Isaías 49:26 - Kaxinawá Bíblia (BR)

²⁶ Habũ matu yunu yunu akĩ bika tenemamisburã, ibubis hatunabubetãri bika teneshãkanikiki, hatũ nami ibubis piai keska wakinã. Ibubis hatũ himiwẽ paẽshãkanikiki, vinhowẽ paeã keskairã. Haskaibũ ha dasibi yura hiwebaunabũ ea ẽ Senhor Deus matũ mekenã piskumanika inũ ea ẽ Jacó kushipahaira inũ ea ẽ matũ mebikinanika habũ ea unãshãkanikiki”, itã,

Isaías 49:26 Referencias Cruzadas

Gênesis 49:24

hakia hatũ pũyã pũshukuama kushipakĩ minabũ hatu maemakubaĩshãkanikiki. Jacó Deus kushiparã, pehairaki! Israelĩ mekenika kushipa ẽ kẽwaiĩ.

Isaías 1:24

Haskawẽ taeshũ Senhor Deus kushipa dasibi binuatũ hawẽ kushipawẽ Israel merabewamis hawẽ hãtxa kushipawẽ hatu yuikĩ: “Hatishũ besti matũ txakabu ẽ tenetiruki! Mã habu eki sinataiburã, matũ txakabu tanatã matube detenameai keskakĩ ẽ matu kupishanaii.

Isaías 33:22

Ha shashuwã natxãkãki hawẽ dispi tibiki ha tari haki pũtea niwe bekĩ ana pũtes wamawẽ taea ha tari pea pea itiruma ishanikiki. Hatũ shashuwã ana harakiri katirumakẽ haki inatã habu nukuki sinatamisbũ mabu pepa dasibi mapematã mabu nũ pashkaibũ bekũbu inũ tekeyabũri habuna bishãkanikiki. Ha haskaibutianã, Senhor Deusrã, nukũ Shanẽ Ibu inũ, nukũ unãtinanika inũ, nukũ hãtxa pewatã txibãmanika ishanaiwẽ taea hatũ nuku piskumashanikiki.

Isaías 43:1

Hakia natianã, Jacó enabu Israelbuũ, nĩkakãwẽ. Senhor Deusũ matu dami wanitũ matu yuikĩ: “Dateyamakãwẽ, matu iyunibu haria hatu putamabirãkĩ ẽ matu tashnimabiranimaki. Eã matu katunishũ matũ kenawẽ kenakĩ ena ẽ matu waniki.

Isaías 43:3

Earã, ẽ Israelĩ enabũ Senhor Deus meribi matũ piskumanikaki. Matu tashnimakinã, matu ana ena wakĩ bikatsis ikĩ ha nawabu Egito inũ, Etiópia inũ, Sebá habũ matu itxakawaibu hatu matu kupishũkĩ Pérsia nawabuwẽ ẽ matu tashnimabirãshanaii.

Isaías 45:6

bari huaikiria inũ bari hikiaikirishũ hau dasibibũ tsua ea keska hayama hau unãshanũbunã. Earã, ẽ habia Senhor Deuski, betsa hayamarã.

Isaías 49:7

Deusũ enabu shukua betsabũ habu hatu itxakahairawamisbu inũ, shukua betsabũ danãkĩ hatu betxipaisbuma inũ, huni pubẽ shanẽ ibubũ hatu atxitã hatũ tsuma escravo hatu wamisbu Senhor Deus mekenã mebikinanika Israelbũ Deus meribitũ hawenabu hatu yuikĩ: “Ea Israelbũ Senhor Deus meribitũ ẽ matu katuni hãtxai ẽ yubakamis ẽ matuwẽ meneshanaii. Ẽ matu haska washanaiwẽ taeshũ shanẽ ibubu inũ hatũ huni bakebu shanẽ ibubũri matu uĩ e itã matu bebũshũ kẽwaĩ dãti ishãkanikiki”, itã,

Isaías 54:14

Ẽ yunuti pepa kushipatũ mia mestẽwã ana mia itxakawakĩ tsuma wama inũ mĩ ana hawaki dateama ishanaii. Mĩ date paepamis ana txĩtũkirã mia atxiama ishanikiki.

Isaías 60:16

Nawa shukua tibibũ hatũ piti pepahaira beshũ matu inãshãkanikiki. Nawa shanẽ ibubũ hatũ mabu hawẽrua karuhaira matu beshũshãkanikiki. Matu haska waibu uĩkĩ ea Senhor Deus ẽ matũ piskumanika mã unãshanaii, Jacó merabenanika kushipahaira earã, ẽ matũ mebikinanikarã.

Isaías 9:4

Tsuãra hatu tsuma washũ hatu bika tenemaibu inũ, bika betsa betsapa habũ meaibu inũ, shanẽ ibubũ hatu itxakawamisburã, haburã, mĩ hatu nemakĩ putamashanaii, ha Midiã nawabu mĩ hatu yamawani keska wakinã.

Apocalipse 14:20

Hanushũ mae benãta uva bimiki paikĩ hawẽ hene bimisbu keska wakĩ Deusũ habũ himi habamakĩ bai mata keska wakĩ cavalo hawẽ kui anu kesũbaĩkĩ 300 quilômetro habamabaĩshanai ẽ uĩshuki.

Apocalipse 16:6

Mĩ hãtxa yuishunikabu inũ Jesus txibaĩbu itxakawakĩ habũ himi habawakĩ tenãkubaĩmisbu haburi hatu kupikĩ himi mĩ hatu amaii. Haska mẽnũ ika imisburã, hau haskanũbũwẽ”, akaya

Apocalipse 17:6

Haska inũ, Jesus txibãkĩ hawẽ hãtxa yusĩmisbu mirimabu ha aĩbu hininipa itsa mae ewapa Babilônia anuabũ hatu tenãshũ habũ himi akai keska paẽa haskai uĩkĩ xinaĩ e iki teku itã ẽ pes nikẽ

Juízes 7:22

habiatiãri 300 Israelĩ enabũ txashuwã mashũ puri ati txã txã akĩ heneabumakẽ Midiã nawabu Senhor Deusũ hatu hanubi detenamemaya habu pashai Bete-Sita unu mae betsakiri bui Zererá baikiri bui maiwã pakea Abel-Meolá dapi anu mae betsa Tabate dapi buaibũ