Isaías 53:10 - Kaxinawá Bíblia (BR)

¹⁰ Senhor Deusũ hawẽ tsuma bika betsa betsapa hawena wamashanikiki. Nukũ txakabuwẽ taeshũ hawẽ hiwea yaushiama inãshanaiwẽ taea hiwea txaipa bitã bababu mirima uĩ hatuki nukushanikiki. Senhor Deusũ haska betxipai yubakani hawẽ tsumawẽ taeshũ haska tibi meneshanikiki.

Isaías 53:10 Referencias Cruzadas

Salmos 110:3

Ha shabatiã hatube detenamekĩ mĩ hatu maemashanũ minabũ mia merabewai mia anu beshãkanikiki. Mĩ mati meribihaira hatu dami wanirã, habũ nibi inũ penaya hawẽruahaira peshekirãmis keska bari tibi pei mĩ benaskũkaĩshanaii, berunãsi kushipairã.

Salmos 22:30

Enabu pakubaĩkĩ Senhor Deuski mesekĩ kẽwãshãkanikiki. Hakiri hãtxakĩ yuibaũshãkanikiki, pakubaĩkĩ hakiri yui heneamarã.

Salmos 22:31

Habu kaĩriabumari txipu kaĩtã hawẽ itxakanikatima inũ hawẽ dayakiri haska akubaĩmis hatuki txaniriakubaĩshãkanikiki.

Salmos 69:26

Miã tsuara mĩ hatu bika tenema kai ha huni txakabũ ana hatu txibãbaĩkĩ bika hatu tenemamisbuki. Miã tsuara mĩ isĩ tenema kai ha isĩ betsa teneaiki habu haki kashemisbuki.

Isaías 42:1

Deus hatuki txani: “Uĩkãwẽ. Ẽ tsuma ẽ katunirã, ẽ betxipaiai ea benimawamiski. Ẽ Yushĩ kushipa ẽ yunua merabewaya ha ẽ tsumapã hawẽ yunuti kushipa pepakiri yurabu shukuabu tibi yuibaũshanikiki.

Isaías 46:10

Ẽ dami wakĩ taewani keyui kai yui ẽ txaniniki, earã. Haska tashniriamahaira haskanũbariai yui ẽ txaniniki. Haska wakatsi ikĩ yubakatã eã ẽ tashnimamiski. Haska tibi hau inũwẽ, akĩ eã ẽ yunua imiski.

Isaías 49:4

ea hawẽ tsumapã shinãkĩ: “Hamẽ ẽ daya ẽ benui hawa biamabia dayahairakĩ ẽ kushipa ẽ hamẽ puta bestimaki”, ẽ ibiaya txanima dasibi ẽ akairã, Deusũ tsuma keyuaki. Deusũ besti hawẽ kushipawẽ ea manakua ẽ uĩshanaii.

Isaías 53:12

Hawẽ tsuma pepa hawẽ hiwea hawa yaushiama mawashanaiwẽ taeshũ Deusũ duawakĩ hawẽ tsuma kushipa betsabube manakukĩ ha hawẽ tsuma duahairawashanikiki. Huni txakabu keska wakĩ txitebiaibũ yurabũ txakabu itxapa buashũkĩ habũ txakabuwamisbu hatu ea ashũshanaiwẽ taeshũ pepa bestiwẽ Deusũ manakushanikiki.

Isaías 54:3

txipu yusiuri inũ yusmauri minabu pai manibaũkĩ nawa shukua itxapa hatu atxitã natiã ha mae hanu tsua hiweabuma anu habũ maewatã hiweshanaibuwẽ taearã.

