Miqueas 6:7 - Ang Pulong sa Dios

⁷ Malipay kaha ang  Ginoo kon halaran ko siya ug linibo ka mga karnero ug daghan kaayong lana sa olibo? Ihalad ko ba kaniya ang akong kamagulangang anak isip bayad sa akong mga sala?

Ang Biblia 2011

⁷ Mahimuot ba ang Ginoo sa mga linibo ka laking karnero, uban sa napulo ka libo ka suba sa lana? Ihatag ba nako ang akong kamagulangang anak tungod sa akong kasal-anan, ang bunga sa akong lawas tungod sa sala sa akong kalag?”

Maayong Balita Biblia

⁷ Malipay ba ang Ginoo sa linibong karnero ug sa nagbaha nga lana sa olibo? Dili! Igo na ba kon ihalad ko ang kamagulangan kong anak alang sa akong sala? Dili!

Ang Bag-ong Maayong Balita Biblia

⁷ Malipay ba ang Ginoo sa linibong karnero ug sa nagbaha nga lana sa olibo? Dili! Igo na ba kon ihalad ko ang kamagulangan kong anak alang sa akong sala? Dili!

Miqueas 6:7 Cross References

2 Mga Hari 16:3

Gisunod niya ang mga gawi sa mga hari sa Israel, ug bisan ang iyang anak gihalad niya sa kalayo. Gisunod niya ang mangil-ad nga mga buhat sa mga nasod nga gipaabog sa Ginoo sa mga Israelinhon.

2 Mga Hari 21:6

Gihalad niya ang iyang kaugalingong anak sa kalayo. Gibuhat usab niya ang mga buluhaton sa mga manalagna, mga mamamarang, ug nangutana siya sa mga espiritista nga nakigsulti sa kalag sa patay. Labihan gayod ang iyang pagpakasala atubangan sa Ginoo, ug nakapasuko kini sa Ginoo.

2 Mga Hari 23:10

Gipaguba usab ni Haring Josia ang halaran sa Tofet, sa Walog sa Ben Hinom, aron wala na didtoy maghalad sa iyang anak sa kalayo alang kang Molec.

2 Mga Hari 3:27

Busa gikuha niya ang iyang kamagulangang anak nga mao unta ang mopuli kaniya ingon nga hari, ug gisunog niya kini sa may paril ingon nga halad. Tungod niini labihan gayod ang kasuko batok sa mga Israelinhon, busa gipasagdan nalang nila ang hari sa Moab ug mipauli sila sa ilang nasod.

Job 29:6

Niadtong mga panahona, ang akong mga baka naghatag ug daghan kaayong gatas, ug ang akong mga olibo naghatag ug daghan kaayong lana.

Salmo 50:9

Wala ako magkinahanglan sa inyong mga torong baka ug kanding,

Salmo 51:16

Dili mo ikalipay ang mga halad, bisan pa ug mohalad ako kanimo ug halad nga sinunog, dili ka malipay niini.

Salmo 51:18

O Dios, panalangini ang Jerusalem sumala sa imong kaayo. Tukora pag-usab ang mga paril niini.

Mga Panultihon 15:8

Ngil-aran ang  Ginoo sa halad sa mga daotan, apan gikalipay niya ang pag-ampo sa mga matarong.

Mga Panultihon 21:3

Mas ikalipay sa Ginoo ang husto ug matarong nga binuhatan sa tawo kaysa iyang mga halad.

Isaias 1:1

Kini nga libro mahitungod sa gipadayag sa Dios kang Isaias nga anak ni Amos. Bahin kini sa Jerusalem ug sa Juda niadtong panahon sa paghari nila ni Uzias, Jotam, Ahaz, ug Ezequias sa Juda.

Isaias 40:16

Ang kahayopan sa Lebanon dili igo nga ihalad ngadto kaniya, ug ang mga kakahoyan niini dili paigo nga isugnod sa mga halad.

Jeremias 19:5

Nagpatukod silag mga halaran alang kang Baal, nga sunogan nila sa ilang mga kabataan ingon nga mga halad nga sinunog ngadto kaniya. Wala gayod ako maghisgot ni magsugo niini kanila; wala gani kini mosantop sa akong huna-huna.

Jeremias 6:20

Walay bili kanako ang gihalad nila nga insenso nga gikan pa sa Sheba, o ang mga pahumot nga gikan pa sa layong dapit. Dili ko dawaton ang ilang mga halad nga sinunog. Ang ilang mga halad dili makapalipay kanako.”

Jeremias 7:31

Nagpatindog usab silag simbahanan diha sa habog nga mga dapit sa Tofet, sa Walog sa Ben Hinom, aron didto nila sunogon ang ilang mga anak ingon nga ilang halad. Wala gayod ako magsugo niini kanila. Wala gani kini moabot sa akong huna-huna.

Ezequiel 23:37

Kay nakapanapaw sila ug nakapatay. Nakapanapaw sila pinaagi sa pagsimba sa mga dios-dios, ug ang ilang mga anak mismo, nga gidedikar nila kanako sa natawo sila, gihalad nila sa mga dios-dios ingon nga pagkaon niini.

Oseas 5:6

Mohalad kamo kanako ug mga karnero, kanding ug baka, apan dili ninyo masinati ang akong presensya kay magpahilayo ako kaninyo.

Oseas 6:6

Kay dili ang inyong mga halad ang akong gusto kondili ang inyong gugma. Mas gusto ko pa nga ilhon ninyo ako kaysa maghalad kamo ug mga halad nga sinunog.

Levitico 18:21

“ ‘Ayaw ihatag ang bisan kinsa sa imong mga anak aron ihalad ngadto sa dios nga si Molec, kay makahatag kana ug kaulawan sa pangalan sa imong Dios. Ako mao ang Ginoo.

Levitico 20:1

Miingon ang Ginoo kang Moises,

Amos 5:22

Bisan pag dad-an ninyo akog mga halad nga sinunog, dili ko kana dawaton. Ug dili ko usab hatagag pagtagad bisan ang labing maayo ninyong mga halad alang sa maayong relasyon kanako.

Filemon 1:12

Karon pabalikon ko diha kanimo ang akong minahal nga si Onesimo.

Mga Maghuhukom 11:31

ang unang mogawas sa akong balay aron sa pagtagbo kanako inig-uli ko nga madaogon, ihalad ko ingon nga halad nga sinunog diha kanimo.”

Mga Maghuhukom 11:39

Human sa duha ka bulan, mibalik siya sa iyang amahan. Gituman ni Jefta ang iyang gipanumpa sa Ginoo ug namatay ang iyang anak nga usa ka putli. Sukad niadto, nabatasan na sa Israel

1 Samuel 15:22

Apan mitubag si Samuel, “Mas malipay ba ang Ginoo sa inyong mga halad kay sa inyong pagtuman kaniya? Ang pagtuman sa Ginoo mas maayo pa kay sa paghalad kaniya sa tambok sa mga karnero.