Lucas 4:18 - Kaxinawá Bíblia (BR)

^18-19 “Nuitapaibu kakape ẽ hatu yusĩnũ Deusũ ea katuniwẽ taea hawẽ Yushĩ Pepa ẽ hayaki. Hanushũ huĩti nixmabu hatu benimawakĩ yura betsã hatu tsuma wa henemakĩ bekũ keskabu bepesha keska wakĩ hatu yusĩ pewakĩ hatu itxakawaibu nemakĩ Deus benimawatikiri dasibibu ẽ hatu unãmakubaĩshanũ Deusũ ea yununiki”, hatu watã keneni hãtxa yuikĩ keyushũ

Kashinawa : Diosun Jesúswen taexun yuba bena yiniki

^18-19 “Nuitapaibu kakape en jatu yusinun Diosun ea katuniwen taea jawen Yushin Pepa en jayaki. Januxun juinti nishmabu jatu benimawakin yuda betsan jatu tsuma wa jenemakin bekun keskabu bepexa keska wakin jatu yusin pewakin jatu ichakawaibu nemakin Dios benimawatikidi dasibibu en jatu unanmakubainxanun Diosun ea yununiki”, jatu watan keneni jancha yuikin keyuxun

Lucas 4:18 Referencias Cruzadas

Salmos 2:2

Mai anua shanẽ ibu kushipabu shanẽ ibu betsabube Deus inũ hawẽ Katuaki sinatai hatu maemanũ ika yubakai hatuki ha ikanikiki.

Salmos 2:6

“Ha Shanẽ Ibu ẽ katuni ẽ yunushanai ha meribi mae pepa mati Sião anu shanẽ ibushanikiki”,

Salmos 34:18

Senhor Deusrã, nuku mekei nuku dapi niaki. Tsuabura bika betsa betsapa tenei huĩti nishmai nui hawawẽ haskatimabiakẽ Senhor Deusũ hatu mekekĩ pashawashanikiki.

Salmos 51:17

Ha inãkuĩti tibi mĩ betxipaiairã, ẽ yushĩ mĩ ea meshteima ẽ bika tenebiai has shinãma ẽ huĩti betsa watã txakabu mĩ ma ea pewaima ea uĩkĩ mĩ ea betxipaiaii.

Isaías 32:3

Habũ berurã, pehaira hatu uinũ ika beru hã ikabu inũ nĩka pewanũ ika paweshpai keyutã hatu nĩkakatsis ishãkanikiki.

Isaías 35:5

Hanushũ bekũbu bepeshetã uĩshãkanikiki. Patabu pape ikĩ nĩka pewashãkanikiki.

Isaías 42:7

Haska wakĩ beshushbu mĩ hatu uĩmashanaii. Bitxiti hiwe merã hatu bitxiyamabu mĩ hatu tashnimashanaii, tsuabura meshu anu hiwea keska hatu tashnima keska wakinã.

Isaías 45:13

Ha dikabi eãri Ciro ẽ tashnimaniki, hau hatu maemanunã. Hawẽ kati bai dasibi ẽ hawama washũshanaii. Hanushũ hatũ ẽ maewã ea benishũshanikiki. Haska watã enabu habũ hatu iyunibu hatu mebikinãkĩ hatu henematã hatu ea akĩ pakamama manakuti yukama ishanikiki”, iki Senhor Deus dasibi binua hãtxashuki.

Isaías 49:9

Habũ matu bitxinibu keska hatu yuikĩ: ‘Mã ma hatishũ bika teneshinaki. Ana hawama tashnirikãwẽ.’ Mã meshu merã mapua keskaburã, ana hawaki dateama kaĩbaĩshãkãwẽ. Bai tibiwẽ bukĩ piti tibiki mã nukushanaii. Hanu tsua hiweabumanu mati tibi anuari matũ inabu piti hayashãkanikiki.