Isaías 61:9

Matũ bababu pakubaini pe hiweabũ nawa shukua tibibũ hatukiri pe shinãkĩ kẽwãkĩ yuikubaĩshãkanikiki. Senhor Deusũ hawenabu pewẽ hatu duawakubainai dasibibũ hatu uĩkĩ unãshãkanikiki”, ikaya

Isaías 9:7

Ha yumetã tsauirã, Davi shanẽ ibuni anu tsaushanikiki. Shanẽ ibuhairakĩ hawẽ kushipawẽ mai hirabi anu shanẽ ibukĩ tsuma keyubaũshanikiki. Hawẽ unanuma hiweaibu keyuama inũ hawẽ yunuti kushipa keyuama ipakeshanikiki. Ha shanẽ ibuhairairã, mestẽ tsuã maewakĩ tsekatiruma habias ipakeshanikiki. Deus kushipahaira dasibi binua hawẽ nui pae tsuã nuka watirumatũ nuku haska washũshanikiki.

Miquéias 7:18

Nukũ mekenika Senhor Deusuũ, minabu eskarabes tesheniwẽ nuikĩ mĩ hãtxa danãkĩ nũ txakabuwaima tere akĩ mĩ ana shinaĩsmawẽ taea Mekenika Yushĩ mia keska betsa tsua hayamaki. Nukuki sinatapakeama maĩtã haska mĩ nuku betxipaiai mĩ nuku uĩmamiski, nuku duawakubaĩkinã.

Mateus 17:5

akaya hanushũ nai kuĩ hushu mayabirãkĩ hatu atxiaya nai kuĩ anushũ hui tashnikĩ hatu yuikĩ: —Na ẽ bake ẽ Katunirã, ẽ abuhairaii. Hawẽ ẽ benimahairaii. Nĩkairakubaĩkãwẽ— hatu wa

Mateus 3:17

yurabu nĩkamai nai anua hui tashnikĩ yuikĩ: “Narã, ẽ bakeki. Ẽ abuhairaii, ẽ Katuarã”, anikiaki.

Lucas 1:33

Deusũ yunua mĩ bake Jesus Jacõ bababũ Shanẽ Ibu ipashanikiki, niti ikama ikibi ikirã— aka

João 1:29

Hanua ushaxini bestẽtã maniabũ Jesus huai txaima betxitã metukĩ Joãonẽ hatu yuikĩ: —Uĩkãwẽ. Deus daewakĩ hatũ txashuwã bake menumisbu keska wai yurabu dasibibũ txakabu hatũ hatu buashũkĩ Deus nuku daewashũti ma huikiki.

João 12:24

Ikũ ẽ matu yuiaii. Heshe mai merã banama hawa bimitirumaki. Hakia mai uke merã bana hawẽ nami txapui dami hukuĩ yumetã bimihairamiski. Earã, ẽ haska keskayuaii.

Romanos 6:9

Ha inũ, Cristo mawatã ana besteni ana mawatiruma nũ unãriaii. Ha yushĩ parananãmistũ ana tenãkĩ maemakĩ ana binutirumahairaki.

Romanos 8:32

Haska inũ, hawẽ bake hawa yauxitaskama yunua tashnitã mawakĩ nukubu nukũ txakabu nuku buashuniwẽ taeshũ nũ habu Jesus Cristoki dasiabu hawẽ taeshũ nuku duawakĩ hamapai tibi hawẽ bakewẽ nuku ashunishũ Deusũ nuku ashũkubainikiki.

Romanos 8:8

Haskawẽ taeshũ tsuabũra hatũ kemu pae txakabũ hatu mekemisbu habũ Deus kẽwãkĩ benimawatirubumariki.

2 Coríntios 5:21

Jesus Cristo hawa txakabu meamahairabiakẽ hakia nukũ txakabuwẽ taeshũ txakabu memis keska wakĩ Deusũ Cristo aniki. Nũ Cristowẽ taea pepa keskabu Deusũ nuku ana kupikatsi ikama: “Ẽ haibuaibu txakabu hayama keskaki”, iwanã, Deusũ nukukiri haska xinãmiski. Haskakẽ Cristo matu mawashuniwẽ taea Deusbe haibunamekubaĩkãwẽ.

Gálatas 3:13

Deusũ hawẽ yunuti inũ hawẽ nemati yunukinã, hawẽ yupukunãkatsi aniki. Hatũ nukũ txakabuwẽ nuku yupubiaya Cristõ nuku meshpamanũ ika nukũ txakabu kupiti bi nuku mawashuniki. Haskai kaikiri bebũkiri Moisés yuikĩ: “Tsuara hatũ txakabuwẽ taeshũ tenãkĩ hiki netãbu mawaya Deus hawẽ nuiama yupumiski”, iniki.

