Malaquias 4:1 - Kaxinawá Bíblia (BR)

¹ Senhor Deus kushipahaira dasibi binu keyuatũ matu ana yuikĩ: “Bai anua hamapai mibã tsekashũ hawẽ shaka itxawakĩ hanus mãtxĩshũ kuamisbu keska wakĩ ibubis kẽmisbu dasibi inũ txakabubu dasibi kupikĩ txi hi ikai anu ẽ hatu menukĩ keyushanai ha shaba txi kushipaya ma tashni kemaikiki. Ha shabatiã hukirã hawa betsa teshewama ẽ hatu menu keyushanaii.

Malaquias 4:1 Referencias Cruzadas

Salmos 37:9

Tsuabura txakabuburã, matũ mai pakea anua Senhor Deusũ hatu nitxĩshanikiki. Hakia tsuabura Senhor Deuski txiti imisburã, ha mai hatu yubani habũ ibuwashanikiki.

Êxodo 15:7

Tsuabũra mia sinatamaibu mĩ kushipa tsuã mia nematirumawẽ mĩ hatu kupikĩ keyumiski. Hatuki sinatakĩ basi txushia kua keska wakĩ mĩ hatu yamawamiski.

Isaías 40:24

Haburã, mibã betsa dama banabu hatũ tatxa mai anu hawẽ tapũ hayariama mestẽriama keskabuki. Deusũ hatu mamaki shũ aka txushimis keskabuki. Uiyabi niwewã bekĩ hawẽ pei shana nuyamabaĩmis keskabuki.

Isaías 41:2

Bari huaikiria ha shanẽ ibuhaira Cirõ nawa shukuabu tibi maemakubaĩmisrã, tsuã yunumakĩ amakubaĩmismẽ? Ha nawa shukuabu tibi hatũ shanẽ ibu babu watã hatu tsuma wamakubaĩmisrã, tsuã amakubaĩyamamẽ? Hatũ matxatu txaipa inũ hatũ kanũ piayabis tekekĩ mesi watã petxux sa akawakinã, tsuã hatu amakubaĩyamamẽ?

Joel 2:1

Tsuãra Mati Sião anushũ trombeta mawakĩ txã txã akĩ Senhor Deusũ mati meribi anushũ mese huaikiri hawẽ unãmati hatu banabimakãwẽ. Senhor Deusũ hatu kupiaitiã nai kuĩ meshupa inũ nai kuĩ uta shabatiã meshua yamea dakashanai ma kemaiwẽ taea Judá mai pakea anu hiwebaunabu dasibi datei saki saki ishãkanikiki. Detenamenikabu kushipahaira mirima mati matipa anu bebirã bebirani ma penai shabakiranai keska dasibi nati ikabu uĩshãkanikiki. Haskaibu uatiã tsuã uiãma inibu inũ ana haska kaiaĩ unuri ana uiãma ishãkanikiki, ana ha keska betsa tashniama ishanairã.

Joel 2:31

Ha haskaitiã bari ana pesheama meshui inũ ushe ana txashamari himi keska ishanikiki. Ẽ bake kushipahairai txashakapa shanẽ ibui hua kemariamakẽ ha hanu kupiaitiã shaba mese atimapa ishanikiki”, matu waya

Amós 2:9

Mã txakabubiakẽ eanã, Egito anua matũ shenipabu hatu tashnimabirãkĩ hatu bai bepẽshũbirãkinã, Amorreu nawabũ mai pakea anu hatu ibuwamanũ, iwanã, hanu tsua hiweabuma anu 40 ano unãshubira ẽ hatu imatãbauniki. Ha Amorreu nawabu huni keyatapabu hi kushipa keskabiabũ dasibi yamawakĩ ẽ hatu keyushuniki.

Malaquias 3:15

Hakia nukũ hatu uĩkinã, habu ibubis keĩ benima bestiaibu nũ uĩmiski. Ha inũ, hunibu txakabubiakĩ mabu mirima itxawakĩ bikubaĩmisbuki. Habunã, Deusũ hau ea kupinũ, iwanã, unãti wamabiabu hawa Deusũ hatu kupiai meriabumaki’, ikĩ mã shinãkubaĩmisbuki”, hatu wanikiaki.

Malaquias 3:18

Haskakẽ habũ mã ea ikũwaĩbu duawakĩ hanua habũ ea nĩkaisbuma yupukĩ ẽ matu haska waitiã mã betsahaira uĩshanaii, hanu ekiri shabakabi unãkinã. Hakia natiã ẽ matu haska washanai mã tapĩriabumaki”, itã,

Malaquias 3:2

txanima ha shabatiã Senhor Deus hui tashnikiranai tsuã nematiruma ishanikiki. Tsuãra huai uĩ hanu ni txaipatirumaki, hawẽ txakabuwẽ taearã. Nuku pewai huirã, bai kuabu txi here keska hushanikiaki. Nukũ detsis sabão kushipawẽ txuka keska washanikiaki.

Malaquias 3:3

Hua tsaushũ Israelĩ huni bake Levĩ enabu nukunabu Deusbe hãtxashunikabu unãti wakĩ hatu pepa washanikiaki, mane prata hushupa inũ mane ouro tashipa txi anu kukatsa akĩ hawẽ detsis urẽkĩ has wamisbu keska matu wakinã. Ma matu pewakẽ haska Moisĩ hatu yusini txibãkĩ inabu nami inũ hawẽ sheni has menukĩ hatũ shinã pepawẽ Senhor Deus kẽwãkĩ uĩmakubaĩshãkanikiaki.

Malaquias 4:5

Uĩkãwẽ. Ha shaba mese dasibi datemakĩ ea ẽ Senhor Deusũ kupiaitiã huriamakẽ ẽ hãtxa yuishunika Elias hiwepaunirã, ana matu anu ẽ yunushanaii.

Mateus 3:12

Ha inũ, shekiwã bimi ta keyushũ pepa arutã hawẽ shepa kuamisbu keska wakĩ dasibi hawenabuma danãkĩ hawa txi nukaisma anu urẽshũ kuanũ, iwanã, manakubainikiki”, akĩ Naximanika Joãonẽ hatu yuikubainikiaki.

Lucas 19:43

Haskakẽ Deus matu anu bai huai mã hawa ikũwãmawẽ taea matuki sinatamisbũ matu itxakawakĩ matu nuitapawakĩ matũ mae dapi mai kene keyatapa wabaũkĩ matu kebẽ keyutã mã ana kaĩtiruma watã matuki sinataibũ matũ mae ewapa mixki kene niri akĩ keyukĩ matu inũ matũ bakebu detekĩ matũ mae yamawashãkanikiki, hawa teshe wamarã— ikũkaini Jerusalém anu hikitã

Lucas 21:20

Ana betsarã, nawa soldadobu Jerusalém mae keshebaunabu uĩkĩ hawaira hatu yamawashanaibu mã unãshanaii.

Lucas 6:23

Haska inũ, Deusũ hãtxa yuishunikabu itxakawanibu keska wakĩ maturi itxakawaibu nai anushũ Deusũ matu duawashanaiwẽ taea hawa dateama xinã txãkãkubaĩshãkãwẽ— iwanã,

2 Pedro 3:7

Hakia nai inũ mai natiã hayayuarã, habiaskari wakatsi Deusũ mekeyukubainikiki. Hanu bari hawẽ henei keyuaitiã unãti wakĩ yura txakabubu kupikatsi Deusũ hawẽ hãtxawẽ yunukĩ nai inũ mai txiwẽ yamawakĩ habũ Deus danãmisbu hanu hatu benu keyushanikiki.