Isaías 50:4

Habu nuitapai punu nukabu ea Isaíasĩ ẽ hatu merabewakĩ benimawashanũ Senhor Deusũ ea unanepa watã ea yununiki. Ẽ shabakabi pe nĩkakubainũ merabewakĩ shaba tibi Deusũ ea pe yusĩkubaĩmiski.

Isaías 61:1

Haskaya Senhor Deusũ ea katukĩ sheniwẽ ea mauka keska wakĩ hawẽ Yushĩ kushipa ea hikimatã ea yunukĩ: “Nuitapaibu hatu shinã txãkãwaĩ kaka pepa hatuki txanitãwẽ. Bika teneaibu hatu merabewatãwẽ. Hatu nãta iyukĩ tsuma wabainibu keska inũ hatu bitxinibu keska haska wakĩ ẽ hatu unanuma hiwematiru hatuki txanitãwẽ, haska wakĩ ẽ hatu pekatirurã.

Isaías 66:2

Dasibi betsa betsaparã, eã besti dami wakĩ ẽ keyuniki. Haska wakĩ ẽ taewa hayai hiwenibuki. Eã hunibu uĩkĩ merabewakinã, habu keĩsbuma inũ hatũ txakabu henetã ẽ hãtxaki mesekĩ nĩkamisbu ẽ hatu amiski, ikĩ ea Senhor Deusũ ẽ hãtxa ẽ mestẽwaiĩ”, iniki.

Malaquias 4:2

Hakia matubu ewẽ datekĩ mã ea duawakubaĩmisbu bari pesheai keska ẽ pepa matu txashashũshanikiki, ana hawa matu isĩ tenemama ẽ kupiti matu nemashunirã. Haskaiwẽ taea benimai matubu mã ishtxu ishtxu ikũkaĩshanaii, kene meranua ina awa bake kaĩkainai keskairã.

Mateus 11:5

Bekũ inũ beshushbũ uĩaĩbu inũ, haska mapuisbuma mapuaibu inũ, habu bitxiki dasibi txami betsaniki dakemisbu maĩ sakara iki keyuaibu inũ, patabũ nĩkakĩ keyuaibu inũ, mawa ana besteaĩbu inũ, habu nuitapaibũ hatũ pashati kakape nĩkatã benimaiburã, haska João yuitãkãwẽ.

Mateus 12:18

‘Ẽ tsuma ẽ katunirã, ẽ abuai ea benimawamiski. Ẽ Yushĩ Pepa ẽ yunua merabewaya pepakiri ẽ tsumapã yurabu shukuabu tibi yuibaũshanikiki.

Mateus 12:20

Txakabu maemakĩ binuriama yurabuwẽ nuikĩ tawa yuxtu sẽkeama keska wakĩ huĩti babubu danãma ishanikiki, bĩ pahi ibubis nukabiai nukama keskarã.

Mateus 5:3

—Benimatirubukiri matu yuinũ nĩkakãwẽ. Tsuabura kẽkubaĩsbuma Deus shanẽ ibukĩ hatu duawashanaiwẽ taea benimapaketi xinaĩ benimakubaĩkanikiki, manairã.

Lucas 4:17

Deusũ hãtxa yuishunika Isaíasĩ keneni hãtxa una inãbu txuretã hakiri hãtxa kenenibu betxitã hatu yuikĩ:

Lucas 6:20

hatu shushawakĩ menetã haki txiti ikabu besti beiskĩ hatu hãtxa wakĩ: —Tsuabura yumaĩ matũmebi mã kẽkũkainama Deus shanẽ ibukĩ matu mekekubaĩshanaiwẽ taea mã benimakũkaĩmiski.

Lucas 7:22

ha dabe xinãmakĩ Jesusũ yuikĩ: —Hawara uĩkĩ mã nĩkakubainairã, haska Joãoki txaniritãkãwẽ, eskaiburã. Bekũ inũ beshushbũ uĩaĩbu inũ, haska mapuisbuma mapuaibu inũ, habu bitxiki dasibi txami betsani haki dakemisbu maĩ sakara iki keyuaibu inũ, patabũ nĩkakĩ keyuaibu inũ, mawa ana besteaĩbu inũ, habu yumaĩbu hatũ pashati kakape nĩkatã benimaiburã, haska João yuitãkãwẽ.

