JEREMIA 38:2 - ASII LAKDAP Bible (BSI)

² Tatiwe raq akha nguto, “Juwa chela na sitlaqti thun ka re dong na, riimakla ram raq, riimakla thadong raq mitsai. Shatmaq juwa chela rukphai na dongho raüta, Bebilon mungti puk na nyaptlaqti thun ka tsat mak miraq. Kriiti raq maiqmii miisaq ka mitiichhii wan,” nguto chongtlo nguta tsangshiq raq bom ka taito.

Hawa Naga Bible 2001

² Yehowa rueq, “Ghaqyungx vyuq httaz jix waz kuex ralx rvlungc nuex, rvmuq ngoz ruiux khvmx vrvmc nuex, rvmuq ngoz ruiux vmac vtsac nuex thueyc tuex. Yuq muinz vruex ghaq wawc kaz wvnc vtueq Babelon miqsaz kox nuex nyuip kay jix waz kuex thvt gay muq rvshuex, piq thuiuzthuic kuex dung lot tuex,” ngoz tueq jungx tueq.

JEREMIA 38:2 Referencias Cruzadas

JEREMIA 21:4

Jedekia ma Tatiwe Israilnok Shiikeawe raq akha nguto nguta tiichong hokang, “Jedekia lei, Ngi raq ümphenlabi Bebilon hokhamwe nai apaiq phenlabi rai riikhattlaq kra wiita mikhat baiqha. Ngi raq ümphenlabi raq shamchang ja apiq liq thun kra chela mong na miphong baiqha.

JEREMIA 24:8

“Kiimaq Juda mung Hokhamwe Jedekia, kiimaq mung welabi apaiq rai pongtibi thun kra, kiimaq Jerusalemti mungmaiqse ahinti thun kra, ümchuwa armung na sitlaqtibi riimakla Ejip mung na laühotiiti thun kriika, Ngi, Tatiwe raq, ara abi bihea langlang asea maimak phupmuptsi akha miliiha.

JEREMIA 27:11

Shatmaq ümra mungti wa Bebilon hokhamwe puk na nyap wan tlaq, raüta apaiq wokhong na sitlaq, raüla, kra mungti ka ngi raq tsangshiq maiqmii mung na, mitiishong nga wan ha. Raüta maiqmii wak ajam kra mishamsiq wan. Arka Ngi Tatiwe raq toqtan tiikang.”

JEREMIA 27:13

Ümniika kiimaq ümsengi mungmaiqse ka re na jaram tsai wa? Kiimaq ram raq amang maq jaram jiimrai wa? Riimakla thadong raq jaram jiimrai wa dantlan? Arka Tatiwe raq Bebilon hokhamwe puk na ümra mungti wa nyap mak kriiti miitu kha ka akha atoqtan wan wishe.

JEREMIA 29:16

Tatiwe raq Dawit raq peng wantaq mungtan kra langti hokhamwe kiimaq ara chelati mungmaiqse, namshiq ma tanyang senobi, namshiq rai munglu shumwikong ma pong mung na tsuq wan dam mak deati miitu jamlai bom wa chongtlaq kra tai ronglaq.

JEREMIA 29:18

Ngi raq tsangshiq ka re ma mitiijo wanha. Ram tiidong lata, ram ma mitiihaüha, kiimaq tsangshiq ma tha mitiidongha. Raüta tsangshiq thenjen wan kra chhi raüta mangjong hiq na siti maiq mung thun tlotli ka phiip raq mitsai. Ngi raq tsangshiq ka barap binrii na mitiipin baiqha. Tsangshiq thenjen wan ka chhi raüta mangjong maiqse ka akii anyii phiipraq atsai miraq. Maiqse raq tsangshiq ka aslailii, ashummii she mirwan. Raüta tsangshiq mang ka chong raüta maiqse liipan na manson bom shiiton ma mitiija wan.

