Isaías 9:3 - Kaxinawá Bíblia (BR)

³ Senhor Deusuũ, hawẽ benimati ewapa mĩ ma yunuaki, nũ hawẽ benimahairairã. Nukũ yunu tseka keyutã nũ benimamisbu keskai, dasibi mia bebunua benimashãkanikiki. Tsuabũra hawara mabu hawẽrua pepa hatu pashkashunabu bi benimai keskai mia bebunua benimatxakayamashãkanikiki.

Isaías 9:3 Referencias Cruzadas

Isaías 35:10

tsuabura Deusũ hawenawakĩ hatu binirã. Hawẽ maewã Sião anu hikibaini kãtai benibaĩshãkanikiki. Hari hikitã hiwea benimai heneama ipakeshãkanikiki. Haburã, benimai shinã txãkã bestishãkanikiki, haria ana kashai bika tenei eẽ ikama yamakaini pes dakashanikiki.

Isaías 35:2

Hua itxapa hawẽrua tueaiwẽ mai tsusĩ benimai shinã txãkãshanikiki. Hi hawẽrua Líbano keska hanu tsua hiweama anu Deusũ hawẽruahaira washanikiki, Mati Carmelo inũ napãpa Sarom hawẽ mai pepa keska wakinã. Deusũ haska wakeakeaya dasibibũ hawẽ kushipa hawẽrua uĩshãkanikiki, nukũ Senhor Deus haska shanẽ ibu pepahaira ikũkainayarã.

Isaías 54:1

Senhor Deusũ matu yuikĩ: “Aĩbu tsuãra henebiabainitũ ha aĩbu betsa beneyabiakẽ ha aĩbu hawẽ benẽ henebaĩyamatũ bake itxapa bikĩ mĩ hatu binũshanaii. Mĩ haskawẽ taea aĩbu bake bitiruma inũ mĩ hawa bake kaĩ isĩ meismaã, mĩ bakeumabiarã, benimai shinã txãkaĩ sai sai iki kãta txakayamariwe”, mia waikiki.

Isaías 55:12

Nenu Babilônia anu mã Israelbu benibu ana matũ mae anu txĩtũbaini benimabaini bui matũ mai pakea anu unanuma mã hikishãkanaii. Mã haskabainaibu matu uĩtã mati matipa inũ mawa tibi matuwẽ benimai kãtaibũ ni shukuabũ matu uĩtã matuwẽri benimakĩ mekẽ paush paush akai keskai bubi bubi ishãkanikiki.

Isaías 61:10

Haskakiri Senhor Deus yubakakũkainaiwẽ taea ea ẽ shinã txãkaiĩ. Hawẽ meketi haya ea inãkĩ piskumatã hawẽ yunuti kushipawẽ ea mekekĩ binumakĩ ea duawakubainikiki, huni aĩyãkatsi iki hawẽruakĩ maiti pepa sawemis keskai inũ aĩbu beneyanũ, iwanã, hawẽruakĩ dauti betsa betsapawẽ daumis keskairã. Haskawẽ taea ẽ Deuswẽ ẽ benima txakayamaii.

Isaías 61:7

Mã enabu habu matuki sinatakĩ itxakawakĩ matu dakewakubainibu nuitapakĩ bika mirima mã mekubainima keska natiã ha binumakĩ matũ mae anushũ mabu karu mirima inũ benimai shinã txãkaĩ henetima bi mã hawẽ hiwekũkaĩshanaii.

Isaías 65:18

Habu dami wakĩ ẽ ana bena washanaiwẽ taea benimai shinã txãkãkubaĩkãwẽ. Ha Jerusalém ana bena wakĩ benima paketi besti ẽ matu washũshanaii. Ha mae anu yurabu hawẽ hiweaiburã, ana hawa bika teneama benima besti hiweshãkanikiki.

Lucas 11:22

Hakia huni betsa ha binũa hushũ maemakĩ hawẽ yura hunekĩ mekemis inũ hawẽ pia inũ hawẽ kuxati mebĩshũ hawẽ hamapai ibu watã hawẽ haibuaibu inãbaũmiski. Eãnã, Belzebu binukĩ hawẽ kuxipa hatuwẽ dayai mebĩtã ena ẽ watiruki.

Hechos 8:8

ha mae anushũ Filipẽ hatu haska washunai uĩ hawẽ xinã txãkaĩ benimahairanibukiaki.

Filipenses 4:4

Nukũ Shanẽ Ibu ikũwaĩnã, benimarikãwẽ. Ana habias ẽ matu yuaii. Heneama benimarikãwẽ!

1 Pedro 1:8

Haska inũ, Jesus Cristo uĩyama ibiani mã abuhairaii. Ha inũ, natiã uĩyama ibiani mã ikũhairawariaii. Haska benima pae mã haya hãtxawẽ besti ha benima pae tsuã haska tashnimatirumaki.

Juízes 5:3

Yununikabuũ, Senhor Deus ẽ kãtashunai ea nĩkakãwẽ. Shanẽ ibu beshmasbuũ, Israelĩ enabu mekenika Deus ẽ kẽwaĩ ea nĩkakãwẽ.

Juízes 7:22

habiatiãri 300 Israelĩ enabũ txashuwã mashũ puri ati txã txã akĩ heneabumakẽ Midiã nawabu Senhor Deusũ hatu hanubi detenamemaya habu pashai Bete-Sita unu mae betsakiri bui Zererá baikiri bui maiwã pakea Abel-Meolá dapi anu mae betsa Tabate dapi buaibũ