Danieli 2:2 - ÎVUKU RÎA ÛVORO MWARO

² Mûthamaki nîwathanire Akalidei onthe arîa maarî aringi ciama, ooni maûndû, aragûri, na arogi, mathiî mamûtaûrîre kîroto kîu gîake. Kwoguo nîmaatonyire kwa Mûthamaki na makîrûgama mbere yake.

Danieli 2:2 Referencias Cruzadas

Kîam 41:8

Kîraûko, mûthamaki aarî mûtangîku mûno ngororî yake. Kwoguo nîwatûmanîre aringi ciama onthe na andû onthe aûgî a vûrûri wa Misiri. Mûthamaki nîwamerire iroto irîa aarotete, nwatî gûtirî mûndû wavotire gûitaûra.

Esita 1:13

Kwoguo ta mûtugo mûthamaki nîwathiîre kûrî andû arîa maarî na ûûgî na arîa maamûtaaraga maûndûrî megiî watho na mîthiîre nîguo mamûtaare ûrîa agwîka.

Ntha 7:11

Nake mûthamaki nîwetire andû ake arîa aûgî na aringi ciama. Nao nîmaaringire ciama wata Aroni.

Isaia 19:3

Nîngaathiria ûrûme wa andû a Misiri, na njûkangie mîvango yao. Nîmakaaûria ûtaaro kûrî mîvuanano na aringi ciama, na kûrî ago na arogi.

Isaia 8:19

Andû nîmakaamwîra atîrî, “Thiîni mûkaûrie ûvoro kûrî ago na oni maûndû arîa maragia na tûmîgambo tûceke.” Nîmakaamwîra atîrî, “Nwanginya metagie ûtaaro kûrî arîa akuû vandûrî va arîa marî mwoyo?”

Danieli 1:20

Maûndûrî monthe megiî ûûgî na ûtaûki marîa mûthamaki angîendire kûmenya kuumana nao, nîwonire marî aro maita meengî mûno gûkîra aragûri kana aringi mbûgû, arîa maarî kûrîa kuonthe aathanaga.

Danieli 1:4

Anake matarî na wonje, athaka, marî na ûûgî na wara wa mîthemba yonthe, athomu, na marî na ûmenyo, nîguo methîrwe marî agîrîru a gûtungata kwa Mûthamaki mûciî. Mûthamaki nîwaugire mathomithue kwaria na kwandîka rûthiomi rwa Akalidei.

Danieli 2:10

Nao Akalidei acio nîmaamûcokerie atîrî, “Gûtirî mûndû gûkû nthî kuonthe mûthamaki wetû, ûngîvota kûvingia maûndû marîa ûrenda. Gûtirî Mûthamaki mûnene na wî vinya, wanaûria ago, aringi mbûgû, aringi ciama na arogi kana Akalidei maûndû ta mama.

Danieli 2:27

Nake Danieli nîwacokerie mûthamaki atîrî, “Mûthamaki, gûtirî mûrogi, mûringi ciama, oni kana aûgî a njata mangîkwîra maûndû mau mûthamaki aûria.

Danieli 3:8

Vîndî wa îo andû amwe a Babuloni nîmaathiîre kûrî mûthamaki Nebukadinezarû na makîthitanga Ayahudi.

Danieli 4:3

Ciama ciake nî nene na morirû make marî vinya mûno. Ûthamaki wake nî wa tene na tene na nîatûûra athanaga njiarwa na njiarwa.

Danieli 4:6

Kwoguo nînathanire atî, andû onthe aûgî a Babuloni maindwe varî nie nîguo mandaûrîre kîroto kîu.

Danieli 5:7

Nîwanîrîre na mûgambo mûnene akiuga aringi ciama, aragûri na andû arîa maarî na ûûgî wa njata mavirwe gwake. Rîrîa maakinyire, mûthamaki nîwamerire atîrî, “Mûndû ûrîa ûkûthoma mandîko mama, na ambîre ûrîa maugîte, nîagwîkîrwa nguo cia njambarawe, na acurue mûkathî wa thaavu ngingorî yake na ethîrwe arî wa kathatû ngathîrî ya wathani wa vûrûri.”

1Sam 6:2

Afilisiti nîmeetire athînjîri-ngai ciao na aragûri na makîmaûria atîrî, “Nîtwîka atîa na îthandûkû rîa Kîrîkanîro rîa Ngai-Mûnene? Ta twîreni nîtûrîcokia kûrîa riumîte na ndûî?”