2 Tímote 2:15 - Jola-Kasa

¹⁵ Ukankaanoo awu humumi mantee Ateemit li ajoki an acole, min ajoki loon aloka asuuwut bulokabu ban akaanemuu, awaaleˈe col hulimahu hata mal̥egenamu.

2 Tímote 2:15 Referencias Cruzadas

Máciya 13:52

Muñeˈe Yéesu li aaniil: — Mó mújimuu, anoowan aliikene bukanabuku eluwaayi yata Móyiis, abile alako ágoom ata Jáyiiyaju jata Ateemit, lanokoonokoo li anahaan ata eluuf, áfulenulo li ebajayi yoola, wah wawunkul li foof wah wahaan.

Maak 4:33

Yéesu li anaak aŋa’ ukittenoolum wameeŋe loon unwe, min alob bukanabuku Hulimahu hata Ateemit, lewoo li wahawu wan kuyilimuu kúnaanum.

Hulimahu Hásuumaahu loon Lík akiic homuu 12:42

Amaaŋenawu li aan Fiyeel: — Kama ayimaa ammuu aloka al̥egene ban li ájallo? Okila ammuu anawu an anahaanawu oola alakomuu li ajow kañaahoo, li aŋa’ kulokaabuku koola asenool aaken, ánaakum aseniil hutiñiil, taŋiil yata hutiñ báliiŋe.

Bakaanelabu 2:22

Fiyeel li alaañen aaniil: — Kutuyom kata Isilayeel, jijanten kulimaku unke kan emmuu li ilobuul. Ateemit láhiisuuhiis ayi ammuu Yéesu akinumuu Nasalet. Mata Ateemit li Yéesu lákaanume bújaahalenumabu, li búhiisenum hákiluul. Ban bukuluul humumuul jihaas yo.

Bakaanelabu 20:27

Mata líhiisuuhiis wahawu feh wan Ateemit afañumuu kakaan, ban iyoloolutuul wahoowah.

Kata Lom 14:18

An alokumuu boot li Kilisita loon muñaˈa, fan ásuum Ateemit ban bukanabuku fan kufañool.

Kata Lom 16:10

Jisaafom Afeles, áhiisumuu kaanaku láyinenyinen li mal̥egen li Kilisita. Jisaafom bukanabuku feh kammuu li eluufayi yata Alísitobilis.

Kata Lom 6:13

Jakum jiŋa’ wah wata eniilayi yooluul min jinaak jikaan kahoofoo loon eenimuu wah wata boot kakaan majakut. Jisenoolo min jilok boot li Ateemit loon bukan kayitowumulo li eketayi kubil koono li buloŋ. Jisenoolo foofuul feh boot kakaan wah wacole boot li Ateemit.

1 Kata Koolent 2:6

Alóli jilobelob kulim kata bújallo bukanabuku kankumuu li káyinenaku. Ban inti bújallo bata adunaayi inye, inti foof bata bukanabuku kaakumuu adunaayi inye, kaano tomuu boot bil janiilen.

2 Kata Koolent 10:18

Li mal̥egenamu, let an asaloolowe aluukeneyi, bale anawu an Amaaŋenawu asalumuu akila aluukeni.

2 Kata Koolent 3:6

Okila ákaanolimuu min jiyili jilako kuloka kata húfaalumahu huwunkulahu. Húfaalumahu unhu hubilumut li eluwaayi yakiicimuu, bale li Buyinumabu Banabaabu hubilumulo. Li mal̥egenamu, eluwaayi yakiicimuu emukemuk, bale Buyinumabu Banabaabu busenesen buloŋ.

2 Kata Koolent 4:2

Alóli jihoohoy wahoowah wasuuneniye wakaaneyimuu li huyolo. Jíkaaneliit wah li jabunt, ban jítiiguleliit hulimahu hata Ateemit; bale jilobelob bukanabuku mal̥egenamu set, bájum bukanabuku feh li kuyili kúyinen li mal̥egen kaanaku áloli bukan joom kan an ayilo áwoolu hákil Ateemit.

