Fitew Dase 12:17 - Sunbin-Got em Kitakamin Weng

¹⁷ Kanese kasike, sokyan okgung kayak sel be waneng ulo kaisuw fian mak keumsomi, um angin Sunbin-Got em sawa weng afak gelewbomi, Yesus em sang bakayemkabiliw kunum waneng mali iso genen unei, ne atemsi te.

Fitew Dase 12:17 Cross References

Talfut Kese 3:15

Keko beli, kom tele, waneng buum tele, maka kelew kelew keem kakamokoliw te. Kate, deiw mak ding mak e, um angin mak teleko, kom kak kawtol kekemoke te. Kawtol kekemei, kusik em yan golgol beelo ning tamolokolew te.”, dangse kale.

Matyu 28:20

Keyemsomi, ilo nem yulo kukuyemsi weng alik alik bakati ‘Yu kanelina!’, yangeko, kukuyemoliwka! Yu kilele kililina! Kawin kale banimoke kate, ne sunsun yuso boki te!”, yangse kale.

Sion 8:44

Yom fein kalew e Seten-Ataanim ete te. Kasike, yu akalem ibolow fukunin kuw geleweko, aluwkabiliw te. Sua kel elote, e kawtiw yemale finik wa keko, fein weng kakamele deiw gelewinba kekakawkabe kale. E dasuw weng em mongom sen kayak kebe kasike, em funum weng ange ding dim kabalak e, e akalem dasuw kukuw ete kuw gelewkabe te.

1 Kolin 2:1

Nakunum kumel kunum waneng yutaka! Nem yom dim teleko, Sunbin-Got em Weng Kal Ken Ati ibolow win sang be bakayemali ding dim bakate, ne weng ken so, abal so, kal fian so, de teleko, bokoyeminba kemali te.

1 Fita 5:8

Kaneko kasike, yukati kilelbiko, kuteboliwka! Nimtew angom? Yom maka Seten-Ataanim e alaion em samal an wanomin tew donong donong keko, gaaneko, fenkabe atew kebe kasike.

1 Sion 2:3

Kuanse kasike kame, nu Sunbin-Got em kukuyemin weng be gelewemuw tewe, nu kal keluwete: Nu Sunbin-Got em ibolow fukunin bakati kal kesomi, gelewkabuluw te.

1 Sion 5:10

Kaneko kasike, Sunbin-Got em weng kale kiliko, em Min elo “Fein!”, dangbiliw kunum waneng i akalem angse weng be ikalem ibolow tem ka kel kitil kuw aluwkabiliw te. Kate, Sunbin-Got em Min elo “Fein!”, danginba kebiliw kawtiw i Sunbin-Got elo dasuw bakabe kunum atew kelewkabiliw te.

1 Sion 5:2

Nu Sunbin-Got elo ibolow mutuk fian keleweko, em kukuyemin weng beem afak kakamuw tewe, nu num kanekabuluw beem mongom ete kilele kal keluwete: Nu Sunbin-Got em angin ikati fein ibolow mutuk fian keyemkabuluw te.

Fitew Dase 1:2

Kalenemei, nesik Sunbin-Got em weng so, Yesus Kulais em kukunemei, ne atemsi eisneng beso, alik alik angom be yulo kilele bokoyemeko, kaim dim dali te.

Fitew Dase 1:9

Sion nakal yomdiw Yesus Kulais elo “Fein!”, dangii, eso nuso alik nu makuw bongguko, fewtokoko, beem dulum elote betbet kulusomi, em dokoyemoke ding fenbuluw kunum waneng nute te. Feinka! Ne mali kawtiw ilo Sunbin-Got em weng so, Yesus em sang so bakayembisi te. Bakayembi beem mongom ete, i nelo okgung Fatmos kel sok am tem da konemiwi, ne kale kel bi te.

Fitew Dase 11:7

Keko beli, aso im aluwbabiliw ding be ki keko, banimoke ding dim e, kut samal atul nam mak diw tengew dakaw koleweko, matem telesomi, aso iso genesomi, emel kuw keko, ilo yenei, aso i kuanokoliw te.

Fitew Dase 12:16

Kate, kawin esik bontem busuko, ok be wanei, waneng buulo dokoumei, ne atemsi te.

Fitew Dase 13:7

Keko beli, Sunbin-Got e aneng matil beelo kitil duleweko, bokolewomele: “Nem galmosi kunum waneng iso genesomi, komel kuw keko, ilo yeneko, de mit da koyemolewka! Koyemsomelewi, kawin fe abiil fe aneng aneng angom biliw kawtiw iso, weng amen amen bakabiliw kawtiw iso, kal amen amen kebiliw kawtiw iso, alik alik biim emisik kamokim fian kelolewka!”, dangei, ne kiliko, atemsi te.

