JEREMIA 16:6 - BUKUIT NE TILIIL Sireet ne Dutero Kanon

⁶ Pekyin emoni che eecheen ak che mengeechen: ma kitubei, ama iteitos piik agobo icheek, anan kotilgei, ama icheru metowekwak;

Bukuit Ne Tilil

⁶ Pekyin emoni che eecheen ak che mengeechen: ma kitubei, ama iteitos piik agobo icheek, anan kotilgei, ama icheru metowekwak;

BUKUIT NE TILIL

⁶ Bekyin emoni che eechen ak che mengechen: magitubei, ama iteetos bik agobo ichek, anan kotilgei, ama icheru metowekwak;

JEREMIA 16:6 Referencias Cruzadas

2 ATEPTAP PEETUUSYEK 36:17

Komutyi anyun icheeget laitoryatap Kaldeik, ne ki nyo kobar neranikwak eng' rotwetap chok, eng' kootap oldanywa ne tiliil, ama riiree muren anan tye, poiyot anan ne neegit koolil: ki inde tugul eunnyi.

ISAIAH 22:12

Eng' peetuunooto ko ki kuurso Kiptaiyat Kamuktaindet ne Toroor ne po lugoosyek, si kobiit oriirye ak oteiye, si ocheru metowek ak olaach kuniok.

ISAIAH 24:2

Ak kiit ne uu eng' piik, ko uu nooto eng' tisiindet; kiit ne uu eng' otwogindet, ko uu nooto eng' kiptaiyandennyi; kiit ne uu eng' otwogindet ne chepto, ko uu nooto eng' chebyoset ne pou ineendet; kiit ne uu eng' alindet, ko uu nooto eng' aldaindet; kiit ne uu eng' chiito ne pesendoi, ko uu nooto eng' pesenindet; kiit ne uu eng' ne ibei keljinet ne siirei, ko uu nooto eng' ne igoochin ineendet.

JEREMIA 13:13

Ileenji anyun icheek, mwaei Kamuktaindet ne Toroor kole, ogeero, anyiiti pogitet piik tugul che menyei emoni, laitorinik che tebee ng'echereetap laitornatet ne po Daudi, tisiik, maotik ak piik tugul che menyei Jerusalem.

JEREMIA 16:4

‘Pegu icheek eng' meet ne ng'waan; ma kiriirchin, ama kitubei. Igeitu ng'atateek eng' ng'wony ak ki pare rotwetap chok ak rubeet; si koek muuswekwak amitwogigap toriitigap parak ak tyong'igap ng'wony.’ ”

JEREMIA 41:5

kobwa piik alage kobunu Shekem, Shiloh, ak Samaria, piik tamanwogik sisiit, che kiga konem tamnokwak ak kogereer ngoroikwak, ko kagotilgei, ak koibu kagoochinoik ak tuguuk che nyamdut eng' eunekwak, koibu kobwa kootap Kamuktaindet ne Toroor.

JEREMIA 47:5

Kanyonji Gaza poosto; kagiges Askelon, che ki ng'et che po atebweetap Mediterenian: iriire ak itei kot kotyanit?

JEREMIA 48:37

Amu churat metit age tugul, ak kigetil tamnet age tugul: mi eunek tugul perutik che ki kitilei, ak kogermenegei kuniok.

JEREMIA 7:29

Ee Jerusalem, icheru suumeeguk anyun, ak iwiirte, rirate eng' tuloonook che churyotin, amu kaesyok ak ametook anee Kamuktaindet ne Toroor, okweek ibini ko kogoono nereegek.

JEREMIA 8:2

Kimaae eng' asiista ak eng' arawet ak eng' taitap tuguuk tugul che po kipsengwet, che kiga kocham, che kiga koot, che kiga kosubot, che kiga kocheeng'at ak che kiga kolas. Ma kiyumi anan ketup, ago egu keturek eng' emet.

ATEPTAP LAWIK 19:27

Amobior metowekwok, ameng'em tabanwegap tamneng'ung'.

ATEPTAP LAWIK 19:28

Amotil poorwekwok agobo piik che pegu, amobeel saremik alak tugul. Aa Kamuktaindet ne Toroor.

AMOS 6:11

Amu, ogeero, ng'atei Kamuktaindet ne Toroor, kebut koot ne oo kong'emak, ak kebut koot ne ming'in kong'asiagan.

MATAYO 9:23

Ak kingo it Jeso kootap pounindet, ak kogeer piik che kuutei ndurerusyek, ak piik che sololendos,

NG'ATUTIK 14:1

“Oo lagogap Kamuktaindet ne Toroor Kamuktaindeng'wong': amowat poorwekwok anan amotuumet agobo chii ne kame.

NG'ANG'UTYET 20:12

Ak ki ageer che ki kobek, che eecheen ak che mengeechen, kotonondos eng' taitap ng'echereetap laitornatet; ak ki kiyaat bukuisyek. Ki kiyat kora bukuit age, nooto ko bukuitap saboondo. Ak ki kirwookyi che ki kobek eng' tuguuk che kiga kisirchi bukuisyechooto, ko uu poisyonikwak.

NG'ANG'UTYET 6:15

Ak ki unygei eng' kebenonik ak eng' rwandosyek che po tuloonook, laitorinigap ng'wony, ak pounik, ak kiptainik che eecheen, ak mogoreek, ak che kiimeen, ak chii age tugul ne rataat ak chii age tugul ne ityagat.