2 Kata Koolent 5:9

Wahawu unwu újimuu foof, oonowaal li eniilayi inye mantee foof li úfulaal li yo, wahawu wan ufañaalumuu bale, wo wommuu min ukaanaalool súum.

Kata Galasi 1:10

Muñeˈe buu jiyinoole? Mantee ínje huŋes léemi li ho min bukanabuku kusalom, mantee min Ateemit asalom? Mantee huŋes léemi li ho min ikaan bukanabuku súumiil? Nokoomuu loon ínje liloŋe li iŋes min ikaan bukanabuku súumiil, kama ilet aloka ata Kilisita.

Kata Efées 1:13

Bukuluul foof jibabbaj hujokoo li Kilisita nan jijamumuu ban li jíyinen hulimahu hata mal̥egenamu, hammuu Hulimahu Hásuumaahu hafakenuulumuu. Muñeˈe Ateemit lasenuusen Buyinumabu Banabaabu ban alobumuu kasen, min lako húlangumaasowahu hoola li bukuluul.

1 Kata Tesalonik 2:4

Bale loon Ateemit áyoobolimuu ban li ajuk kaanaku jitottook min ákatoli min jiwaale Hulimahu Hásuumaahu, mo foof jiwaale homuu loon afañumuu. Jiŋesut kakaan bukanabuku súumiil, bale kakaan Ateemit súumool, ahaasumuu wahawu wammuu li kúkowolaal.

1 Kata Tesalonik 5:14

Kutuyom, áloli jumbuku li kal̥awuul kaanaku: Jihab bukan li bukuluul kafañut kakaan bulok bal̥uule. Jiwankulen bukanabuku kákol̥l̥imuu, ban li jilamben kágootomuu. Jímuñ bukanabuku feh.

1 Tímote 4:6

Ukittenumuu wahawu unwu feh kutuyi, fan ulako aloka ajake ata Yéesu Kilisita. Fan úhiis kaanaku li kulimaku kasenemuu káyinen li baliikenelabu bata mal̥egenamu ban unabumuu li bo jak, lúkuumenumi.

Eébulo 4:11

Mó mújimuu, lootaale kama ukaanaal wahoowah min ubajaal kayool̥owaku unku, jakum bil an li alolaal alo, okila banabe li bukittenoolumabu bata bukanabuku kátuulutumuu Ateemit.

Saak 1:12

Awólo, an áami li sílaam ban li amunten. Mata nan ammuu amunten boot yok nan sílaamasu sommuu li siban, Ateemit fan asenool buloŋabu babaneliitumuu bulako busuuhen, ban alobumuu kasen bukanabuku kafañoolumuu.

Saak 1:18

Ateemit humumool, li hulimahu hoola hata mal̥egen labukumolaalumuu. Lakankaan mo, naboo li húnongumahu hoola, mantee li ulakowaal bubukoolumabu bútinaalabu li wahawu woola feh wan áwuwenumuu.

2 Fiyeel 1:10

Wahawu unwu újimuu, kutuyom jikaan manooman min jítuul li mal̥egen kahooñaku kan Ateemit ahooñuulumuu, li kal̥usaku kan al̥usuulumuu. Jikaan momuu, let jilo li kahoofoo.

2 Fiyeel 1:15

Fan ikaan manooman min ikatuul wah wammuu unaak uwayil̥enuul nanoonan kulimaku unku, maayeet ínje bakete iban.

2 Fiyeel 3:14

Kutuyom kan iboolaat, wahawu unwu újimuu, li kakobaku kata hunakahu unhu, joote jikaan manooman min jilako bukan kasete, bukan kan an aatut ayili alob majakut aya li buko hákil Ateemit, ban li jibaj kajamoo li Ateemit.