Hosea 11:5 - Hawa Naga Bible 2001

⁵ “Tsuingshiq kuex ngaz kox nuex yek tvkoc tvlvlc wuez tueq, kvkhoc rvtueq tsuingshiq kuex Ejip mungx nuex yek juing rvtueq, Asiria rueq tsuingshiq kuex guimz wvnc shuex.

ASII LAKDAP Bible (BSI)

⁵ Tatiwe raq ngutlo, “Tsangshiq iwokhong na jangwan romak she lankito. Kra ningkhan ümchaü sanha, Ejip mung na hali di ma jakai mijangho nong. Kiimaq Asiria mung raq tsangshiq mijam shawan.

Hosea 11:5 Referencias Cruzadas

2 HOKHVMX 15:19

Asiria honoc Tiglat Pileser rueq Israel mungx nuex nyuip vtueq khvt tueq nuex, Menahem rueq muinz mungtan kuex piq luimc vkawc maq guimz yaq nuex htuiz daungx hungc vlaungc kuy lvp laz juing ngoz tueq kuimphox kilogram 34,000 kuq tueq.

2 HOKHVMX 15:29

Peka kuex hokhvmx muex yaungx yaq nuex Asiria honoc Tiglat Pileser rueq Ejon, Abel Bet Maaka, Janoa, Kedesh, Hazor ghaqyungx htenc nuiyc Gilead mungx, Galile nuiyc Naphtali mungx htenc kuex khvt lvp wvnc vtueq, miq htenc kuex Asiria mungx nuex thuq wvnc tueq.

Hosea 10:6

Kvruex yac yuimx kuex Asiria honoc yungx waz muex yauk noalc kuy tvkoc kvruex mungx nuex lvmc lvy rvhumc tuex. Israel miqsaz kuex kvruex yac yuimx kvmac kvmluimx tvluimc itueq ningkhvnc nuex yvlc svy rvhumc tuex.

Hosea 5:13

“Israel piq kuex mtanc lac thuiuz yaq nguinx kvmuinz, Yuda piq mac mtanc lac mac yaq nguinx kvmuinz khiz shuex nuex, Israel kuex Asiria kox nuex kaz vtueq romc kuy tvkoc honoc yungx waz muex wisoz shuex, yuq muinz piq rueq tsuingshiq muex phemc kuq lot muq, tsuingshiq mac kuex tvhvlc lot muq.

Hosea 6:1

Miq htenc rueq, “Yehowa kox nuex yek wuez ix! Vpiq rueq naungshiq tvthuiuz sac phuex, yuq muinz vpiq rueq naungshiq kuex vsuingc suing tvhvlc kuq phuex; vpiq rueq naungshiq nuex vmac tvkop kuq phuex, yuq muinz vpiq rueq naungshiq mac vtsac htenc kuex yop kuq phuex, vpiq rueq shuimx shuex rvmuq haz?

Hosea 7:16

Tsuingshiq kuex ngvy kox wawc kvroz kaz wvnc vtueq luimc vkawc vguez tishox kox nuex kvwek kaz wuez tueq. Tsuingshiq kuex tingmuq laq ikhoc vkvmx juing rvmuq. Tsuingshiq vyungx vlaungx bix kuex thuinz tvyungc vtueq kvjaz ningkhvnc nuex, tsuingshiq kuex shox nuex thueyc wvnc wuez tuex, Ejip miqsaz rueq nueykuic wuez shuex.”

Hosea 8:13

Tsuingshiq rueq ngaz muex shomc nawk kuy shomc kuq vtueq shomc nawk juing ngvmx kuex phauk wuez tueq. Yuq muinz ngaz, Yehowa rueq kvruex raungc raq vshaungx rvmuq, majuiuc tsuingshiq mvrax kuex rvwvl lvp vtueq kvruex tvkoc nuex tsuingshiq muex murx tvgurc shaungx; ngaz rueq tsuingshiq kuex Ejip nuex tvyek yek shaungx!

Hosea 9:3

Israel miqsaz htenc kuex Yehowa mungtan nuex httax ruq httax lvp tuinx rvmuq, yuq muinz Ejip mungx nuex yek waung vtueq Asiria mungx nuex tvwanc vruez phuiuz vsvy kuex phauk saq shuinx.

Hosea 9:6

Jamjaux kuilc daz httuiuc vtueq miq htenc tvpanc gay rvhumc tuex nuex, Ejip miqsaz rueq tsuingshiq kuex tvtuimx wvnc vtueq, Memphi nuex luip gay shuex! Tsuingshiq kuimphox tsak nyvmx nuiyc tsuingshiq yuimx httax yaq baung htenc kuex namx ruix nuiyc shuiuq rumz htenc rueq puingc wvnc rvhumc tuex.

AMO LUIK DVP (AMOS) 4:11

“Ngaz rueq Sodom nuiyc Gomorra kuex tvbac gay tauk ikhoc nuimshiq wvyvmc kuex tvbac gay phaungx. Kvjungx yaq nuimshiq kuex wvrkez wawc vhet gay luic thuiyc yaq wvrhtaq ikhoc rvtuit. Kvkhoc rvyruiux nuimshiq kuex ngaz kox nuex yek waung muit,” ngoz tueq Yehowa rueq jungx tueq.

AMO LUIK DVP (AMOS) 4:6

“Ngaz rueq nuimshiq ghaqyungx htenc lotlaz kvyuq rvmc tvkaz tauk, yuq muinz nuimshiq ngvy kox nuex yek waung muit.

AMO LUIK DVP (AMOS) 5:27

ngaz rueq nuimshiq kuex Damasku ghaq ralx nuex lvp laq phaungx,” ngoz tueq Tvphaungc Tvsuip Tishox ngoz tueq muingc yaq Yehowa rueq jungx tueq.

TRI CHONGKE 17:16

Hokhvmx waz rueq piq ralx daungx tvkoc mvre paunghvlc tvy mvy muq, Ejip mungx nuex mkaq muinz yek kay mvy muq, ngoz tueq Yehowa rueq vpiq miqsaz muex jungx tueq ningkhvnc nuex kvruex mungx wawc mvre rez kay tvkoc miq kuex tvkay mvy muq.