DANIEL 11:16 - Bukuit Ne Tilil

¹⁶ Ago ineendet ne nyoonei kobaregei ak chiichooto koyaei ko uu ne machei, ama piitu chii ne imuuchi kotonon eng' tainnyi. Ak kotonon ineendet eng' emet ne karaaran miising', ak mi yooto tugul eunnyi.

BUKUIT NE TILIL

¹⁶ Ago inendet ne nyonei kobaregei ak chichoto koyaei ko u ne machei, ama biitu chi ne imuchi kotonon eng’ tainnyi: ak kotonon inendet eng’ emet ne kararan mising’, ak mi eunnyi ng’emisiet.

DANIEL 11:16 Referencias Cruzadas

ISAIAH 8:8

ak kobokto kwo Judah, ak koyom kosiir olooto, nyiei kot koit kaatit; ak konyiiei kaiitoetap kebebaikyik tebeesindap emeng'ung', ee Immanuel.”

JEREMIA 3:19

Ago ki ale, “Imuktoi ano andein otebi ak lagok ak agoonin emet ne karaaran, poroteet ne myee ne po lugosyegap pororyosyek? Ki abwaati ale, oguureno ‘Abba’; ama omastoi ometa.

DANIEL 11:3

Ak kobiit laitoryat ne kiim miising', ne tuun pounisyei eng' pounateet ne oo ak koyai ko uu ye machei.

DANIEL 11:36

Ak koyai laitoryat ko uu ye machei. Itorooregei ak koeetegei kosiir kamuktain age tugul, ak komwa tuguuk che kikwong'ee agobo Kamuktaindet ne pou kamuktaik. Nyooru ineendet poroteet kot kosulda nereegek, amu agoi keyaei nooto ki keng'at.

DANIEL 11:41

Wendi ineendet kogeny emet ne karaaran, ak kigabui emotinwek che chaang', ago kisaru Edom, Moab ak chu eecheen che po lagogap Ammon eng' eunnyi.

DANIEL 11:45

Ak koteech emaisyegap koonnyi ne po laitornatet eng' kwenutap nyanjet ak tulweet ne tiliil ne karaaran; ago tuun meei, ama toreti chii ineendet.

DANIEL 5:19

Ki potanso ak koiyweis eng' tainnyi piik tugul, pororyosyek tugul, ak che po kutusweek tugul, amu ooindo ne ki igoochi ineendet. Kibarei ne ki machei kobar, kibagaaktoi kosap ne kimakyin kosap, ki ieeti ne kimachei koeet, ak ki iming'ini ne kimachei koming'in.

DANIEL 8:4

Ki ageer mengoto kotoortaisyei kotokyigei cherongo ak murot kaataam ak murot tai. Ama imuuch tyong'ik kotononso eng' tainnyi, ama piit ne ki imuuch kosar eng' eunnyi; ki yai ko uu ye machei ak koeetkei.

DANIEL 8:7

Ki ageer ineendet koriikyi mengit, ak konereekyi miising', ak kokwer mengoto, ak koiri kuinoikyik tuwai. Ki mata kosich anyun mengoto kimnateet kotonon eng' tainnyi; ago ki wiirta kwo ng'wony ak kotyech; ama piit chii ne ki imuuch kosar mengit eng' eunnyi.

DANIEL 8:9

Ak eng' age eng' kuinoichooto ko ki mang'une kuinet ne ming'in age, ne ki eet miising' kotokyigei murot tai, ak kong'asiis, ak emet ne karaaran miising'.

JOSHUA 1:5

Ma piitu chii ne imuuchi kotonon eng' taing'ung' peetuusyek tugul kotee isabe. Ko uu ye ki ami kobooto Musa, ko uu nooto ami kobooten. Ma meteen anan abagaakteen.