Fitew Dase 14:12

Kaneloke eisneng be Sunbin-Got akalem sawa weng afak kebomi, Yesus elo fein ibolow dulewbomi, Sunbin-Got em galmose kunum waneng kebiliw kunum waneng biim fein ibolow e kitil keyemboka!

Fitew Dase 17:14

Kelewsomeliwi, i bongguko, Siwsiw Men so ganokoliw kate, Siwsiw Men bete emel kuw keko, ilo de mit da koyemoke te. Nimtew angom? Ete kuw emisik keko, alik alik kamok fian kebiliw im Kamok Fian te. Ete kuw alik alik kak kunum kebiliw im Kak Yetebe Kunum kebe kasike. E akalem ibik elo kelewsiliw kunum waneng ilo kilele yemdeko, akalem wiin so galmoko, dukuyemei, i kilele keko, em weng afak kuw kesomi, gelewkabiliw te.”, nangei, ne kilisi te.

Fitew Dase 17:6

Atebi ding dim bakate, ne atemite: Waneng bu Sunbin-Got em galmose kunum waneng so, Yesus em kalan weng deibisiliw kunum waneng iso, alik alik biim kaim dulu wanesomelui, mamtel keko, wain ok banban wanakabiliw kawtiw im kanekabiliw atew kemui, ne watemsi te. Watemeko, “Ibo! Yakai! Be nomin em mongom a?”, angeko, yol angsi te.

Fitew Dase 18:20

Abiil tikin alakabiliw yemdakamin finik yutaka! Sunbin-Got eso galmose kunum waneng so, kalan kunum so, em bontem dim bakamin kunum so, alik alik yu kanele eisneng be atemeko, kalfongemoliwka! Nimtew angom? Sunbin-Got e abiw mutuk fian beelo diwdeweko, geelewbe kasike.”, angiwi, ne kiliko, yetemsi te.

Fitew Dase 19:10

Nangse dim bakate, ne dabalakamin finik beem mit mewso katin bukbuk angeko, em wiin daolew kelomin kemii, e nelo bokonemomele: “Babo! Ku kanelom nem wiin daonemokolew te! Nakati kuso, kukalem kawkunum kumel Yesus em sang bakamkabiliw kunum waneng iso, alik nu makuw Sunbin-Got em weng afak kakabuluw kasike. Ku Sunbin-Got em wiin fian ete kuw daolew kemolewka! Nimtew angom? Sunbin-Got em bontem dim bakamin kunum i Yesus em sang bete kuw bakayembiliw bakate.”, nangei, ne kilisi te.

Fitew Dase 19:19

Atebi ding bakate, aneng matil so, kawin dim kaleem kamok fian iso, ikalem wonuk so kunum iso, alik alik bi bongguko, ganomin memen keliwi, ne yetemsi te. Alik alik bi memen keko, kos namal nam em dim teinbe kunum beso, akalem angin alik alik biso ganomin memen keliwi, ne yetemsi te.

Fitew Dase 20:4

Atebi ding bakate, mali teinkemin abin ayem mak atemsi te. Sunbin-Got e beem dim teinbiliw kunum waneng biilo wiin so keyemei, i mali kawtiw ilo diwyemeko, geeyemin kunum waneng kebiliwi, ne yetemsi te. Yetebi ding bakate, mali kunum waneng Yesus em sang bakayem tem kakabiliwi, maka i ilo kak goto yeniwi, i kuansiliw kunum waneng im finik bikati yetemsi te. Kunum waneng bi aneng matil so, akalem takak kiskiw beem wiin daolewinba kesomi, aneng matil beem bat so akal dukuyeminba kesiliw kasike, i kame iti finik so baba teinsomi, siliwi, i Kulais eso itol tausen makmak aliwi, ne yetemsi te.

Fitew Dase 22:14

Ikalem ilim gingkabiliw kunum waneng kesomi, “Abiw mutuk fian beem wati abisom matem elo uneko, sunsun finik so duyemkabe ais beem dem wanuma!”, angbiliw kunum waneng i kakateko, kalfongemoliwka!

Fitew Dase 6:9

Atebi ding dim bakate, Siwsiw Men be fut beem ketket ais kin so sok einggesiliw beelo silel kelewei, ne atemsi te. Kelewei, ne aik ayem beem afak dim kel mali kuansiliw kunum waneng biim finik yetemsi te. Kunum waneng bi Sunbin-Got em weng kilele aluweko, ikalem mali kawtiw ilo Kulais em sang bakayemsiliw beem mongom e kal anggil ilum kulusomeliwi, maka i ilo yeniwi, i kuansiliw te.