũ shau ẽ haya keska yushĩ hayaismaki. Mekĩ ea unãkãwẽ— hatu wa

⁴¹ xinã txãkãbiai bika tenekĩ ikũhairawariabuma xinã dabewaibuwẽ taeshũ Jesusũ ana hatu yukakĩ: —Piti mã hayamẽ? Ea inãkãwẽ— hatu wa

⁴² baka shui inãbu

⁴³ hatũ berubi pitã

⁴⁴ yuikĩ: —“Moisés yusĩni hãtxa inũ Deusũ hãtxa yuishunika betsabũ yusĩni hãtxa inũ Davĩ hawẽ nawakĩ kẽwãti hãtxa Salmoswẽ Deus yubakaniki, hau dasibi haskashanunã”, iwanã, yuinibu ẽ mawariama matu anushũ habiaskari matu yusĩkĩ dasibi ekiri na kenenibu bebũkiri ẽ matu yuikubainimaki— iwanã,

⁴⁵ ha kenenibu una hau nĩka pewanũbũ

⁴⁶ hatu yuikĩ: —Ekiri kenenibu matu yuinũ nĩkakãwẽ. Deusũ Katua Messias merabenã yumãtã mawa shaba dabe inũ besti kaya ana bestẽshanikiki.

⁴⁷ Haskawẽ taeshũ hawẽ kuxipawẽ hatu yusĩshãkanikiki, hau hatũ txakabu Deuskiri txakabumisbu hau henetã habũ xinã betsa waibu Deusũ buashũshanikiki. Nawa shukua tibi nĩkashanaibu yuini matũ Jerusalém anushũ taewakĩ

⁴⁸ na kakape ekiri txanibaũshãkãwẽ.

⁴⁹ Haska ẽ Epã ea yununi keska wakĩ eãri ẽ maturi yunuaii. Deusũ hawẽ hãtxati kuxipa datetima ẽ matu yunushanai binũ ika na habia Jerusalém anu hiweyushũ manakayukãwẽ. Deusũ hawẽ kuxipa nai anua matu inã bitã nawa dasibibu yusĩkĩ taewashãkãwẽ— hatu watã

Jesus hawẽ tsumabũ berubi Deusũ aininikiaki, na hãtxarã

⁵⁰ haskakũkaĩkĩ shaba betsatiã Jerusalém anua kaĩkaini Betânia anu Jesus kakĩ hawẽ tsumabu iyushũ hawẽ mekẽ sanãshũ hau Deusũ hatu duawakubaĩshanũ hatu yukashunaya

⁵¹ habu henemabaĩkĩ nai anu hawẽ Epã ainiaya

⁵² hatu henebainai uĩ hawẽ tsumabũ teskãbaĩbaĩshũ Jesus kẽwãtã benimahairai Jerusalém anu ana txĩtũbirã

⁵³ Deusũ kuxipa manakakĩ shaba tibi hawẽ Templo anushũ Deus kẽwãkubainibukiaki. Hatiski, Teófiloõ, na kakape ẽ mia kene keyushũshurã. Lucas