2 SAMUEL 21:1 - BUKUIT NE TILIIL Sireet ne Dutero Kanon

¹ Ki piit rubeet eng' peetuusyegap Daudi, eng' kenyiisyek somok che ki isubegei. Kingo cheeng' `Daudi togetap Kamuktaindet ne Toroor kole Kamuktaindet ne Toroor “Po Saulo ak koonnyi ne po korotiik ng'olyoondoni, amu ki par Gibeonik.”

Bukuit Ne Tilil

¹ Ki piit rubeet eng' peetuusyegap Daudi, eng' kenyiisyek somok che ki isubegei. Kingo cheeng' `Daudi togetap Kamuktaindet ne Toroor kole Kamuktaindet ne Toroor “Po Saulo ak koonnyi ne po korotiik ng'olyoondoni, amu ki par Gibeonik.”

BUKUIT NE TILIL

¹ Ak kibiit rubet eng’ betusiekab Daudi, eng’ kenyisiek somok che kiisubegei, ak kicheng’ Daudi togetab Jehovah. Ak kile Jehovah, Bo Saul, ak gonnyi ne bo korotik, amu kibar Gibeonik.

2 SAMUEL 21:1 Referencias Cruzadas

TAUNET 12:10

Ki piit rubeet eng' emonooto, ak kichoortagei anyun Abram kotokyigei Misiri, kwo korutoochi olooto amu kieet ak kong'wanit rubeet eng' emet.

TAUNET 26:1

Ki piit anyun rubeet eng' emonooto ne teer eng' rubeet ne ki po tai, ne ki mi eng' peetuusyegap Abraham. Ak ki wo Isak kap Abimelek, laitoryatap Philistiik, agoi Gerar.

TAUNET 41:57

Ki pwa anyun emotinwek tugul kap Joseph eng' Misiri kobwa koal peek; amu kieet rubonooto eng' ng'wony komugul.

TAUNET 42:5

Ki pwa anyun weeriigap Israel kobooto che kibwanei koalisyei, amu ki miitei rubeet emetap Kanaan.

TAUNET 43:1

King'wanit rubeet miising' eng' emet.

2 SAMUEL 16:8

Kagoweekyin `Kamuktaindet ne Toroor korotiik tugul che po kootap Saulo, ne ki ilaitoran igeer ineendet, ak kagonde Kamuktaindet ne Toroor laitornatetap eutap weeriing'ung' Absalom. Keero, kaginamin eng' yaityeng'ung', amu ii tartain ne po koroti.”

2 SAMUEL 20:26

Ko ki tisiindetap Daudi agine Ira Jairindet.

2 SAMUEL 21:5

Koleenji `icheek laitoryat, “Chiichi ki igeswech ak ne kichobei kegirindech kole kebarech kot koma king'etu eng' kiwoteet age tugul ne po Israel;

2 SAMUEL 24:1

Ki nereech kot kogeny Kamuktaindet ne Toroor agobo Israel, ak king'eetyi `Kamuktaindet ne Toroor Daudi kosich kabwaatet ne ya agobo icheek. Ki leenji anyun “Ui, iit Israel ak Judah.”

2 SAMUEL 5:19

koteebe `Daudi Kamuktaindet ne Toroor koleenji, “Awe kebargei ak Philistiik? Tos indoi icheek eunnyu?” Ak ki leenji `Kamuktaindet ne Toroor Daudi, “Togoste, amu andoi iman Philistiik eung'ung'.”

2 SAMUEL 5:23

Ak ye kingo teebee `Daudi Kamuktaindet ne Toroor, kowolji koleenji ineendet, “Metogoste, ago alagu patennywa ak iyem yeityo ibookyi icheek eng' ye itoorchingei keetiigap logoek.

1 LAITORINIK 17:1

Ki leenji `Elijah Tisbinindet ne ki po piik che ki menyei Gilead Ahab, “Ko uu ye sabei Kamuktaindet ne Toroor, Kamuktaindetap Israel, ne atonone tainnyi, koma piitu rewoot anan ko ropta kenyisyechu, kobatee ko uu ng'olyoondennyu.”

