Matthew 24:15 - ASII LAKDAP Bible (BSI)

¹⁵ “Daniel shammi we raq, ‘Riiqkhiq Ashe Sumla Ka Shomjam Na Miraq,’ nguta chongthütaq bomtsi kra kupi wan ka namshiq riishe michhi han. Kriika Shomjam mong na Asii khok kiijaq chap raü michhi han.” (Aphat wanti raq ara liichum arka samhea maq tak rong laq!)

Hawa Naga Bible 2001

¹⁵ “Shvmmax Daniel rueq jungx wvnc tueq, ‘Tvbac tac yaq,’ vkawc yawc suirsac juing ikhoc phvnx kuex nuimshiq rueq khiz shuinx. Kvruex kuex vsawc baung nuex jvp tuex.” (Luik wvlc lawc jix waz rueq vruex lvmx khic roc kuex honc maq tuiuz tay juing rvtueq!)

Muklom

¹⁵ “Rangsamal Daniel batta mal ‘Chopan raaq’ sha asang haq na lang eq kap khi ujo, (iri phattey usam eq u)

Matthew 24:15 Referencias Cruzadas

JEREMIA 44:29

Arka Ngi, Tatiwe raq, namshiq ma ijaqsham maq mitiichhikuq wanha. Ngi raq namshiq ma ara hiqshong arjiili mo mitiihoha kiimaq Ngi raq namshiq ka chongthum ma mitiijabaiqha ngutiikang kriika tengteng mikloha.

EJEKIEL 40:4

Apaiq raq ngi ma nguto, “Tiitsang liilaq, maiqse lei. Samheawiq tiitsang dada tailaq kiimaq Ngi raq ümniima jamlai wa tiichhikuq tiikang kriithun ka samhea shrira liilaq. Laüta tsan na tiitsang thülaq. Jamkhano ngukla ara miitu ümniika arjaq sheahoto. Ümniiraq ümmak maq jamlai wa chhitlaü thun ka Israilnok ma chongke chang miraq.”

DANIEL 1:6

Kra tsea wantaq phong mong niika, Daniel, Hanania, Mishael, kiimaq Ajaria riito. Tsangshiq ka Juda phan wa.

DANIEL 11:31

Apaiq phenlabi wiijamti raq Shomjam ka mitiishe baiq. Raüta tsangshiq raq Shomjam na ranaiqtek honglu kuq tlaq kra atiithaq mirbaiq. Raüta Riikhiq Phiiptsi Chang Sumlakaü she mitiinga shong.

DANIEL 12:11

“Ranaiqtek honglu kewan kra tangtabaiq wan jai maq, kriika, Riikhiq Phiiptsi Chang Sumla Kaü shong wantaq kra ranaiq akhing nang nga ngutlo, kra ranaiq maq phawan raüta, ranaiq 1,290 ranaiq na saüli miraq.

DANIEL 9:23

Ümtiikiiwa ümniiraq Shiikeawe ma tiipaiq nea wan laü, apaiq raq ümnaq achu jaü ka treto. Apaiq raq ümnaq lungwiitlo. Kra ningkhan ngi ka ümniipha na kra bomtre liichum kra chongkekai saükikang. Riita ümchaü min riisham bomtsi liichum kra chongpha samhea tiitsang tailaq.

DANIEL 9:25

Ara bomtsi ara ümtsan na samhea tiitsang shaq laq. Laüta liichum ka tak laq: Jerusalem chela kra tiihea haiwan miitu, aming tat tlaq kra akhing maq phawan raüta, Shiikeawe raq asengi sheati wela weshi shong wan tlaq kra akhing na saüli ka, jang miishishi maq wiimiishi kra milea wan. Kra akhing leawan jai miishetiq, Jerusalem chela ka mitiihea hai wan. Chela mong wa lam thun nai chela trotam maq kiitelong ruk thun kra thepthep atang tingsang she mitiihea hai wan. Raüta kriika jang miishi maq wiiroqtrok ri wiinai misi wan. Shatmaq kra akhing bala ka pinthum litkot chamchao akhing miraq.