JEREMIA 34:17

Riita ümchaü min, Ngi, Tatiwe raq ngutiikang, namshiq raq Ngi aming ka jin lan. Namshiq raq namshiq maiqmii Israilnok phan ka wasetiim ma tiija wan man dea riilan. Ahea na, ikhiijiika ahea kata. Ngi riimin namshiq ka wasetiim ma hali mitiija nong kang. Kriika redong na tsai miitu, thadong na tsai miitu, ram raq jiim wan miitu she wasetiim mija han. Ngi raq mangjong hiq na maiqmung sitlaq tek ka, Ngi raq namshiq tiithenbaiq wan tiikang kra tiichhi kuq lata phiip ma mitiitsaiha.

JEREMIA 39:18

Ngi raq ümniika khup wong kuq shat maq mithüha. Krai mren, ümniika tsatbaiq mak miraq. Ümniiraq ümkhum ka tiichhii wan laüta, milun wan haü. Jamkhano ngukla ümniiraq Ngi ma kamtsantsii thutlaü. Arka Ngi, Tatiwe raq toqtan tiikang.”

JEREMIA 42:17

Maiq ümchu riiwa Ejip mung niidea laüho ratlo nguta hongla tlanti thun ka, kiimaq kiijaq shongkai raa dongdii nguta honglatlanti thun ka redong na mitsai han. Riimakla ramdong raq mijiim han. Riimakla thadong raq mijiim han. Kra Ngi raq tsangshiq khuthaq na athen jen wan sawa tiisaü wan tiikang kra mong wa, tsangshiq phong wa maiq ka ashi ra min tiichong mak mitsai, kiimaq weshi ra dongdii min lunmak miraq.’

JEREMIA 42:22

Kra ningkhan ümchaü sanha, ara tsan na tiitsang ronglaq: Namshiq ka redong na mijiim han; riimakla ramdong raq mijiim han; riimakla thadong raq mijiim han; namshiq ümra mung na sikai wa laüho tlan, kiijaq mijiim siq han.”

JEREMIA 44:13

Ngi raq Jerusalem na siti jamkho redong na, ramdong na, kiimaq tha tiidong lata imo tiihokang, kiikhiisii Ejip mung na siti kiimin imo mitiihoha.

JEREMIA 45:5

Ümniiriika ümnaq miitu pong na raitlii raüta liikuq raüjaq ahea chang ngutiisha tiima tlaü? Kriika naq tiimara kiq. Ngi raq mangjong maiqse kunli khuthaq na chamchao rathaiq mitiisaü wanha. Shatmaq ümnaq riiwe kla ümmiisaq ka thummak maq, ümniika ümriiba niili kihaü jiimin, lun wan ruq milun haü. Arka Ngi, Tatiwe raq ngutiikang.”

EJEKIEL 14:21

Tati Rakaü Hiqwe raq akha ngutlo: “Ngi raq Jerusalemti ma, ijaq wa abi pinthum phanblai mo tiihochang asi kra mitiisaüha. Arka redong, ramdong, rum ngamphong, kiimaq thadong mitiisaüha. Lata mungmaiqse kiimaq jam nyamse kong kra thumthum pili mijiip baiqha.

EJEKIEL 6:11

Tati Rakaü Hiqwe raq nguto, “Ümjaq ka naüshaü shaü riilaq! Ümjitham maq hiq ka kung shiikung haplaq! Laüta Israil mungti raq ümtin khan wa abi klo wantaq, maiqphai asi jaqsham wantaq kriithun kra miitu, makphai trok laüta hoqlaq. Tsangshiq ka re raq mitsatbaiq, ramdong raüta mijiim, kiimaq thadong raüta mijiim.

EJEKIEL 7:15

Chiihea wea lam thun na rekhat trangli she. Jamkun thun na atsi asi nai ramdong riili she nyam wanto. Chiiphai na rum na maiq ümchuwa sitlaq kriithun ka re rai riikhat lam maq mijiim wan. Kiimaq chela mong na ümchuwa sitlaqti thun ka thadong raq nai ram raq mijiim.