1 LAITORINIK 18:2

Ara ki wo Elijah koboorchigei Ahab. Ki o rubeet miising' eng' Samaria.

2 LAITORINIK 6:25

Ki piit rubeet ne oo eng' Samaria; ak kiyiem nganasanooto kot kealdae metitap sigiryet keruutyet agenge che po fedha, ak kealdae kebeberta agenge eng' ang'wan ne po kibabet ne po soroegap cheptugenik, fedhaisyek muut.

2 LAITORINIK 8:1

Kiga ng'alaalji Elisha kwonyi kiga ing'eetyi weeriinnyi, koleenji, “Ng'eet ak obe ak piigap koong'ung', omeny oldo tugul ole ochame, amu kagoguur Kamuktaindet ne Toroor rubeet. Nyoonei rubeet emet kenyiisyek tisap.”

Kitabuutap JOB 10:2

Aleenjini Kamuktaindet: Amerwookwo; iboorwo anyun kiit ne kagoonin kibelgei.

TIENWOGIKAL 27:8

Ye ki le muguleldanyu, “Ocheeng' togeennyu!” Acheeng'e togeng'ung', ee Kamuktaindet ne Toroor.

TIENWOGIKAL 50:15

Kuura eng' peetuutap nyalilda; asi asaruun, ak iloswa.

TIENWOGIKAL 91:15

Kuura, ak aitenji; kitebyei tuwai eng' nyalilda, asaru ineendet ak agoonyit.

ATEPTAP LAWIK 26:26

Ye atil amitwogikwok kong'ering'itu, kobeel anyun kobogorisyek tamanu amitwogikwok eng' kapkoimaut agenge, ak kebimanwak amitwogikwok eng' ratilit. Oamisyei amobiyonyi.

KAITOSYEK 27:21

Ingotonon ineendet eng' taitap Eleazar tisiindet, si koteepchi ineendet kandoiset eng' taitap Kamuktaindet ne Toroor eng' kirwoogetap Urim. Eng' ng'olyoondennyi ko mandoi ak kaweeksei ineendet ak piigap Israel, agot tuiyet komugul.”

JOSHUA 7:1

Ago ki yai chalwok piigap Israel agobo tuguuk che itabaanatiin. Ki ip Akan weeriitap Karmi, weeriitap Sabdi, weeriitap Zerah ne po pororyetap Judah tuguuk alak eng' che itabaanatiin. Ki nereech kot Kamuktaindet ne Toroor agobo piigap Israel.

JOSHUA 9:20

Kiyachini ko uu ni; kibagaaktoi kosapcho, si ma ityeech nereegek amu kayasyoet ne ki kiyasyechi.”

RUTH 1:1

Eng' peetuusyek che ki irwoochi kirwoogik, ko ki piit rubeet eng' emet. Ki wo chii ne po Bethlehem eng' Judah kwo komeny emetap Moab, ineendet ak osotyonnyi kobooto weeriikyik aeng'.

1 SAMUEL 10:22

Koteebse `icheek Kamuktaindet ne Toroor anyun kogeny koleenji, “Ta komi chii neta konyonei yu? Kowol `Kamuktaindet ne Toroor kole, Wei kaung'egei kurubet.”

1 SAMUEL 23:11

Tos indea piigap Keila eunnyi? Chorugei Saulo, ko uu ye kagogas otwogindeng'ung'? Ee, Kamuktaindet ne Toroor, Kamuktaindetap Israel, asoomin miising' ale, mwachi otwogindeng'ung'.” Kowol Kamuktaindet ne Toroor kole, “Chorugei.”

1 SAMUEL 23:2

koteebe anyun Daudi Kamuktaindet ne Toroor koleenji, “Tos myee awo abar Philistichuuto?” Ak ki leenji `Kamuktaindet ne Toroor Daudi, “Ui ak ibar Philistiik ak isaru Keila.”

1 SAMUEL 23:4

koteebee anyun Daudi Kamuktaindet ne Toroor kogeny, ak ki wolji `Kamuktaindet ne Toroor ineendet koleenji, “Ng'eet, choortegei Keila, amu andoi Philistiik euneguk.”