João 12:46

Yurabu mai anua hatu ikũwãmatanũ ika shaba keska ẽ huniwẽ taea tsuabũra ea ikũwaĩ mexu merã hari hiweama keska ishãkanikiki.

João 3:34

Hanushũ hawẽ bake yunukĩ hawẽ Yushĩ Pepa keyuisma inãkubaĩmiswẽ taeshũ Deusũ bake ha yununitũ hawẽ hãtxa yuimiski.

Hechos 10:38

Hanushũ Jesus Nazaré anua hawẽ Yushĩ Pepatũ kuxipawẽ Deusũ Jesus kuxipahairawa ha meranua merabenãkũkainaya habu diabo Satanásã itxakawakĩ isĩ betsa betsapa hatu tenemamis nuitapaibu Jesusũ hatu shushawakĩ pewakĩ hatu merabewakubaĩyama mã unãriaii.

Hechos 26:18

Habu anu ẽ mia yunua kashũ hatu xinã betsa wamakĩ hau unaĩsmapakĩ Satanás ana txibãyamanũbũ ẽ Epa Deusũ hãtxa mĩ hatu yusĩkubaunũ judeubuma betsa betsapabu anu ẽ mia yunuaii. Harishũ hatu beru bepesha keska watã ana mexu merã kama keska hakia bĩwẽ kai keskaibu mĩ hatu waya hatiritũ ea ikũwaĩbũ hatũ txakabu ẽ hatu buashunaya Deusũ hatu hiwekuĩmashanikiki, hawa hatu kupiamarã, hawenabu meribi wakinã”, ea waniki.

Hechos 4:26

Mai kesua anua inũ mae tibi anua shanẽ ibubu kuxipabu itxa yubakai Shanẽ Ibu Deus inũ hawẽ Katua Messias danaĩ haki sinatashãkanikiki’, iki hãtxanirã,

Hechos 4:27

—Txanima na habiatiã shanẽ ibu Herodes Antipas inũ Pôncio Pilatos na mae anu nawa betsabube inũ Israelbube itxa mĩ tsuma Jesus meribi mĩ katuni Messias mĩ yununi mĩ kẽwãmis haki sinatakanikiki.

Colosenses 1:13

Uatiã nũ Deus unãma mexu txakabũ nuku tsumabiakẽ Deusũ nuku putamaniki, hawẽ bake ha abuaitũ hawẽ shanẽ anu nuku iyukinã.

Santiago 2:5

Ẽ betsabu inũ ẽ puibuũ, matuwẽ nuikĩ ẽ matu abuai ẽ hãtxa nĩkairakãwẽ. Na mai anua tsuabura nuitapaibu Deusũ katua habũ Deus ikũwã kayabiaibu pepakanikiki. Hanua txipu haska hiwekũkainaiwẽ taeshũ niti akama nai anu habe hiwemashanai Deus yubakanishũ danãma hatu abumisshũ hatu manakushanikiki, nai anu hatu hiwemakinã.

1 Pedro 2:9

Hanua maturã, yura shuku betsa matu katuniki. Ha inũ, shanẽ ibu binua Deusbe hãtxashunikabu matu dasibi wakĩ ikũwaĩbu meribi shukua betsa matu wakĩ Deusũ ibu wakĩ abukĩ hawenabu matu warianiki. Haskawẽ taeshũ hakiri hawẽ daya pehaira Deuskiri mã txanikubaũshanũbũ mã mexu merã ika keskashũ txakabu wamisbu hanua matu kenakĩ Cristõ shaba hawẽrua anu matu hikimakĩ hiwemakatsi matu tashnimaniki.