DANIEL 9:27

Kra tuwe ka mangjong hiq na siti maiqmung pahea rai, rawii wiimiishi na saüli pharang rang maq silu mirja. Kra rahiq akhing ka wiijam she nyiwanto angu na, apaiq raq nyamse honglu takuq wan tlaq kra nai laihin honglu kuq wan tlaq jaqsham ka atiitsaq she mirbaiq. Raüta Riiqkhiq Phiiptsi Chang Sumla Kaü kriishe diilu pinthum ba asii thaq na asii Shomjam khok kriijaq mishong wan. Kra Shomjam tiisheshi wantiwe ka, Shiikeawe raq mitsat baiq wan shaq wiiwii, kra Riiqkhiq Phiiptsi Chang Sumla Kaü ka tiingashat li miraq.”

Matthew 24:16

Kriishe chhi han jiila, Judia wangti ka ku akin mong kiina chiimjin apin wan kap she riichang.

Mark 13:14

“Namshiq raq, ‘Shomjam Tiishechang Maiqphai Asi Sumla Kaü,’ ashi ka apaiq chapchang riimak ba kiijaq chap raü she michhihan.” (Aphatti ma: Ara liichum arka jamlai ngo wa chongtlaq kra riikhaqli tak rong laq!) “Kra chhanghang akhing ranaiq she la saüwa raüla, kra akhing na juwa Judia wang na siti, kriiti ka kin kiina tiipaü juwan chang miraq.

Luke 19:43

Kriikha maq, ümniima akhing she misaü wan, ümniika ümjaqti raq trotam maq, tangphak she mirukbaiq, kiimaq mitangbaiq. Raüta ümniika chela mong na trotam maq mikombaiq.

Luke 21:20

“Namshiq raq ümtiikiiwa Jerusalem ka phenlabi raq akom baiq rea wishe michhi han, kra chhihan jiila, chela tiithen baiq wan akhing ka saü wato she dea nguta misap han.

John 11:48

Nashiq raq apaiq ka akhli, awang chang jaqsham ka tiisham ruq li tiisham hai jiika, mungmaiqse wiitarü raq apaiq ma siisaq she mikam wan. Kiimaq Roman welabi raq nashiq thaq na kha minyan. Raüta, nashiq nok Shomjam nai namung ara tsangshiq raq ashthen she mirbaiq!”

Acts 21:28

Tsangshiq raq, “O Israilnok singmung maiqse lei! Warong ra lii! Arwe ara tiinin tlo rong i!” nguta gitrang wanto. “Arwe ahata barap binrii na waraüta nokmaiqse tarü ma, Israilnok mung thaq na, Mosheq Thungtri thaq na kiimaq ara Shomjam arthaq na, ashut riiqkhiq traho bomchong kewanti we. Kiimaq liirong laq, ümchaü min apaiq raq Pongnok phan maiqsetiim ka ara Shomjam mong na shea wan raüta, ara Asii Shomjam arka tiisheshi baiq wantlo!”

Acts 6:13

Raütiishe, tsangshiq raq maiq wiijamti ka shea wan raüta, apaiq tiishaü baiq miitu, kha ka arot tünyan nongto. Kra arot hakhi ketibi raq Stephen ma, “Naishiq raq apaiq ka, nashiq asii Shomjam ara nai Mosheq raq akuq Thungtri khuthaq na, bom ka ashut abi bom kli tai tiikai.

Hebrews 2:1

Ara chongtiikai arkha maq, nashiq raq tai kai tengman tlaq bomtsi ka, tsan na tiitsang shat maq rüm laita lang rong i. Akha si riihai jiika, nashiq rilung na jamlai phan rathaiq rahai saü raü min, nashiq ka tiimeshi lot mak miraq.

Revelation 1:3

Kechu jonghea, jurwa ara lakdap ara phat tlaq. Kiimaq kechu jonghea, jurwa ara shammi bom chong, ara lakdap na ara tai tlaq. Raüta ara lakdap na waiqtaq bomtsi kra lang tlaq! Jamkhano ngukla arthun mra ara pin wan ma akhing ka ajeli she.

Revelation 3:22

“Arkha maq chongtiikang, nam ni asi jiila, Asii Wenyi raq phungtuti ma tsii chongkuq tlaq ara tiitsang tairong laq!”