Efésios 1:5

nuku mebikinãshũ hawenabu nuku washanũ, iwanã, bebũkiri Jesus Cristowẽ hawẽ bakebu nuku wakatsi hawẽ duapawẽ nuku katuniki, hawẽ xinã nuku inã nũ ikũwãshanũbunã.

Efésios 1:9

Cristowẽ nukũ txakabu buakatsi bari itxapa hawẽ xinã Deusũ hunenishũ hawẽ duapawẽ ma shabakabi nuku tashnimashuniki, nuku unãmakinã.

Efésios 5:2

Haska inũ, Cristõ nuku abukĩ Deus duawanũ ika Deusũ kupiti nuku bishuĩ mawai inĩti hawẽrua keska puekĩ Deus benimawanikẽ haska Cristo nuku ishuni keskariakĩ nukubetã ikũwaĩbu dasibibube nui abunamei hiwekubaĩkãwẽ.

2 Tesalonicenses 1:11

Haskawẽ taea Deusbe hãtxakĩ matukiri yukakĩ nũ heneismaki. Deusũ matu kenakĩ katunishũ pepabu matu wakatsis ikaikiri matu yukashũkinã, mã ikũwaĩwẽ taeshũ hawẽ kuxipawẽ hamapai pepa akĩ betsabube merabenamei mã hiwekubainũbũ ẽ matu ea ashũkubainaii.

Hebreus 2:13

Hanua kene betsa anushũ yuikĩ: “Eãri mĩ ẽ Deus ẽ mia ikũwãkubaĩshanaii”, iwanã, ana yuikĩ: “Habu Deusũ hawẽ bakebu ea inãtã ea hatu mekemanibe ẽ hatube nenuki”, iniki.

Hebreus 7:27

Ha nukunabu Deusbe nuku hãtxashunikabu binuabunã, shaba tibi yuinaka betsa tenãtã hatu kuakĩ menu keyushũmisbuki, ha dukũ hatũ txakabu dukũ buatã ha katxu hatunabũ txakaburi buashũkinã. Hamẽ Jesusrã, hatu keskamaki. Hatũ nukũ txakabu Deus buamai hawẽ hiwea yauxiama cruz anua besti wai hawẽ hiweawẽ nuku mawashũkĩ ana mawatimai ibubis Deus nuku daewashuniki.

Hebreus 9:14

Haska wapaunibu pebia haska binumakĩ Cristõ hawẽ himi habanirã, kuxipa paehairaki. Haskakẽ Deusũ Yushĩ niti ismatũ merabewaya inãkuĩti hawa txakabu hayama keskakĩ Jesus Cristo ma ana bestẽkĩ Deus nuku daewashuniki. Mawai hawẽ himi habaniwẽ taea natiã nukũ xinã txakabũ nuku kanemakĩ hawẽ nuku tenãmis nuku buashũtã nukũ kupiti bitã hiwekuĩa nuku inãkĩ pewaniki, Hamebi Hiwemis Deus besti duawai ha dayashuni nũ hiweshũkubaĩshanũbunã.

1 Pedro 2:24

Cristo hamebi hawẽ yura cruzki dunua mawakinã, nukũ txakabu nuku bushuniki, nuku xinã betsa wamakĩ nũ ana txakabu husiyamashanũ nuku buashũkinã. Hanua hiwea bena nũ ma haya nũ ma pepai hiwekũkainaii. Cristo mawakĩ hau ana txakabũ matu tsumayamashanũ matu meshpamaniki, yura betsabu hatũ isĩ teneai shushawakinã.

Apocalipse 1:18

Ea ẽ hiwea ẽ mawani natiã ana ẽ bestẽni niti ikama ẽ hiwepakeaii. Ha inũ, hiwemati kuxipa inũ kupiti kuxiparã, ea besti ẽ hayaki. Hanu mawai ikibi ishanaibu anurã, eã besti ẽ yunutiruki.