Jeremias 10:16 - Ang Pulong sa Dios

¹⁶ Apan ang Dios ni Jacob dili sama niana. Siya ang naghimo sa tanang butang, apil ang Israel, ang katawhan nga iyang gipanag-iyahan. Ginoo nga Makagagahom ang iyang ngalan.

Ang Biblia 2011

¹⁶ Dili sama niini siya nga mao ang bahin ni Jacob, kay siya mao ang naghimo sa tanang mga butang, ug ang Israel mao ang banay sa iyang panulundon; si Yahweh sa mga panon mao ang iyang ngalan.

Maayong Balita Biblia

¹⁶ Ang Dios ni Jacob dili sama kanila; siya ang nagbuhat sa tanang butang ug gipili niya ang Israel aron mahimong iyang katawhan. Si Yahweh nga Labing Gamhanan ang iyang ngalan.

Ang Bag-ong Maayong Balita Biblia

¹⁶ Ang Dios ni Jacob dili sama kanila; siya ang nagbuhat sa tanang butang ug gipili niya ang Israel aron mahimong iyang katawhan. Si Yahweh nga Labing Gamhanan ang iyang ngalan.

Jeremias 10:16 Cross References

Salmo 119:57

Ikaw lang gayod Ginoo ang akong gikinahanglan. Nagsaad ako sa pagtuman sa imong mga pulong.

Salmo 135:4

Dayega ninyo siya kay gipili niya ang katawhan sa Israel nga mga kaliwat ni Jacob, nga mahimong iyang pinasahi nga katawhan.

Salmo 142:5

Nagpakitabang ako kanimo, Ginoo; ikaw ang akong tigpanalipod, ikaw lang gayod ang akong kinahanglan dinhi sa kalibotan.

Salmo 33:6

Pinaagi sa pulong sa Ginoo, nahimo ang kalangitan: ang adlaw, ang bulan, ug ang mga bitoon.

Salmo 73:26

Magmaluya man ang akong lawas ug huna-huna, apan ikaw gihapon, O Dios, mao ang akong kusog. Ikaw lang gayod ang akong gikinahanglan hangtod sa kahangtoran.

Salmo 74:2

O Dios, hinumdomi ang imong katawhan nga gipili mo kaniadto nga mahimong imo ug giluwas aron imong panag-iyahon. Hinumdomi ang Bukid sa Zion diin ikaw nagpuyo.

Exodo 19:5

Kon tumanon ninyo ako sa hingpit ug mosunod sa akong kasabotan, mahimo kamong akong katawhan nga pinili gikan sa tanang mga nasod. Akoy tag-iya sa tibuok kalibotan,

Exodo 34:9

Miingon siya, “O Ginoo, kon nalipay ka kanako, naghangyo ako nga ubanan mo kami. Bisan ug gahig ulo kining mga tawhana, pasayloa kami sa among kadaotan ug sa among mga sala. Dawata kami ingon nga imong katawhan.”

Mga Panultihon 16:4

Tanang gihimo sa Ginoo adunay katuyoan, bisan ang mga daotan nga gitakda niya nga malaglag.

Isaias 19:25

Panalanginan sila sa Ginoo nga Makagagahom nga mag-ingon, “Gipanalanginan ko ang Ehipto nga akong katawhan, ang Asiria nga akong gibuhat, ug ang Israel nga akong gipanag-iyahan.”

Isaias 45:7

Ako ang naghimo sa kahayag ug sa kangitngit. Ako ang nagdala sa kaayohan ug sa katalagman. Ako, ang  Ginoo, mao ang naghimo niining tanan.

Isaias 47:4

Ang atong Manluluwas, kansang ngalan Ginoo nga Makagagahom, mao ang Balaang Dios sa Israel.

Isaias 47:6

Nasuko ako sa katawhan nga akong gipanag-iyahan, ug gisalikway ko sila. Busa gitugyan ko sila sa imong mga kamot, ug wala mo sila kaloy-i. Bisan gani ang mga tigulang kanila imong gidaog-daog.

Isaias 51:15

Kay ako, ang  Ginoo nga inyong Dios, ang nagkutaw sa dagat aron modahunog ang mga balod. Makagagahom nga Ginoo ang akong ngalan.

Isaias 54:5

Kay ako nga imong Magbubuhat mahimong ingon sa usa ka bana kanimo. Makagagahom nga Ginoo ang akong ngalan. Ako, ang Balaan nga Dios sa Israel mao ang imong Manluluwas. Gitawag ako nga ‘Dios sa tibuok kalibotan.’

Jeremias 10:12

Apan ang Dios maoy naghimo sa langit ug sa kalibotan pinaagi sa iyang gahom ug kaalam.

Jeremias 10:6

O Ginoo, wala gayoy sama kanimo. Gamhanan ka ug halangdon ang imong ngalan.

Jeremias 31:35

Unya miingon ang  Ginoo, “Ako ang nagmando sa adlaw nga mohatag ug kahayag inigkaadlaw, ug sa bulan ug sa mga bitoon nga mohatag ug kahayag sa panahon sa kagabhion. Ug ako ang nagkutaw sa dagat aron modahunog ang mga balod. Ginoo nga Makagagahom ang akong ngalan.

Jeremias 32:18

Gipakita mo ang imong gugma sa libo-libong katawhan, apan gisilotan mo ang mga anak tungod sa sala sa ilang mga ginikanan. Ikaw ang Dios nga labing gamhanan, Ginoo nga Makagagahom ang imong ngalan.

Jeremias 33:2

Mao kini ang gisulti sa Ginoo nga naghimo ug nagpahimutang sa kalibotan, ang  Ginoo ang iyang ngalan:

Jeremias 46:18

“Ako, ang buhi nga Hari, ang  Ginoo nga Makagagahom, magsaad nga adunay mosulong sa Ehipto nga labaw kaniya, sama sa Bukid sa Tabor sa taliwala sa kabukiran, o sa Bukid sa Carmel daplin sa dagat.

Jeremias 50:34

Apan gamhanan ako nga ilang Manluluwas; Ginoo nga Makagagahom ang akong ngalan. Labanan ko sila aron mahatagag kalinaw ug kapahulayan ang kalibotan. Apan guboton ko ang mga lumulupyo sa Babilonia.

Jeremias 51:19

Apan ang Dios ni Jacob dili sama niana. Siya ang naghimo sa tanang butang, apil ang katawhan nga iyang gipanag-iyahan. Ginoo nga Makagagahom ang iyang ngalan.”

Mga Pagbangotan 3:24

Miingon ako sa akong kaugalingon, “Ang Ginoo mao ang tanan alang kanako, busa molaom ako kaniya.”

Amos 4:13

Ang Dios mao ang naghimo sa mga bukid ug sa hangin, ug siya usab ang naghimo sa kabuntagon ug kagabhion. Gipadayag niya sa tawo ang iyang mga plano, ug siya ang naggahom sa tibuok kalibotan. Ginoong Dios nga Makagagahom ang iyang ngalan.

Zacarias 2:12

Panag-iyahon pag-usab sa Ginoo ang Juda isip iyang bahin sa balaang yuta sa Israel. Ug ilhon niya pag-usab ang Jerusalem nga iyang piniling siyudad.

Deuteronomio 32:9

Karon gipili sa Ginoo ang mga kaliwat ni Jacob ingon nga iyang katawhan.